ပလိၵ်ႈမၢၼ်ႈ ယိုတ်းလႆႈယႃႈမဝ်းၵမ် ၼပ်ႉႁူဝ်သႅၼ်မဵတ်ႉ တီႈမိူင်းၵူဝ်း



ပလိၵ်ႈမၢၼ်ႈ ဢိၵ်ႇၾၢႆႇၵဵဝ်ႇၶွင်ႈ ႁူမ်ႈၵၼ်ၵူတ်ႇၶူၼ်ႉသွၵ်ႈ သူၼ်ယၢင်တင် (ရႃႊပႃႊ)  တီႈမိူင်းၵူဝ်း ၸႄႈဝဵင်း တႃႈၶီႈလဵၵ်း ၸိုင်ႈတႆးပွတ်းဢွၵ်ႇ၊ တီႉလႆႈ ယႃႈမႃႉ လႄႈၶိူင်ႈႁဵတ်းယႃႈမႃႉ ။


ဝၼ်းတီႈ 25 လိူၼ်ၵျူႊလၢႆႊ 2015  ပလိၵ်ႈမၢၼ်ႈ ၊ ၾၢႆႇၽဵဝ်ႈမူၺ်ႉယႃႈမဝ်းၵမ် တင်းသိုၵ်းမၢၼ်ႈ ႁူမ်ႈၵၼ်ၶဝ်ႈၵူတ်ႇထတ်း သွၵ်ႈၶူၼ်ႉယႃႈၼႂ်းသူၼ်ယၢင်တင်(ရႃႊပႃႊ)ၵျၽူး တီႈဝၢၼ်ႈမႄႈလဵတ်ႇပႃႇၵေႃႇ ၊ မိူင်းၵူဝ်း ႁၢင်ႇယၢၼ်တူဝ်မိူင်း တႃႈၶီႈလဵၵ်း 30 ၵီႊလူဝ်ႊမီႊတိူဝ်ႊ ၶဝ်ႈတဝ် တီႉၺွပ်းလႆႈ ၶိူင်ႈႁဵတ်းယႃႈမႃႉတင်းၼမ်။


ASTV ႁၢႆးငၢၼ်းၶၢဝ်ႇဝႃႈ  ၸဝ်ႈၼႃႈတီႈမၢၼ်ႈ ယင်းတီႉၺွပ်းလႆႈပႃးၵူၼ်းၼႂ်းထဵင်ၼၼ်ႉ 3 ၵေႃႉ။ 1 ၽႃးၽႃႇ ၊ 2.  ဢႃႊထူႊ ဢႃယု 40 ပီ (တင်းသွင်ၵေႃႉ ပဵၼ်ၵူၼ်း ဢၶႃႇ ) လႄႈ ၸၼ်သႅင် ဢႃယု 32 ပီ ပဵၼၼ်ၶၢင် ဢၼ်ပၢႆႈလွတ်ႈၵႂႃႇၼၼ်ႉတႄႉ ပဵၼ် တူဝ်ၵျၽူး လႄႈ ၵျၼီႊ ပဵၼ်ၸဝ်ႈသူၼ်။


ၵူတ်ႇၶူၼ်ႉယိုတ်းလႆႈယႃႈဢၢႆႉသ် 9 ၵီႊလူဝ်ႊၵရမ်ႊ ယႃႈမႃႉမဵတ်ႉသီၶွင်ႇ WY 6 မိုၼ်ႇပၢႆ၊ မဵတ်ႉသီလႅင် WY 7 မိုၼ်ႇပၢႆ၊  မဵတ်ႉသီၶဵဝ် WY  4 မိုၼ်ႇပၢႆ လိူဝ်ၼၼ်ႉယင်းမီး ၽွင်ယႃႈမႃႉသီၶၢဝ်  ၊ သီၶွင်ႇ ၊ ၵႃႊၾႄႊဢိၼ်ႊ ၊ ၽွင်သီၵမ်ႇ ၊ ၽွင်ၵၢဝ်း ၊ ၽွင်ၵၢဝ်းသီၶွင်ႇ ၊ သၢၼ်သႂ်ႇၵိၼ်ႇသႅဝ်ဢၢႆ၊ သၢႆယၢင်၊ ၶိူင်ႈတွၵ်ႇမဵတ်ႉယႃႈမႃႉ ၊ ၵႃးၼိုင်ႈလမ်း၊ ရူတ်ႉၶိူင်ႈ 1 လမ်း၊ ၵွင်ႈ ဢိၵ်ႇၶိူင်ႈၸႂ်ႉၶူဝ်းတိုဝ်း တွၼ်ႈတႃႇႁဵတ်းဢွၵ်ႇယႃႈမဝ်းၵမ်တင်းၼမ်တင်းလၢႆ။

ၸဝ်ႈၼႃႈတီႈၽဝ်ပႅတ်ႈ ထဵင်ဢၼ်ႁဵတ်းယႃႈမဝ်းၵမ်သေ တီႉၺွပ်းၵူၼ်း လႄႈယႃႈမဝ်းၵမ်ၵႂႃႇ ပိူဝ်ႈပၼ်တူတ်ႈ(တၢမ်ႇ) ဝႃႈၼႆ ။




 
© 2012 All Rights Reserved | Asean Celebrity | Fonts @ AtFonts | Free Templates