ၶွင်ႊသီႊဢဝ်ၶိုၼ်းၸိုင်ႈတႆး (RCSS) တေဢမ်ႇၶဝ်ႈႁူမ်ႈ ပၢင်ၵုမ်လူင်ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း NCCT ဢၼ်တေၸတ်းႁဵတ်းတီႈ ၼႃႈလိၼ်ၵုမ်းၵမ် ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) လေႃႇၶီးလႃႇ ။

ဝၼ်းတီႈ 2-6/6/2015 တေထိုင်ၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း NCCT ၶဝ်တေၸတ်းႁဵတ်းပၢင်ၵုမ် တီႈလေႃႇၶီးလႃႇလႄႈ တေႁၢႆးငၢၼ်းၼႄၵၼ်ၶိုၼ်း လွင်ႈပိူင်ယုၵ်းယၢင်ႇ (NCA) တႃႇလူင်းလၢႆး မိုဝ်းပတ်ႉပိုၼ်ႉတူဝ်ႈမိူင်း၊ ႁၢင်ႈႁႅၼ်းတႃႇလူင်းလၢႆးမိုဝ်း၊ ႁၢင်ႈႁႅၼ်းတႃႇ ယုၵ်းယၢင်ႇၶွပ်ႇယူင်ႉ ဢၼ်တေဢုပ်ႇ ဢူဝ်းၵၢၼ်မိူင်း ဝၢႆးလင်ၵိုတ်းတိုၵ်းတူဝ်မိူင်း၊ ဢုပ်ႇဢူဝ်းၶိုၼ်းလွင်ႈပၢင်ၵုမ်လူင် ပၢင်သၢင်း ။

ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- “ၸွမ်းၼင်ႇၶေႃႈ တႅပ်းတတ်းၼႂ်းငဝ်ႈငုၼ်းႁဝ်းၶႃႈမီးတႄႉ ၶၢဝ်းယၢမ်းမိူဝ်ႈလဵဝ်ၼႆႉ ႁဝ်းၶႃႈဢမ်ႇတူဝ်ႈတၼ်းလႄႈ တေဢမ်ႇၵႂႃႇၶဝ်ႈႁူမ်ႈယဝ်ႉၼႆ လႆႈတႅမ်ႈလိၵ်ႈတွပ်ႇၵႂႃႇပၼ်ၶဝ်ၶိုၼ်းယဝ်ႉ” - ဝႃႈၼႆ။

ပၢင်ၵုမ်လေႃႇၶီးလႃႇၵမ်းၼႆႉ လႆႈယိၼ်းဝႃႈ ၽူႈဢွၼ်ႁူဝ်ၸုမ်းယိပ်းၵွင်ႈၵၢင်လုၵ်ႉၽိုၼ်ႉၶဝ်တေၶဝ်ႈႁူမ်ႈ မွၵ်ႈထိုင် 22 ၸုမ်း။ ၼိုင်ႈၸုမ်းလႂ် 5 ၵေႃႉ။

ဝၢႆးၶွတ်ႇၽွတ်ႈၸုမ်းၵပ်းသၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်း တီႈလၢႆႇၸႃႇ မိူဝ်ႈ ပီ 2013 လိူၼ်ၼူဝ်ႊဝႅမ်ႊၿိူဝ်ႊ။ ဝၢႆးၼၼ်ႉ ၸတ်းႁဵတ်း တီႈလေႃႇၶီးလႃႇ မိူဝ်ႈပီ 2014  လိူၼ်ၵျၼ်ႊၼိဝ်ႊရီႊ ဝၼ်းတီႈ 20 -22 ။ ပၢင်ၵုမ်ဢၼ် ၸတ်းႁဵတ်းၵမ်းၼႆႉ ပဵၼ်ပၢင်ၵုမ်လူင် NCCT ပွၵ်ႈၵမ်းသၢမ် ၼႆၵေႃႈဝႃႈလႆႈ။

ၶွင်ႊသီႊဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး ၼႆႉ ဢမ်ႇၸႂ်ႈလုၵ်ႈၸုမ်း NCCT ။ ၵူၺ်းၵႃႈ ပဵၼ်ဢူၺ်းလီၵၼ် တင်း ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ၊ ၸုမ်းဢၼ်ၵႆႉၶဝ်ႈဢွၵ်ႇၵၼ်၊ လႆႈထုၵ်ႇ မၢင်မူႇမၢင်ၸုမ်း ၼႄးဝႃႈ ၸမ်ၸႂ်လူင်ပွင်ၸိုင်ႈ မၢၼ်ႈ တင်းသွင်ၸုမ်း။

လုၵ်ႈၸုမ်း NCCT တင်းမူတ်းမီး 16 ၸုမ်း၊ ၼႂ်းၼၼ်ႉ ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးၵေႃႈၶဝ်ႈ ပႃးဝႆႉၸုမ်းၼိုင်ႈ။