တႆးတိုၵ်ႉထုၵ်ႇမၢၼ်ႈဢူမ်ဢိုၼ်ယူႇ ၵူႈပၢႆးပၢႆး တႆးထုၵ်ႇလုၵ်ႉၽိုၼ်ႉ



ၸွမ်ႁၢၼ်ၸၢႆးယီႈ ၵၢဝ်ႇလၢတ်ႈၶေႃႈၵႂၢမ်း တီႈပၢင်ၵႅဝ်ႈ ဝၼ်းလၢႆးလုၵ်ႉၽိုၼ်ႉ ၸိုင်ႈတႆး ၶွပ်ႈၶူပ်ႇ 57 ပီ၊ လိူၼ်မေႊ 21 ဝၼ်း (2015) ဢၼ်ၶွင်ႊသီႊဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းတီႈငဝ်ႈၸိုင်ႈ လွႆတႆးလႅင်း။ တႆးတိုၵ်ႉထုၵ်ႇမၢၼ်ႈဢူမ်ဢိုၼ်ယူႇ ၵူႈပၢႆးပၢႆး၊ တႆးထုၵ်ႇလီၶဝ်ႈၸႂ်၊ တႆးထုၵ်ႇလုၵ်ႉၽိုၼ်ႉ။


ၸွမ်ႁၢၼ်ၸၢႆးယီႈ ၵၢဝ်ႇလၢတ်ႈၶေႃႈၵႂၢမ်း တီႈပၢင်ၵႅဝ်ႈ ဝၼ်းလၢႆးလုၵ်ႉၽိုၼ်ႉ ၸိုင်ႈတႆး ၶွပ်ႈၶူပ်ႇ 57 ပီ၊ လိူၼ်မေႊ 21 ဝၼ်း တီႈငဝ်ႈၸိုင်ႈ လွႆတႆးလႅင်း
မၼ်းၸဝ်ႈ လၢတ်ႈဝႃႈ- ၵၢၼ်လၢႆးလုၵ်ႉၽိုၼ်ႉၼႆႉ ဢမ်ႇၸႂ်ႈဢဝ်ၵွင်ႈသေတိုၵ်းလၢႆလၢႆ။ ၵၢၼ်လၢႆးလုၵ်ႉၽိုၼ်ႉၼႆႉ ပဵၼ်ၵၢၼ်တင်းၸိူဝ်ႉၸၢတ်ႈ၊ ဢမ်ႇၸႂ်ႈဝႃႈ ဢၼ်ဢဝ်ၵွင်ႈသေ ၼုင်ႈၶူဝ်းသိုၵ်းသေ တိုၵ်းယိုဝ်းယူႇၼၼ်ႉၵူၺ်း ပဵၼ်လၢႆးလုၵ်ႉၽိုၼ်ႉ။ ပေႃးၸႂ်ယႂ်ႇၼၼ်ႉၵူၺ်း ဢမ်ႇထိုင်တီႈလႆႈ။ ႁဝ်းဢဝ်ၵွင်ႈသေတိုၵ်းယူႇ၊ ၵူၺ်းႁဝ်းသမ်ႉလၢတ်ႈၵႂၢမ်းမၢၼ်ႈယူႇၸိူဝ်းၼႆႉ မၢၼ်ႈပေႃးဢိုၼ်ႁဝ်း၊ ၸိူဝ်ႉၶိူဝ်းႁဝ်းပေႃးတေႁၢႆယူႇယဝ်ႉ။

ၼႂ်းဝဵင်း ဝၢၼ်ႈၼွၵ်ႈ ပေႃးႁဝ်းလၢတ်ႈၵႂၢမ်းတႆး ႁဝ်းပေႃးလၢတ်ႈၵႂၢမ်းမၢၼ်ႈၶူၼ်းၶဝ်းလေႃးယူႇယဝ်ႉ။ မိူၼ်ၼင်ႇ ၵဝ်ၵျွၵ်ႉၼႃႇ ၸဵမ်ၸိူဝ်းၼႆႉ၊ ၵဝ်ၵူဝ်ၼႃႇၼႆ ဢမ်ႇပေႃးဝႃႈ။ ဢၶေႇဢၼေႇမၼ်းၸွင်ႇလီႁႃႉ ? ။ ဢႃႉ..ဢေးသေးၵူၺ်းတၢင်းႁဝ်းၼႆႉ၊ ၸိူဝ်းၼႆႉပဵၼ်ၵႂၢမ်းမၢၼ်ႈ၊ ၵႂၢမ်းမၢၼ်ႈပေႃးပႃးၼိုင်ႈၶိုင်ႈယဝ်ႉ။ ႁဝ်းတႄႉယိပ်းၵွင်ႈသေလုၵ်ႉၽိုၼ်ႉယူႇ၊ ၵူၺ်းၵႃႈ ၾိင်ႈႁဝ်း လိၵ်ႈလၢႆးႁဝ်း ၵႂၢမ်းႁဝ်းၼႆႉ မၢၼ်ႈပေႃးဢိုၼ်ယူႇယဝ်ႉ။ ၸိူဝ်းၼႆႉၵေႃႈ ႁဝ်းၶႃႈထုၵ်ႇလႆႈႁူႉ။

ၵၢၼ်သႃသၼႃၵေႃႈ ပေႃးဝႃႈမီးၵၢၼ်ၵဵပ်းသိုၵ်းႁိုဝ်ႉ၊ ပေႃးဝႃႈႁဵတ်းၸဝ်ႈသၢင်ႇသေ လူင်းၵႂႃႇမိူင်းမၢၼ်ႈ၊ ၵႂႃႇသွၼ်ႁဵၼ်းထမ်း ၵၢၼ်သႃသၼႃပုတ်ႉထ တီႈမိူင်းမၢၼ်ႈ။ ပေႃးပွၵ်ႈမႃးၵေႃႈ လႆႈမႃးသႃသၼႃမၢၼ်ႈ၊ ၸႂ်ႉၵႂၢမ်းမၢၼ်ႈ ၸႂ်ႉပႃလိမၢၼ်ႈ၊ ၸိူဝ်းၼႆႉၵေႃႈ  မၢၼ်ႈပေႃးဢူမ်ဢိုၼ်ႁဝ်းယူႇယဝ်ႉ။

ၵူၼ်းယူႇၼႂ်းၶူးၼႂ်းဝဵင်းၼုင်ႈၽႃႈတူင်ႇ၊ တႆးႁဝ်းၸွမ်းဝၢၼ်ႈၼွၵ်ႈၵေႃႈ ယင်းၼုင်ႈၵွၼ်ႇ။ ၼုင်ႈၽႃႈတူင်ႇသေ ပဵၼ်ၽူႈယိင်းႁႃႉၽူႈၸၢႆးႁႃႉ၊ ပေႃးပႆႇႁၼ်ၸမ်ၸမ် ယင်းဢမ်ႇႁူႉ။ ၸိူဝ်းၼၼ်ႉၵေႃႈ မၢၼ်ႈဢူမ်ဢိုၼ် ႁဝ်းယဝ်ႉ ႁဝ်းတေလႆႈလုၵ်ႉၽိုၼ်ႉ။ ဢၼ်ႁဝ်းလုၵ်ႉၽိုၼ်ႉယူႇၼႆႉ ၵွပ်ႈသင်၊ ႁဝ်းၵူဝ်ၸိူဝ်ႉၶိူဝ်းလႄႈ ဝၢၼ်ႈမိူင်းႁဝ်းႁၢႆၼၼ်ႉယဝ်ႉ၊ လွင်ႈၼႆႉ ၶႂ်ႈႁႂ်ႈပွင်ႇၸႂ်ၵၼ်ၵူႈၵေႃႉ။

ၵွပ်ႈပိူဝ်ႈၼၼ်လႄႈ ႁဝ်းၶႃႈတေလႆႈၶဝ်ႈလၢႆးလုၵ်ႉၽိုၼ်ႉ ၵူႈပၢႆးပၢႆး။ လၢႆးလုၵ်ႉၽိုၼ်ႉၼႆႉ တေဢမ်ႇလႆႈၸႂ်ယႂ်ႇ ဢဝ်ၵွင်ႈလၢႆလၢႆၵူၺ်း ၶႂ်ႈသင်ႇၸိူင်ႉၼႆ။

(ၶႅၼ်းတေႃႈပႂ်ႉသိုပ်ႇဢၢၼ်ႇ ၸဝ်ႈၸၢႆးယီႈ ၵၢဝ်ႇလၢတ်ႈၵႂၢမ်းလွင်ႈ ၵူၼ်းဢမ်ႇႁၵ်ႉၸိူဝ်ႉၸၢတ်ႈ ႁၢႆႉၸႃႉလိူဝ်သတ်း)




 
© 2012 All Rights Reserved | Asean Celebrity | Fonts @ AtFonts | Free Templates