ပႃႊတီႊသိူဝ်ၽိူၵ်ႇ ၸတ်းႁဵတ်းပၢင်ႁူပ်ႉထူပ်း ၵူၼ်းမိူင်း ဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း၊ ၵပ်းၵၢႆႇလွင်ႈ သုၼ်ႇလႆႈသုၼ်ႇပဵၼ်ၵူၼ်းမိူင်း ႁႂ်ႈမီးသုၼ်ႇလႆႈ တွတ်ႈၶႅပ်းၵၢင်ၸႂ်ၵူႈၵေႃႉ ။

ဝၼ်းတီႈ 27/06/2015 ၶၢဝ်းယၢမ်း 12.00 မူင်း ထိုင် 15.00 မူင်း၊ ပႃႊတီႊသိူဝ်ၽိူၵ်ႇ (SNDP) ၸတ်းႁဵတ်းပၢင်ႁူပ်ႉထူပ်းၵူၼ်းမိူင်း တီႈႁူင်းႁေႃးတႆးလိုဝ်ႉ ဝၢၼ်ႈၼွင်ၶမ်း၊ ပွၵ်ႉ(3)၊ ဝဵင်းၵဵင်းတုင် ၸိုင်ႈတႆးပွတ်းဢွၵ်ႇ။ ၽူႈဢွၼ်ႁူဝ်ၼမ်းၼႃႈၸတ်းႁဵတ်း ပဵၼ်ႁူဝ်ပဝ်ႈသိူဝ်ၽိူၵ်ႇ ၵဵင်းတုင် လုင်းယွတ်ႈႁွင်၊ ၽူႈပွင်ၵၢၼ်ငဝ်ႈငုၼ်းပႃႊတီႊ ၸၢႆးသိူဝ်ႁၢၼ်လႄႈ လုင်းၸၢႆးဝုၼ်း ၵၢဝ်ႇလၢတ်ႈသပ်းလႅင်း လွင်ႈတွတ်ႈၶႅပ်းၵၢင်ၸႂ် ႁႂ်ႈၵူၼ်းမိူင်းမီးသုၼ်ႇလႆႈ တွတ်ႈမိူၼ်ၵၼ်ၵူႈၵေႃႉ။ ယွၼ်ႉၵွပ်ႈ ဢၼ်ၾၢႆႇၶွမ်ႊမတီႊပၢင်လိူၵ်ႈတင်ႈ ပိုၼ်ၽၢဝ်ႇဢွၵ်ႇမႃးၸိုဝ်ႈ ၵူၼ်းမိူင်းၽိတ်းဝႆႉၼမ်၊  ၸင်ႇလႆႈဝွၵ်ႇၸိူၼ်း (ၽိတ်ႈမွၵ်ႇ) ႁွင်ႉပူႇၵၢင်ႉ၊ ပူႇၵႄႇဝၢၼ်း/ဢိူင်ႇ မႃးၶဝ်ႈႁူမ်ႈ ။


ၽူႈပွင်ၵၢၼ်ၼႂ်းပႃႊတီႊသိူဝ်ၽိူၵ်ႇ ငဝ်ႈငုၼ်းၵိင်ႇၽႄၵဵင်းတုင် ၸၢႆးဝုၼ်းတိပ်ႉလၢတ်ႈဝႃႈ- ပုၼ်ႈတႃႇၵူၼ်းမိူင်း တေလႆႈတွတ်ႈၶႅပ်းၵၢင်ၸႂ်ၵၼ်တင်းမူတ်း၊ ဢမ်ႇၶႂ်ႈႁႂ်ႈၵူၼ်းမိူင်း လႆႈႁၢမ်းႁႅၵ်းသုၼ်ႇတွတ်ႈၶႅပ်းၵၢင်ၸႂ်ၼၼ်ႉ  ၸင်ႇလႆႈပိုတ်ႇလၢတ်ႈၸီႉတၢင်း ႁႂ်ႈၵူၼ်းမိူင်း ၵႂႃႇတူၺ်းသၢႆမၢႆၸိုဝ်ႈၸဝ်ႈၵဝ်ႇ၊ သင်ဝႃႈမၼ်းၽိတ်းၼႆ ႁႂ်ႈၵႂႃႇလၢတ်ႈတီႈပူႇၵၢင်ႉ/ၵႄႇ ၸွႆႈၵၼ်သေမူၼ်ႉမႄးပၼ်။


သိုပ်ႇလၢတ်ႈထႅင်ႈဝႃႈ ဢၼ်တေထိုင်မႃးပၢင်လိူၵ်ႈတင်ႈၼႆႉ မၼ်းၸမ်မႃးပူၼ်ႉတီႈယဝ်ႉလႄႈ ၸင်ႇလႆႈဝွၵ်ႇၸိူၼ်း (ၽိတ်ႈမွၵ်ႇ) မႃး ႁူယိၼ်း ဢမ်ႇၸႂ်ႈဝႃႈပဵၼ်လုၵ်ႈၸုမ်းပႃႊတီႊသိူဝ်ၽိူၵ်ႇ ပူႇၵၢင်ႉ၊ ပူႇၵႄႇ ၽူႈယႂ်ႇၵူၼ်းလူင်ၼႂ်းဝၢၼ်ႈ /ဢိူင်ႇ ပွၵ်ႉၽႂ်မၼ်း တႃႇတေၸွႆႈမႄးထွၼ်/ ထႅမ်ၸိုဝ်ႈၵူၼ်းဝၢၼ်ႈ၊ ဢိူင်ႇ ၽႂ်မၼ်း ဝႃႈၼႆ။


ပူႇၵၢင်ႉ၊ ပူႇၵႄႇၽူႈယႂ်ႇၵူၼ်းလူင်ၼႂ်းဝၢၼ်ႈ မႃးၶိုၼ်ႈႁွတ်ႈ 142 ၵေႃႉ။ လုမ်းပႃႊတီႊသိူဝ်ၽိူၵ်ႇ ဢၼ်လႆႈပိုတ်ႇၵႂႃႇၼႂ်း တူင်ႇဝဵင်းၵဵင်းတုင်မီး 10 တီႈ၊ ၼႂ်းဝဵင်းၵဵင်းတုင် ပိုတ်ႇဝႆႉပွၵ်ႉ 3 ၼိုင်ႈတီႈ၊ ၼႂ်းဢိူင်ႇသမ်ႉ 9 တီႈ၊ မိူၼ်ၼႂ်းဢိူင်ႇသမ်ႉ ဢၼ်လႆႈပိုတ်ႇၵႂႃႇ 1. ဢိူင်ႇမိူင်းပၵ်ႉ၊ 2. ဢိူင်ႇမိူင်းၶွၼ်၊ 3. ဢိူင်ႇလွႆလူင်၊ 4.ဢိူင်ႇယၢင်းလေႃး၊ 5. ဢိူင်ႇမိူင်းလင်း၊ 6. ဢိူင်ႇမိူင်းၸဵမ်း၊ 7. ဢိူင်ႇမိူင်းလၢပ်ႈ၊ 8. ဢိူင်ႇယၢင်းၵဵင် ၵိုတ်းထႅင်ႈ 1 ဢိူင်ႇ။