ပၢင်သွၼ်ၵၢၼ်သူင်ႇၶႅၵ်ႇ ထုင်ႉပွတ်းဢွၵ်ႇၶူင်း ၸတ်းႁဵတ်းတီႈ ဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ပဵၼ်ပွၵ်ႈၵမ်းတီႈ (1)၊ ၵဵဝ်ႇၵပ်း ၵၢၼ်ဢႅဝ်ႇတွင်ႈတဵဝ်း တေလႆႈႁဵတ်းၸိူင်ႉႁိုဝ်၊ မီးၵူၼ်းမႃးၶဝ်ႈႁူမ်ႈတင်းၼမ်။

ဝၼ်းတီႈ 26/06/2015 ပွႆးလူင်းပၢင်သွၼ် ၸတ်းႁဵတ်းတီႈ ႁူင်းလိုဝ်ႈသဝ်းမၢႆ (1) ဝဵင်းၵဵင်းတုင် ၸိုင်ႈတႆးပွတ်းဢွၵ်ႇ၊ ပၢင်သွၼ်ၼႆႉ ၵဵဝ်ႇၵပ်းၵၢၼ်ပႃးၶႅၵ်ႇဢႅဝ်ႇတွင်ႈတဵဝ်း ႁပ်ႉၶႅၵ်ႇဢႅဝ်ႇတွင်ႈတဵဝ်း တေလႆႈႁဵတ်းၸိူင်ႉႁိုဝ်၊ ယဝ်ႉၵေႃႈ သွၼ်ပၼ်ပႃးထႅင်ႈ လွင်ႈၵူတ်းမၢႆ(မၢႆမီႈ)၊ ၽႃသႃ၊ ပႃႇမႆႉ(သိင်ႇဝႅတ်ႇလွမ်ႉ)၊ ၵူတ်းမၢႆ(မၢႆမီႈ)၊ ပၢႆးယူႇလီ၊ ပၢႆးပၺ်ၺႃ၊ မီးၵူၼ်းမႃးၶဝ်ႈႁူမ်ႈ 170 ၵေႃႉ။

ၽူႈၶဝ်ႈႁူမ်ႈပၢင်သွၼ်ၵေႃႉၼိုင်ႈ လၢတ်ႈဝႃႈ တင်းမူတ်းမီးၵူၼ်းမႃးၶဝ်ႈႁူမ်ႈ 170 ၵေႃႉ ပဵၼ်ၵူၼ်းမိူင်းတင်းဝဵင်းလိူဝ်ႇ၊ တႃႈၵုင်ႈ၊ မိူင်းၶျၢင်း၊ ဝဵင်းၵဵင်းတုင်၊ ဝဵင်းတႃႈၶီႈလဵၵ်း ၸဵမ်ၸိူဝ်းၼႆႉ၊ ဢၼ်လႆႈဝႂ်ဢွင်ႇ တႃႇတေပဵၼ် ၽူႈပႃးၶႅၵ်ႇဢႅဝ်ႇတွင်ႈတဵဝ်း ဢၼ်တွပ်ႇလႆႈၵႂႃႇ 103 ၵေႃႉ။


သိုပ်ႇလၢတ်ႈထႅင်ႈဝႃႈ ဝႂ်ပူၼ်ႉၸၼ်ႉၼႆႉ လႆႈဢၼုၺၢတ်ႉႁဵတ်းၵူၼ်း ပႃးၶႅၵ်ႇဢႅဝ်ႇတွင်ႈတဵဝ်း တၢင်းပွတ်းဢွၵ်ႇၵူၺ်း။ ပေႃးၵူၼ်းဢမ်ႇမီးဝႂ်ဢၼုၺၢတ်ႉ(ၶႂၢင်ႉ)ၸိုင်၊ သင်တိၺွပ်းလႆႈ တေပၼ်တူတ်ႈ(တၢမ်ႇ)ၶွၵ်ႈ 3 ပီ၊ မႂ်ငိုၼ်း 50,000 ပျႃး။ မိူဝ်ႈပီ 2012 ၼၼ်ႉ ဢၼ်လႆႈၸတ်းႁဵတ်းပၢင်သွၼ် ၵပ်းၵၢႆႇလွင်ႈၵၢၼ်ပႃးၶႅၵ်ႇဢႅဝ်ႇတွင်ႈတဵဝ်းၼႆႉ လႆႈဝႂ်ဢၼုၺၢတ်ႈႁဵတ်းသေတႃႉ။ ၵူၺ်းၵႃႈ ဢမ်ႇလႆႈဢၼုၺၢတ်ႈတႃႇတေလႆႈႁဵတ်းထႅင်ႈ၊ ယဝ်ႉၵေႃႈ ၸိုဝ်ႈသၢႆမၢႆၼႂ်းလူင်ပွင်ၸိုင်ႈၵေႃႈဢမ်ႇမီး၊  ပဵၼ်ၵူၼ်းတၢင်းၼွၵ်ႈၶဝ်လၵ်းႁဵတ်းႁႃၵိၼ်ၵူၺ်း ဝႃႈၼႆ။
ပၢင်သွၼ်ၼႆႉ တႄႇၶၢဝ်းယၢမ်း 08:00 မူင်းထိုင် 17:00 မူင်းလႆႈပိုတ်ႇၵႂႃႇသွၼ်ၶၢဝ်းတၢင်း 20 ဝၼ်းပၢႆ၊ ဢွင်ႈတီႈသွၼ်ပဵၼ်တီႈ ႁူင်းႁဵၼ်းၸၼ်ႉၸွမ်ၵဵင်းတုင်၊ ဝၼ်းလူင်းပၢင်သွၼ်သမ်ႉ ၸတ်းႁဵတ်းတီႈ ႁူင်းလိုဝ်ႈသဝ်းမၢႆ (1) ဝဵင်းၵဵင်းတုင် ၼႆယဝ်ႉ။