လၢႆၸုမ်းလၢႆပႃႊတီႊဢုပ်ႇဢူဝ်းၵၼ် ႁူမ်ႈယူင်ႉၶၢပ်ႈ ယုၵ်းယၢင်ႇၵၢၼ်မိူင်း



ပူၼ်ႉမႃးမိူဝ်ႈဝၼ်းတီႈ 16/05/2015 မီးၵၢၼ်ၸတ်း ပၢင်ၵုမ် ဝူင်ႈၵၢင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လႄႈ ပႃႊတီႊၵၢၼ်မိူင်း 4 ၸုမ်း၊ ၸိူဝ်းဢၼ်လႆႈ ၶဵၼ်ႇတႅမ်ႈဝႆႉ ပိူင်ယူင်ႉၶၢပ်ႈယုၵ်းယၢင်ႇ ဢုပ်ႇဢူဝ်းတၢင်း ၵၢၼ်မိူင်း။ ဢုပ်ႇဢူဝ်းၵၼ် ပိူဝ်ႈတႃႇႁူမ်ႈယူင်ႉၶၢပ်ႈ ယုၵ်းယၢင်ႇ၊ ၵွပ်ႈမႆႈၸႂ် ၶၵ်ႉၵၢၼ်လွင်ႈငမ်းယဵၼ် ၶၵ်ႉတွၼ်ႈ 1, 2, 3 ဢမ်ႇတၼ်းၶိုတ်း ဢွၼ်ၼႃႈၵၢၼ်လိူၵ်ႈတင်ႈ (2015)ၼႆႉ။


ပၢင်ၵုမ် မိူဝ်ႈဝၼ်းတီႈ 09/05/2015 ဢၼ်ၸတ်းတီႈ ႁူင်းႁႅမ်းဢိၼ်းယႃးလဵၵ်ႊ
ပၢင်ၵုမ်ၼႆႉ ပႃႊတီႊၵၢၼ်မိူင်းမီး ငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၸၢတ်ႈ (NLD) ၊ ၸုမ်းဢူၺ်းလီၸၢဝ်းၶိူဝ်း ၽွမ်ႉႁူမ်ႈ (UNA) ၊ 56 ပႃႊတီႊ ၸိူဝ်းၼႆႉ။ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းသမ်ႉ ၸုမ်းၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉ ၸိုင်ႈမိူင်း (NCCT) ၊ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၊ ႁူမ်ႈတုမ်ၸိူဝ်ႉၸၢတ်ႈ ယၢင်းၽိူၵ်ႇ (KNU) ၸိူဝ်းၼႆႉ။

ပိူင်လူင်မၼ်း ဢၼ်လႆႈၸတ်းပၢင်ဢုပ်ႇဢူဝ်းၵၼ်ၼႆႉ ယွၼ်ႉပိူဝ်ႈ 4 ၸုမ်း ပႃႊတီႊ NLD ၊ ၸုမ်း UNA ၊ 56 ပႃႊတီႊလႄႈ ၸုမ်းၸၢဝ်းၶိူဝ်း NCCT ၼႆႉႁၼ်ထိုင်မႆႈၸႂ်ဝႃႈ- ၶၵ်ႉၵၢၼ်လွင်ႈငမ်းယဵၼ်ၼႆႉ ပေႃးတေႁဵတ်းၵႂႃႇ ၸွမ်းပဵၼ်ၶၵ်ႉပဵၼ်တွၼ်ႈ ၸွမ်းၽႅၼ်တၢင်းၵၢၼ်မိူင်း (Roadmap) ၼႆ ၵူဝ်ဢမ်ႇတၼ်းယဝ်ႉတူဝ်ႈဢွၼ်ၼႃႈ ၵၢၼ်လိူၵ်ႈတင်ႈၼႂ်းပီ 2015 ၼႆႉ။

ၸွမ်းၼင်ႇ ၽႅၼ်တၢင်းၵၢၼ်မိူင်း (Roadmap) တမ်းဝၢင်းဝႆႉၼၼ်ႉ ၶၵ်ႉၵၢၼ်လွင်ႈငမ်းယဵၼ်ၼႆႉ- 1.လူင်းလၢႆးမိုဝ်း ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCA) ။ 2.ဢုပ်ႇဢူဝ်းတူၵ်းလူင်းယူင်ႉၶၢပ်ႈ (Framework) ။ 3.ဢုပ်ႇဢူဝ်းၵၢၼ်မိူင်း။ 4.ၸတ်းႁႅၼ်းပၢင်ၵုမ်လူင် ၸိုင်ႈမိူင်းႁူမ်ႈတုမ် (Union Peace Conference) ။ 5.လူင်းလၢႆးမိုဝ်း ၶေႃႈတူၵ်းလူင်း ပၢင်ၵုမ်လူင်ၸိုင်ႈမိူင်းႁူမ်ႈတုမ် (Union Peace Agreement) ။ 6.သၽႃးႁပ်ႉႁွင်းမၼ်းမၼ်ႈ။ 7.ႁဵတ်းဢွၵ်ႇၼမ်ႉဢွၵ်ႇတူဝ် ၶေႃႈတူၵ်းလူင်း ၸိူဝ်းၼႆႉ။

ၶၢဝ်းယၢမ်း ဢၼ်လႆႈဝၢင်းၽႅၼ်ဝႆႉဢွၼ်တၢင်းၼၼ်ႉ လိူၼ်ဢေႊပရိူဝ်ႊလ်-မေႊ လူင်းလၢႆးမိုဝ်း NCA ။ လိူၼ်ၵျုၼ်ႊ-ၵျူႊလၢႆႊ- ဢေႃႊၵတ်ႊသ် ဢုပ်ႇဢူဝ်းတူၵ်းလူင်းယူင်ႉၶၢပ်ႈ (FW) လႄႈ ဢုပ်ႇဢူဝ်းၵၢၼ်မိူင်း (PD) ။ သႅပ်ႊထႅမ်ႊၿိူဝ်ႊ လႄႈ ဢွၵ်ႊထူဝ်ႊၿိူဝ်ႊ ႁႃသဵင်လိူၵ်ႈတင်ႈ၊ လိူၼ်ၼူဝ်ႊဝႅမ်ႊၿိူဝ်ႊ ၸတ်းၵၢၼ်လိူၵ်ႈတင်ႈ ပတ်းပိုၼ်ႉၸိုင်ႈမိူင်း။

ပေႃးဝႃႈတေႁဵတ်းၵႂႃႇၸွမ်းၶၵ်ႉတွၼ်ႈၼႆ ပိူင်ယုၵ်းယၢင်ႇဢၼ်ယဝ်ႉတူဝ်ႈၵႂႃႇမိူဝ်ႈ ဝၼ်းတီႈ 31/03/2015 ၼၼ်ႉ ပေႃးၸုမ်းလၢႆးလုၵ်ႉၽိုၼ်ႉၵူႈမူႇၵူႈၸုမ်းလူင်းလၢႆးမိုဝ်းယဝ်ႉ ၼႂ်း 60 ဝၼ်း၊ တေမႃးတူၵ်းလူင်းလွင်ႈယူင်ႉၶၢပ်ႈ (FW) ။ ထႅင်ႈ 30 ဝၼ်း (ႁူမ်ႈ 90 ဝၼ်း) တေလႆႈဢုပ်ႇဢူဝ်းၵၢၼ်မိူင်း (PD) ။

ၵူၺ်းၵႃႈ မိူဝ်ႈလဵဝ်ပူၼ်ႉမႃးၸမ် 2 လိူၼ်ယဝ်ႉ၊ ယင်းပႆႇမီးမူႇၸုမ်းလႂ်လၢတ်ႈဝႃႈ ႁဝ်းတေလူင်းလၢႆးမိုဝ်း။ ၶၢဝ်းယၢမ်းမၼ်းၵိုတ်းဢေႇတႄႉတႄႉ။ ပေႃးဝႃႈပႂ်ႉလူင်းလၢႆးမိုဝ်း NCA ယဝ်ႉသေ ၸင်ႇၵွႆႈမႃးၶဵၼ်ႇတႅမ်ႈ (FW) ၶၢဝ်းယၢမ်းမၼ်းတေဢမ်ႇတၼ်းၶိုတ်း။ ၵွပ်ႈၼၼ် ထုၵ်ႇလႆႈၶပ်းၶိုင်ႁၢင်ႈႁႅၼ်းဝႆႉထႃႈဢွၼ်တၢင်း- ၼႆယဝ်ႉ။

ၵူၼ်းၸိူဝ်းၵႂႃႇၶဝ်ႈႁူမ်ႈပၢင်ၵုမ် ၶဝ်ၵေႃႈဝႃႈ- ပေႃးႁဝ်းတေပႂ်ႉတေႃႇ NCA လူင်းလၢႆးမိုဝ်းယဝ်ႉၼႆတႄႉ မၢင်ၽဝ်ႇ 2 လိူၼ်ၵေႃႈ ယူင်ႉၶၢပ်ႈၼႆႉဢမ်ႇယဝ်ႉလႆႈ။ ယွၼ်ႉပိူဝ်ႈၼၼ်လႄႈ ႁဝ်းၶႃႈၵေႃႈဝႃႈ ယူင်ႉၶၢပ်ႈဢၼ်ႁဝ်းမီးယူႇ တင်းသဵင်ႈၼႆႉ ႁဝ်းႁူမ်ႈၵၼ်ဝႆႉထႃႈဢွၼ်တၢင်း။ ပေႃးႁူမ်ႈၵၼ်ဝႆႉထႃႈၼႆ မိူဝ်ႈလႂ်ၶဝ်လူင်းလၢႆးမိုဝ်း NCA ယဝ်ႉ ႁဝ်းၵေႃႈဢဝ်ယူင်ႉၶၢပ်ႈ ဢၼ်ႁဝ်းႁူမ်ႈၵၼ်ဝႆႉၼႆႉ တၢင်ႇယိုၼ်ႈပၼ်လူင်ပွင်ၸိုင်ႈထတ်းသၢင်၊ ပေႃးႁဵတ်းၼၼ် မၼ်းတေၶိုတ်းၶၢဝ်းယၢမ်းမၼ်းဢိတ်းၼိုင်ႈ၊ ၵူၺ်းၵႃႈ တေၶိုတ်းဢမ်ႇၶိုတ်းၼၼ်ႉ ယင်းပႆႇႁူႉလႆႈ- ဝႃႈၼႆ။

ဢၼ်လႆႈမႃးတူၵ်းလူင်းၵၼ်သေ တႄႇႁဵတ်းၵၢၼ်မႃးမိူဝ်ႈဝၼ်းတီႈ 16/05/2015 ၼႆႉ လုၵ်ႉတီႈပၢင်ၵုမ် မိူဝ်ႈဝၼ်းတီႈ 09/05/2015 ဢၼ်ၸတ်းတီႈ ႁူင်းႁႅမ်းဢိၼ်းယႃးလဵၵ်ႊ (Inya Lake Hotel) ။ မိူဝ်ႈပၢင်ၵုမ်ၼၼ်ႉ မီးၵူၼ်းၶဝ်ႈႁူမ်ႈတင်းမူတ်း 152 ၵေႃႉ။ ၼႂ်းၼၼ်ႉ မီးၽွင်းလူင်ၾၢႆႇလူင်ပွင်ၸိုင်ႈၶဝ်၊ ၽူႈတႅၼ်းပႃႊတီႊၵၢၼ်မိူင်း 64 ပႃႊတီႊ၊ ၸုမ်းယိပ်းၵွင်ႈ 7 ၸုမ်း၊ မီးၸုမ်း CSO လၢႆၸုမ်းၶဝ်ႈႁူမ်ႈ။ ဢၼ်ႁပ်ႉႁဵတ်းၸဝ်ႈႁိူၼ်းၸတ်းပၢင်ၵုမ် ပဵၼ်ၸုမ်းယိပ်းၵွင်ႈ 4 ၸုမ်းလႄႈ ပႃႊတီႊၵၢၼ်မိူင်း 55 ပႃႊတီႊ ဢၼ်လူင်းလၢႆးမိုဝ်း DoC (Deed of Commitment) တင်းၸွမ်ၸိုင်ႈ မိူဝ်ႈဝၼ်းတီႈ 12/02/2015 ။ ၼႂ်း DoC ၼၼ်ႉ ၸွမ်ၸိုင်ႈ ပၼ်ၵႂၢမ်းမၼ်ႈၵတိဝႆႉဝႃႈ- ၸူဝ်ႈပႆႇထိုင်ၵၢၼ်လိူၵ်ႈတင်ႈၼႆႉ ႁႂ်ႈၸတ်းလႆႈပၢင်ဢုပ်ႇဢူဝ်းၵၢၼ်မိူင်း- ၼႆယဝ်ႉ။

ၼႂ်းပၢင်ၵုမ် ဝၼ်းတီႈ 09/05/2015 ၼၼ်ႉ မီးၵၢၼ်တူၵ်ႇၵၢဝ်ႇလၢတ်ႈထိုင်လွင်ႈ DoC ၼႆႉ။ ၼႂ်းပၢင်ၵုမ်ၼၼ်ႉ ၶဝ်လၢတ်ႈဝႆႉဝႃႈ- ဢၼ်တေႁဵတ်းယူင်ႉၶၢပ်ႈၵႂႃႇၼႆႉ ဢမ်ႇမီးဢဵၼ်းဢၢၼ်း တႃႇတေယႃႉ DoC လႃးလႃး၊ ပဵၼ်တႃႇတေၵႂႃႇၵမ်ႉၸွႆႈ NCA ၼၼ်ႉၵူၺ်း- ဝႃႈၼႆ။

ဢၼ်လႆႈသပ်းလႅင်း လၢတ်ႈၼႄၼင်ႇၼႆၼႆႉ ၵွပ်ႈမီးသဵင်ဢွၵ်ႇမႃးဝႃႈ ၽွင်းယၢမ်းဢၼ်ယူင်ႉၶၢပ်ႈ NCA ယင်းပႆႇယဝ်ႉတူဝ်ႈသေ မႃးၶဵၼ်ႇတႅမ်ႈယူင်ႉၶၢပ်ႈမိူဝ်ႈလဵဝ်ၵၼ်ၼႆႉ မိူၼ်ၵၼ်တင်းယႃႉၵၼ်ၵူၺ်း- ၼႆယဝ်ႉ။

ၼႂ်းပၢင်ၵုမ်လၢတ်ႈပႃးဝႃႈ- တင်ႈတႄႇဢဝ်လိူၼ် သႅပ်ႊထႅမ်ႊၿိူဝ်ႊ (2015) ၵႂႃႇတေႃႇထိုင်လိူၼ်မၢတ်ႊၶျ် (2016) ၼႂ်းၶၢဝ်းတၢင်း 7 လိူၼ်ၼႆႉ၊ တေမီးၵၢၼ်လိူၵ်ႈတင်ႈသေ ၸင်ႇၵွႆႈတင်ႈလႆႈလူင်ပွင်ၸိုင်ႈမႂ်ႇ။ ပေႃးဝႃႈဢမ်ႇႁဵတ်းဝႆႉထႃႈဢွၼ်တၢင်း ၼႂ်းၶၢဝ်းတၢင်း 7 လိူၼ်ၼႆႉ ၸၢင်ႈပဝ်ႇၸၢင်ႈႁၢမ်း၊ ပေႃးထိုင် 7 လိူၼ်ယဝ်ႉ ၸၢင်ႈလႆႈတႄႇၶိုၼ်းမႂ်ႇမႂ်ႇ (ၵၶင) လူးၵွၼ်ႇ။ ၼႂ်းပၢင်ၵုမ်ၼႆႉ လၢႆၵေႃႉ ပႃးၸဵမ်ဢူးၸူဝ်းတဵင်း ၽွင်းလူင်လုမ်းၸွမ်ၸိုင်ႈ ၵေႃႈလၢတ်ႈဝႃႈ- ၼႂ်းၶၢဝ်းတၢင်း 7 လိူၼ်ၼႆႉ ယႃႇႁႂ်ႈလႆႈပဝ်ႇလႆႈႁၢမ်းၼၼ်ႉ ႁဝ်းထုၵ်ႇလႆႈဢုၼ်ႇၶိူင်ႈ ၶၵ်ႉၵၢၼ်ငမ်းယဵၼ်ဝႆႉ။ ပေႃးၸိူင်ႉၼၼ် 7 လိူၼ်ၼႆႉ မၼ်းတေဢမ်ႇလႆႈပဝ်ႇလႆႈႁၢမ်း- ဝႃႈၼႆ။

ၵဵဝ်ႇၵပ်းလူၺ်ႈလွင်ႈၼႆႉ မိူဝ်ႈဝၼ်းတီႈ 15/05/2015 မီးၵၢၼ်ၸတ်းႁဵတ်းပၢင်ၵုမ်လူင် (The Economist Myanmar Summit) ၊ မီးၵၢၼ်ထတ်းသၢင်ဝႃႈ- သင်ၸိူဝ်ႉဝႃႈ ထိုင်ၵၢၼ်လိူၵ်ႈတင်ႈယဝ်ႉ ယင်းပႆႇလႆႈ လူင်းလၢႆးမိုဝ်း NCA ၼႆ မၼ်းပွင်ႇဝႃႈ ပိူင်တိုဝ်းၵမ်သိုၵ်း CoC (Code of Conduct) ၵေႃႈဢမ်ႇမီး၊ ၵၢၼ်ပႂ်ႉတူၺ်းၵၢၼ်ၵိုတ်းယိုဝ်း JMC (Joint Monitoring of Ceasefire) ၵေႃႈဢမ်ႇမီး။ ပေႃးပဵၼ်ၸိူင်ႉၼၼ် မၼ်းပွင်ႇဝႃႈ ၼႂ်းၶၢဝ်းတၢင်း 7 လိူၼ်ၼႆႉ ၼႂ်းမိူင်းၸၢင်ႈပဵၼ်သိုၵ်း တိုၵ်းတေႃးၵၼ်။ ပေႃးဝႃႈယိုဝ်းၵၼ်ယဝ်ႉ လိူၼ်မၢတ်ႊၶျ် (2016) လူင်ပွင်ၸိုင်ႈမႂ်ႇ ၶိုၼ်ႈမႃးယဝ်ႉသေ ၸင်ႇမႃးၵုမ်းၶိုၼ်းၸိုင် မၼ်းတေဢမ်ႇငၢႆႈ။

ယွၼ်ႉပိူဝ်ႈၼၼ် လၢႆၵေႃႉလၢႆၾၢႆႇထတ်းသၢင်ဝႃႈ ဢၼ်မႃးၸတ်းပၢင်ႁူပ်ႉထူပ်းဢုပ်ႇဢူဝ်း ဝၼ်းတီႈ 16/05/2015 သေ တေၶတ်းၸႂ်မႃးႁူမ်ႈယူင်ႉၶၢပ်ႈ ဢၼ်ၶဝ်လၢႆမူႇၸုမ်းၶဵၼ်ႇတႅမ်ႈဝႆႉၼၼ်ႉ မၼ်းသၢင်ႇထုၵ်ႇယဝ်ႉ- ဝႃႈၼႆ။




 
© 2012 All Rights Reserved | Asean Celebrity | Fonts @ AtFonts | Free Templates