ၽွင်းယၢမ်း တပ်ႉၽွမ်ႉႁူမ်ႈၸၢဝ်းၶိူဝ်း တင်း သိုၵ်းမၢၼ်ႈ ပဵၼ်ပၢင်တိုၵ်းႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇၼၼ်ႉ ၸဝ်ႈၶုၼ်ထုၼ်းဢူး ႁွတ်ႈမႃးတီႈဝဵင်း ၵူတ်ႉၶၢႆသေ ၵႂႃႇပိုတ်ႇလုမ်းမႂ်ႇ တၢင်းပွတ်းမိူင်းၸီး။

Photo: Sai mao

ဝၼ်းတီႈ 24/05/ 2015 ယၢမ်းၵၢင်ၼႂ် 11 မူင်း ၼၼ်ႉ ႁူဝ်ပဝ်ႈ ပႃႊတီႊႁူဝ်သိူဝ် SNLD ၸဝ်ႈၶုၼ်ထုၼ်းဢူး ႁွတ်ႈၽႅဝ် မိူင်းၸီး (ၸဵင်ႇႁွင်ႇဝၼ်းဢွၵ်ႇ ၵူတ်ႇၶၢႆ ယၢၼ် မွၵ်ႈ 40 လၵ်း) သေ ပိုတ်ႇပၢႆႉ၊ ပိုတ်ႇလုမ်းမႂ်ႇထႅင်ႈ။

ၸၢႆးသၢမ်ၾူၼ်သႅင်လၢတ်ႈ ဝႃႈ- “မိူင်းၸီးၼႆႉ ၼွၵ်သေပီႈၼွင်ႉတႆး ယင်းမီးၸၢဝ်းၶိူဝ်းၶၢင်၊ ၶႄႇၵူဝ်းၵၢင်ႉ၊ လွႆ ၸိူဝ်းၼႆႉဢေႃႈ။ ပီတုၸိတ်ႉ မိူင်းၸီး ယင်းဢဝ် ဝူင်းႁႆႇတိုင်ႇ (ၿိင်ႇၶယႃႇ) တွႆႇတိုင်ႈ ႁပ်ႉတွၼ်ႈယူႇ” -ဝႃႈၼႆ။

Photo: Sai mao

ပၢင်ၵႅဝ်ႈၼၼ်ႉ ၽူႈၼမ်းၼႃႈ ပႃႊတီႊမႂ်ႇသုင်ၸိုင်ႈတႆး ၸဝ်ႈသိူဝ်ထႅၼ်ႈ၊ ၽူႈၼမ်းၼႂ်းၵူႈလွင်ႈ လွင်ႈ SNLD ၸၢႆးၼုတ်း၊ ၵႅမ်ၽူႈၼမ်းၼႂ်း SNLD ၸၢႆးလဵၵ်ႉ၊ ၽွင်းတႅၼ်း ၸၢႆးၸိုၼ်ႈသႂ်၊ ၽူႈၵွၼ်းႁွင်ႈၵၢၼ်ပၢႆးပၺ်ၺႃ ၾၢႆႇၵပ်းသိုပ်ႇၼွၵ်ႈမိူင်း SNLD ၸၢႆးသၢမ်ၾူၼ်သႅင် ဢိၵ်ႇပီႈၼွင်ႉ လႃႈသဵဝ်ႈ သီႇပေႃႉ ၵျွၵ်ႉမႄး ၶဝ်ၸိူဝ်းၼႆႉၵေႃႈ ၶဝ်ႈႁူမ်ႈၸွမ်း။

ပႃႊတီႊႁူဝ်သိူဝ်ၼႆႉ ငဝ်ႈလုမ်းပၵ်းတီႈတႃႈၵုင်ႈ၊ လုမ်းၽႄ ဢၼ်ပၵ်းတီႈ ၸႄႈဝဵင်း တင်း ဝၢၼ်ႈဢိူင်ႇ တႄႉ တင်းမူတ်း မီးႁိမ်း 60 လုမ်း။

Photo: Sai mao

 ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်း SNLD ႁိုဝ် ပႃႊတီႊႁူဝ်သိူဝ်ၼႆႉ မိူဝ်ႈပၢင်လိူၵ်ႈတင်ႈ 1990 ၼၼ်ႉ ပေႉသေတႃႉ ဢမ်ႇလႆႈတိုဝ်ႉတၢင်းၶွတ်ႇၽွတ်ႈလူင်ပွင်ၸိုင်ႈမိူင်းတႆး။ ထုၵ်ႇသိုၵ်းမၢၼ်ႈ ယိုတ်းဢႃႇၼႃႇ။ ဝၢႆးမႃး ယွၼ်ႉထွၼ်တူဝ်ဢွၵ်ႇပၢင်ၵုမ်လူင် ၸိူဝ်ႉၸၢတ်ႈ လႄႈ ၺႃးသိုၵ်းမၢၼ်ႈ မၢပ်ႇၽၢမ်းၸိၼႄးဝႃႈ ၶိုင်ယႃႉမိူင်းႁူမ်တုမ်တႅၵ်ႇ ဢိၵ်ႇၶေႃႈႁႃ လၢႆၸိူဝ်ႉလၢႆပိူင်သေ တီႈၺွပ်းၸဝ်ႈၶုၼ်ထုၼ်းဢူးလႄႈ ၽူႈၼမ်းတႆး 9 ၸဝ်ႈ သႂ်ႇၶွၵ်ႈ။ ပိူဝ်ႈတႃႇ မႄးလီၶိုၼ်းလွင်ႈတႅၵ်ႇငၢၵ်ႈ ၼႂ်းၸိူဝ်ႉၸၢတ်ႈ ဝႃႈၼႆသေ ၸွမ်ၸိုင်ႈတဵင်းၸဵင်ႇ ပွႆႇပၼ်ၶိုၼ်း မိူဝ်ႈႁူဝ်ပီ 2012 ။  ဝၢႆးဢွၵ်ႇၶွၵ်ႈမႃး ၸဝ်ႈၶုၼ်ထုၼ်းဢူး မႄးၵေႃႇတင်ႈၶိုၼ်း ပႃႊတီႊႁူဝ်သိူဝ် သေ တႅပ်းတတ်းဝႆႉဝႃႈ တေၶဝ်ႈၶႅင်ႇ ပၢင်လိူၵ်ႈတင်ႈ ၼႂ်းပီ 2015 ၼႆႉ။

Photo: Sai mao

Photo: Sai mao