ၽူႈတႅၼ်း ပႃႊတီႊ ႁူဝ်သိူဝ် ဝဵင်းမိူင်းယွင်း ၸႄႈတွၼ်ႈ တႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း တေၶဝ်ႈ လိူၵ်ႈတင်ႈ 3 တီႈၼင်ႈ ၽူႈတႅၼ်း သၽႃး ၸႄႈမိူင်း မိူင်းယွင်း ၶဵတ်ႇလိူၵ်ႈတင်ႈ မၢႆ 1 ၊ ၽူးတႅၼ်း သၽႃးၸႄႈမိူင်း မိူင်းယွင်း ၶဵတ်ႇလိူၵ်ႈတင်ႈ မၢႆ 2 လႄႈ ၽူႈတႅၼ်း သၽႃး ၵူၼ်းမိူင်းယွင်း တေၶဝ်ႈ ၶႄႉၶႅင်ႇ ၼႂ်းၸႄႈ မိူင်းယွင်း ။

ပၢင်လိူၵ်ႈတင်ႈ ဢၼ်တေ ထိုင်မႃးၼႂ်း ဝၼ်းတီႈ 08/11/2015 ၼႆႉ ပႃႊတီႊ ႁူဝ်သိူဝ် ဝဵင်းမိူင်းယွင်း ၸႄႈတွၼ်ႈ တႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း တေၶဝ်ႈလိူၵ်ႈတင်ႈ ၼႂ်းၸႄႈဝဵင်းမိူင်းယွင်း 3 တီႈၼင်ႈ ၽူႈတႅၼ်းသၽႃး ၸႄႈမိူင်း မိူင်းယွင်း ၶဵတ်ႇလိူၵ်ႈတင်ႈ မၢႆ 1 လုင်းၸၢႆးသႅင် ၊ ၽူႈတႅၼ်းသၽႃး ၸႄႈမိူင်း မိူင်းယွင်း ၶဵတ်ႇလိူၵ်ႈတင်ႈ မၢႆ 2 ၸၢႆးယသႅပ်ႉ လႄႈ ၽူႈတႅၼ်း ၵူၼ်းမိူင်း ၸၢႆးတၢၼ်းထုၼ်းဢူး ၶဝ်ၸဵမ် ၸိူဝ်းၼႆ တေၶဝ်ႈၶႄႉၶႅင်ႇ  ၼႆယဝ်ႉ ။


ႁူဝ်ပဝ်ႈ လုင်းၸၢႆးသႅင် လၢတ်ႈဝႃႈ - မိူဝ်ႈလဵဝ် လုၵ်ႈၸုမ်း ပႃႊတီႊႁဝ်း တင်းမူတ်း တေမီးမွၵ်ႈ 20,00 ၵေႃႉ လႄႈပိုတ်ႉလုမ်းမႃး တီႈၼႂ်းမိူင်းယွင်း လႄႈမိူင်းယု 2 ပီပၢႆယဝ်ႉ လုမ်း ႁူဝ်သိူဝ်ႁဝ်း ဢၼ်ပိုတ်ႇဝႆႉ တင်းမူတ်း မီး 8 တီႈ ၊ 1. ဝၢၼ်ႈႁူဝ်ယၢင်း ၊ 2. ဝၢၼ်ႈၼွင်ဢူၵ်း ၊ 3. ဝၢၼ်ႈပုင်ႇ ၊ 4. ဝၢၼ်ႈၵွင်း ၊ 5. မိူင်းလၢႆႈ ၊ 6. ဝၢၼ်ႈၼဵင်ႈ ၊ 7. ဝၢၼ်ႈမွမ်ႈ ပွၵ်ႉ(1) ၊ 8. မိူင်းယူႉ ဝႃႈၼႆ ။


ဝဵင်းမိူင်းယွင်းၼႆႉ တေမီး ပႃႊတီႊ ၵၢၼ်မိူင်း 6 ပႃႊတီႊ 1. လုင်းၸၢႆးသႅင် ႁူဝ်ပဝ်ႈ ပႃႊတီႊႁူဝ်သိူဝ် ၊ 2. လုင်းၸၢႆးၶမ်းသျိၵ်ႉ ႁူဝ်ပဝ်ႈ ပႃႊတီႊသိူဝ်ၽိူၵ်ႇ ၊ 3. ၸၢႆးထုၼ်းဢွင်ႇ ႁူဝ်ပဝ်ႈ ပႃႊတီႊ ၼူၵ်ႉယုင်း ၊ 4. ၸၢႆးဢွင်ႇၶမ်း ၽူႈၼမ်းၼႂ်း ပႃႊတီႊသၢင်ႇသီႈ ၊ 5. ဢူးပေႃႉလူႉ ႁူဝ်ပဝ်ႈ ပႃႊတီႊႁူင်းၶဝ်ႈ ၊ 6. ၸၢႆးၸၼ် ႁူဝ်ပဝ်ႈ တႅဝ်းႁူမ်ႈ ၻီႇမူဝ်ႇၶရႅတ်ႉတိၵ်ႉ ၸိူဝ်ႉၸၢတ်ႈ (NDF) ၸဵမ်ၸိူဝ်ႉၼႆႉ ။