ၵေႃၵမ်ၵၢၼ်လႅၼ်လိၼ်ထႆး - မၢၼ်ႈ ႁူပ်ႉထူပ်း ဢုပ်ႇၵုမ်ၵၼ် တီႈတႃႈၶီႈလဵၵ်း ပွၵ်ႈတီႈ 83 ဢုပ်ႇဢူဝ်းပိူဝ်ႈလႅၵ်ႈလၢႆႈ ၶေႃႈမုလ်းၵၼ်လႄႈ ၵႄႈလိတ်ႈပၼ်ႁႃ ၸွမ်းလႅၼ်လိၼ် ။

ဝၼ်းတီႈ 30 လိူၼ်ၵျႃၼ်ႊ 2015 ႁွင်ႈၵၢၼ်ၶၢဝ်ႇ ASTV ႁၢႆးငၢၼ်းဝႃႈ ၶွမ်ႊမတီႊလႅၼ်လိၼ် TBC ၸတ်းႁဵတ်းပၢင်ၵုမ် ပွၵ်ႈၵမ်းတီႈ 83 တီႈႁူင်းႁႅမ်း သၢမ်မုၼ်းဢႃးၶႃႇၸႄႈတွၼ်ႈ တႃႈၶီႈလဵၵ်း ဢၼ်တေႃႇၼႃႈၵၼ်တၢင်း ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး။

တၢင်းၾၢႆႇ ထီႊၿီႊသီႊ (TBC) မၢၼ်ႈ လၢတ်ႈၼႂ်းပၢင်ၵုမ်ဝႃႈ ယၢမ်းလဵဝ်ၼႆႉ သိုၵ်းလူင်ပွင်ၸိုင်ႈမၢၼ်ႈ ဢမ်ႇလႆႈမီးပၢင်တိုၵ်းၵၼ်တင်းၸုမ်းယိပ်းၵွင်ႈၵၢင်ၸၢဝ်းၶိူဝ်းႁိမ်းလႅၼ်လိၼ် ဢၼ်မီးၶၢဝ်ႇ ဢွၵ်ႇမႃးၼၼ်ႉ ပဵၼ်ၶၢဝ်ႇလိုဝ်းၵူၺ်း ဝႃႈၼႆ။


ဝၢႆးၼၼ်ႉ ထီႊၿီႊသီႊ (TBC) တင်းသွင်ၾၢႆႇလႆႈဢွၼ်ၵၼ်လဝ်ႈယိုၼ်ႈလၢတ်ႈ လွင်ႈဢၼ်တေဢုပ်ႇၵုမ်ၵၼ် လႄႈၵႄႈလိတ်ႈပၼ်ႁႃၵႂႃႇ မိူၼ်ၼင်ႇၵၢၼ်ၵေႃႇသၢင်ႈၶုတ်းလိၼ် ၶုတ်းသၢႆး ထိုင်တီႈႁဵတ်းႁႂ်ႈတုမ်ႉတိူဝ်ႉ မႄႈၼမ်ႉသၢႆ ဢၼ်ပဵၼ်ၼႅဝ်းၶၼ်ႈ လႅၼ်လိၼ် တႆး -ထႆး လူႉၵွႆ။

တၢင်းၾၢႆႇမိူင်းထႆးၵေႃႈၸႅင်ႈဝႃႈ လႆႈထူပ်းႁၼ် ၵၢၼ်ၶုတ်းႁွင်ႈၼမ်ႉ၊ ထူမ်လိၼ် ၶဝ်ႈမႃးထိုင်မႄႈ ၼမ်ႉသၢႆ လၢႆတီႈမိူၼ်ၼင်ႇ တႃႈၵႃႇလမ်ႇ တေႃႇၼႃႈၵၼ်တင်းဝၢၼ်ႈမိူင်လႅင်တႂ်ႈ ၊ ဝၢၼ်ႈမႄႈသၢႆ ဢိူင်ႇဝဵင်းၾၢင်းၶမ်း ၸႄႈဝဵင်းမႄႈသၢႆၼၼ်ႉၵေႃႈ ယွၼ်းႁႂ်ႈ တၢင်းၵၢၼ် မိူင်းမၢၼ်ႈ ၵိုတ်း လႄႈႁႂ်ႈပဵၼ်ၸွမ်းၼင်ႇ ဢၼ်လႆႈတူၵ်းလူင်းၵၼ်ဝႆႉလွင်ႈမႄႈၼမ်ႉသၢႆ လႄႈမႄႈၼမ်ႉရူၵ်ႈ ။


လိူဝ်ၼၼ်ႉတွင်ႈထၢမ်လွင်ႈၶိုပ်ႈၼႃႈ ဢၼ်ၾၢႆႇထႆးယွၼ်းပိုတ်ႇလၢၼ်ႇတီႈ ၵိဝ်ႇၽႃဝွၵ်ႈ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ တေႃႇၼႃႈၵၼ်တၢင်း မိူင်းတူၼ် ၊ မိူင်းသၢတ်ႇ။

လိူဝ်ၼၼ်ႉတၢင်းၾၢႆႇမၢၼ်ႈ ယင်းလဝ်ႈလၢတ်ႈထႅင်ႈဝႃႈ တၢင်းႁွင်ႈၵၢၼ် ၾၢႆႇပႃႈၼိူဝ်ႁၼ်လီၵၢၼ် ၶုတ်းၼမ်ႉမႄႈသၢႆ တႃႇ15 ၵီႊလူဝ်ႊမီႊတိူဝ်ႊမဵတ်ႉ လႄႈၵၢၼ်တင်ႈၶိူင်ႈတိူၼ်းၾၢင်ႉ ၼမ်ႉထူမ်ႈ 3 တီႈ ၸင်ႇလႆႈယွၼ်းၶေႃႈတွပ်ႇၵွၼ်ႇတေၶဝ်ႈၶၢဝ်းၾူၼ်းၼႆႉ။ ႁူမ်ႈၵၼ်ၼႆႉ ယင်းယွၼ်းႁႂ်ႈသိုၵ်းထႆးဢၼ်တင်ႈထၢၼ်တပ်ႉမၢႆ 29 တီႈႁိမ်းႁွမ်းလွႆလၢင်းၼၼ်ႉၵေႃႈ ယွၼ်းႁႂ်ႈၶၶၢႆႉထွၼ်ဢွၵ်ႇပၼ် ၼႆယဝ်ႉ။

တၢင်းၾၢႆႇထႆးၵေႃႈ လဝ်ႈယိုၼ်ႈလၢတ်ႈယွၼ်းဝႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းဝႃႉ ဢၼ်တင်ႈထၢၼ်ပၵ်းသဝ်းတပ်ႉၸွမ်းလႅၼ်လိၼ် ထႆး - မၢၼ်ႈ ၼၼ်ႉၵေႃႈ ယွၼ်းႁႂ်ႈၶၢႆႉဢွၵ်ႇၵႆယၢၼ်လႅၼ်လိၼ်ပၼ် ၼႆယဝ်ႉ။     

မိူဝ်ႈပူၼ်ႉမႃးဢၼ်သိုၵ်းလူင်ပွင်ၸိုင်ႈလႄႈတပ်ႉသိုၵ်း ၵူဝ်းၵၢင်ႉ တီႈလၢဝ်ႇၵၢႆး လႅၼ်လိၼ်မၢၼ်ႈ - ၶႄႇ ၸွမ်းၼင်ႇလႆႈႁူႉဝႃႈ ၾိူင်ႊၵျႃႊသိူင်ႊ လႄႈၵူၼ်းၸမ်ၸႂ် ၽူႈၼမ်းၵူဝ်းၵၢင်ႉ လႆႈပၢႆႈၶဝ်ႈမႃး တၢင်းမႄႈသၢႆၼႆၼၼ်ႉၵေႃႈ ယွၼ်းတၢင်းႁူမ်ႈမိုဝ်ႈပိူဝ်ႈတႃႇတီႉၺွပ်းပၼ်တူတ်ႇ (တၢမ်ႇ)ၸွမ်းၼင်ႇၵူတ်းမၢႆ(မၢႆမီႈ)ၵႂႃႇၼႆယဝ်ႉ။

ပၢင်ၵုမ် TBC မႄႈသၢႆ လႄႈတႃႈၶီႈလဵၵ်းပွၵ်ႈၵမ်းတီႈ 83 ၼႆႉယင်းလႆႈဢုပ်ႇၵုမ်လွင်ႈ ပၼ်ႁႃၵၢၼ်ၵႂႃႇမႃး သူၸႂ်းပီႈၼွင်ႉ ၼႂ်းၵၢၼ်ၶၢမ်ႈလႅၼ်လိၼ် တၢင်းၾၢႆႇ မိူင်းမၢၼ်ႈၵေႃႈလၢတ်ႈဝႃႈ မိူဝ်ႈဝၼ်းတီႈ 16 လိူၼ်မေႊ 2540 လူင်ပွင်ၸိုင်ႈတင်းသွင်ၾၢႆႇလႆႈ မၵ်းမၼ်ႈႁူမ်ႈၵၼ်ဝႃႈ ႁႂ်ႈၵူၼ်းမိူင်းမၢၼ်ႈ ၸႂ်ႉပပ်ႉၶၢမ်ႈလႅၼ်လိၼ်ဢမ်ႇၼၼ် ၿေႃႊၻိူဝ်ႊၾၢတ်ႊ ၶဝ်ႈမိူင်းထႆးလႆႈထိုင်ၵဵင်းမႆႇ ၵူၼ်းမိူင်းထႆးၵေႃႈ ၶဝ်ႈလႆႈထိုင် ၵဵင်းတုင် ၵူၺ်းၵႃႈတေႃႇထိုင်ယၢမ်းလဵဝ်ၵူၼ်းမိူင်းမၢၼ်ႈယင်း တိုၵ်ႉလႆႈၸႂ်ႉၾၢတ်ႊသပွတ်ႊ လႄႈဝီႊသႃႊ ၼႂ်းၵၢၼ်ၶဝ်ႈထိုင်မိူင်းၵဵင်းမႆႇယူႇ။