လုင်းၸၢႆးဢၢႆႈပဝ်း တေဝၢင်းၽႃႈတၼ်းႁဵင်း ၽွင်းလူင်သေ ၶဝ်ႈၶႄႉၶႅင်ႇၽူႈတႅၼ်း သၽႃးၸိူဝ်ႉၸၢတ်ႈ



ပၢင်လိူၵ်ႈတင်ႈပီ 2015 ဢၼ်တေၸတ်းႁဵတ်းၼႆႉ ႁူဝ်ပဝ်ႈပႃႊတီႊသိူဝ်ၽိူၵ်ႇ (SNDP) လုင်းၸၢႆးဢၢႆႈပဝ်း တေပိုၼ်ႉပွႆႇဝၢင်းၽႃႈ တၼ်းႁဵင်းၼႃႈတီႈၽွင်းလူင်သေ တေၶဝ်ႈၶႄႉၶႅင်ႇလိူၵ်ႈ ၽွင်းတႅၼ်းသၽႃးၸိူဝ်ႉၸၢတ်ႈ။


လုင်းၸၢႆးဢၢႆႈပဝ်း လၢတ်ႈဝႃႈ- ၵဝ်ၶႃႈဢႃယု 70 ပၢႆယဝ်ႉ တေလႆႈပၼ်တီႈယူႇၵူၼ်းၼုမ်ႇၶဝ်၊ တေဢမ်ႇႁဵတ်း ၽွင်းလူင်ထႅင်ႈယဝ်ႉ။ ၵူၺ်းၵႃႈ ၵဝ်ၶႃႈတေၶဝ်ႈၶႄႉၶႅင်ႇ ၼႂ်းၽူႈတႅၼ်းသၽႃးၸိူဝ်ႉၸၢတ်ႈ- ဝႃႈၼႆ။

ၵဵဝ်ႇၵပ်းလွင်ႈ ပႃႊတီႊတႆးတေႁူမ်ႈၵၼ်ၼၼ်ႉ လုင်းၸၢႆးဢၢႆႈပဝ်း လၢတ်ႈဝႃႈ- ပႃႊတီႊႁူဝ်သိူဝ် (SNLD) ငဝ်ႈငုၼ်းၻီႊမူဝ်ႊၶရေႊသီႊ ၸိူဝ်ႉၶိူဝ်းတႆး တင်းပႃႊတီႊသိူဝ်ၽိူၵ်ႇ (SNDP) ၻီႊမူဝ်ႊၶရႅတ်ႊတိၵ်ႉၶ် ပႃႊတီႊ ၸၢဝ်းၶိူဝ်းတႆး ႁဝ်းၶႃႈၼႆႉ ပေႃႊလသီႊ ဢမ်ႇမိူၼ်ၵၼ်လႄႈ တႃႇႁူမ်ႈႁွမ်းၵၼ်ၼႆႉ တေယၢပ်ႇဢိတ်းၼိုင်ႈ။ ဝၢႆးလင်ပၢင်လိူၵ်ႈတင်ႈပီ 2015 ယဝ်ႉ သင်ဝႃႈႁဝ်းၶႃႈလႆႈ ၶွတ်ႇၽွတ်ႈ လူင်ပွင်ၸိုင်ႈမိူင်းတႆး မႃးၸိုင် ဢၼ်ႁဝ်းၶႃႈတေႁဵတ်းဢွၼ်တၢင်းသုတ်းၼႆႉ တေၵႄႈလိတ်ႈပၼ်ႁႃလိၼ်သူၼ်ႁႆႈၼႃးၵူၼ်းမိူင်း ဢၼ်ထုၵ်ႇယိုတ်းၵႂႃႇ။ ၵွပ်ႈဝႃႈ ပၼ်ႁႃၼႂ်းမိူင်းတႆး ဢၼ်ၼမ်လိူဝ်ပိူၼ်ႈၼႆႉ ပဵၼ်လိၼ်သူၼ်ႁႆႈၼႃး ဢၼ်ထုၵ်ႇယိုတ်း၊ တေၵႄႈလိတ်ႈ ပၼ်ႁႃဢၼ်ၼႆႉ ဢွၼ်တၢင်း- ဝႃႈၼႆ။

ၼႂ်းပီ 2015 ၼႆႉ ပႃႊတီႊသိူဝ်ၽိူၵ်ႇ တေသူင်ႇၶဝ်ႈၶႄႉၶႅင်ႇလူင်းလိူၵ်ႈၽူႈတႅၼ်း 200 ၵေႃႉ ၼႂ်းၼၼ်ႉ ပႃးၼၢင်းယိင်း 30 ၵေႃႉ။

ပႃႊတီႊသိူဝ်ၽိူၵ်ႇၼႆႉ တေၶဝ်ႈၶႄႉၶႅင်ႇ ၼႂ်း 63 ၸႄႈဝဵင်းလႄႈၶဝ်ႈၶႄႉၶႅင်ႇ ၽူႈတႅၼ်းၼႂ်းသၽႃးၵူၼ်းမိူင်း၊ သၽႃးၸိူဝ်ႉၸၢတ်ႈ၊ သၽႃးၸႄႈမိူင်း ႁိုဝ် တိူင်း။ လိူဝ်သေၼၼ်ႉ တီႈတၼ်းႁဵင်းၽွင်းလူင် ၵဵဝ်ႇၵပ်းၸၢဝ်းၶိူဝ်း ဢၼ်ပဵၼ်ဢႃးၶႃႇ၊ လႃးႁူႇ၊ လီႉသူး၊ မၢၼ်ႈ၊ ၶၢင် တီႈၸိူဝ်းၼႆႉၵေႃႈ တေၶဝ်ႈၶေႉၶႅင်ႇလိူၵ်ႈတင်ႈၵႂႃႇ- ၼႆယဝ်ႉ။




 
© 2012 All Rights Reserved | Asean Celebrity | Fonts @ AtFonts | Free Templates