သိုၵ်းမၢၼ်ႈ လမ်းယိုဝ်း သိုၵ်းတဢၢင်း TNLA ၼႂ်းၸႄႈဝဵင်း ၼမ်ႉသၼ်ႇ ၊ သိုၵ်းတဢၢင်း ဝႄႈ ဢမ်ႇလႆႈသေ ပဵၼ် ပၢင်တိုၵ်းၵၼ် ။ သိုၵ်းမၢၼ်ႈ ထႅမ်ႁႅင်းသိုၵ်း ၶဝ်ႈၼႂ်း ၸႄႈဝဵင်း ၼမ်ႉသၼ်ႇ ထႅင်ႈ ။

တင်ႈတႄႇ ဝၼ်းတီႈ 23 တေႃႇထိုင် 26/08/2015 တီႈၼႂ်း ၸႄႈဝဵင်း ၼမ်ႉသၼ်ႇၼၼ်ႉ ဢိင်ၼိူဝ် တပ်ႉသိုၵ်းမၢၼ်ႈ ၵူတ်ႇသွၵ်ႈသေႃႉ ႁႃလမ်းယိုဝ်း တပ်ႉသိုၵ်း ပူတ်းပွႆႇ ၸိူဝ်ႉၸၢတ်ႈ တဢၢင်း (TNLA)  တိၵ်းတိၵ်းသေ သွင်ၾၢႆႇ လႆႈပဵၼ် ပၢင်တိုၵ်းၵၼ် 4 ပွၵ်ႈ ။


ဢၼ်လႆႈပဵၼ် ပၢင်တိုၵ်းၼႆႉ ယွၼ်ႉသၢႆ သိုၵ်းမၢၼ်ႈ ပႃႈတႂ်ႈတပ်ႉ ၸုမ်းလူင် (တပ်ႉမ) 77 လမ်းယိုဝ်း တပ်ႉသိုၵ်း တဢၢင်း TNLA တပ်ႉၵွင် 434 ပႃႈတႂ်ႈ တပ်ႉၸုမ်း (တပ်ႉမႁႃ) 2 ။  ဢၼ်ပဵၼ် ပၢင်တိုၵ်းယူႇၸိူဝ်းၼႆႉ မၼ်းၸၢင်ႈ ၵပ်းၵၢႆႇတင်း လွင်ႈငမ်းယဵၼ် - TNLA လၢတ်ႈ ။


တႃႉပၢၼ်းလႃႉ ၾၢႆႇတိတ်းတေႃႇ ၼွၵ်ႈမိူင်း TNLA လၢတ်ႈဝႃႈ - “ ၾၢႆႇႁဝ်းၶႃႈတႄႉ ၼင်ႇႁိုဝ် တေပဵၼ်မႃး ၵၢၼ် ၵိုတ်းတိုၵ်း ပတ်းပိုၼ်ႉ တူဝ်ႈမိူင်းၼၼ်ႉ ႁဝ်းၶႃႈ ၶတ်းၸႂ်ယူႇ ၊ ၶတ်းၸႂ် လူတ်းယွမ်းတႃႇ တေဢမ်ႇပဵၼ် ပၢင်တိုၵ်း ။ ၵူၺ်းၵႃႈ ၾၢႆႇသိုၵ်းမၢၼ်ႈ သမ်ႉ ပေႃးဝႃႈ ႁဝ်းဝႄႈပၼ် ၶဝ်သမ်ႉ မႃးယူႇ ပုတ်ႈပၵ်းဢဝ် တီႈယူႇသေ ႁဵတ်းတပ်ႉ ပၢင်သဝ်း ၊ ယဝ်ႉၵေႃႈ လမ်းႁႃယိုဝ်း ႁဝ်းတိၵ်းတိၵ်း ။ ၵွပ်ႈၼၼ် ႁဝ်းၶႃႈၵေႃႈ ဝႄႈဢမ်ႇလႆႈ လႄႈ လႆႈပဵၼ် ပၢင်တိုၵ်းၵၼ် ”- ဝႃႈၼႆ ။


ပၢင်တိုၵ်း ဝူင်ႈၵၢင် သွင်ၾၢႆႇၼႆႉ လွင်ႈတၢႆဝၢတ်ႇ ပႆႇလႆႈႁူႉ ။ ယွၼ်ႉပၢင်တိုၵ်း ၼႆႉသေ သိုၵ်းမၢၼ်ႈ လုၵ်ႉတီႈၵျွၵ်ႉမႄး ထႅမ် ႁႅင်းသိုၵ်းမႃး ၾၢႆႇၼမ်ႉသၼ်ႇ တိၵ်းတိၵ်း ။ ယွၼ်ႉၼၼ်လႄႈ ပၢင်တိုၵ်း ၸၢင်ႈၵိူတ်ႇ ၶိုၼ်ႈထႅင်ႈ ၊ လွင်ႈၼႆႉ ၵေႃႈလႆႈ မႆႈၸႂ် ။


ယွၼ်ႉပဵၼ် ပၢင်တိုၵ်းလႄႈ ၵူၼ်းၼႂ်း ပိုၼ်ႉတီႈၵေႃႈ ဢမ်ႇႁတ်းၵႂႃႇ ႁဵတ်းသူၼ် ႁႆႈၼႃး - ၵူၼ်းၼႂ်းပိုၼ်ႉတီႈ ဢူးမၢႆႇဢၢႆႈ လၢတ်ႈ ။


ၾၢႆႇၼိုင်ႈ မိူဝ်ႈဝၼ်းတီႈ 23/08/2015 ၵေႃႈ တီႈၼႂ်းၵိင်ႇ ၸႄႈဝဵင်း မိူင်းငေႃႉ ၸႄႈဝဵင်း ၵျွၵ်ႉမႄးၼၼ်ႉ တပ်ႉသိုၵ်း တဢၢင်း TNLA တင်း တပ်ႉသိုၵ်း မၢၼ်ႈ ပဵၼ် ပၢင်တိုၵ်းၵၼ် ၼင်ႇၵဝ်ႇ - လႆႈႁူႉၼင်ႇၼႆ ။


ၼႂ်းမိူင်းတႆး ပွတ်းႁွင်ႇၼႆႉ တပ်ႉသိုၵ်း ၸၢဝ်းၶိူဝ်း ဢၼ်ပဵၼ် ပၢင်တိုၵ်းၵၼ် တင်းသိုၵ်းမၢၼ်ႈ ယူႇၼႆႉ ပဵၼ်တပ်ႉသိုၵ်း ပူတ်းပွႆႇ ၸိူဝ်ႉၸၢတ်ႈ တဢၢင်း (TNLA) ၊ တပ်ႉသိုၵ်းရၶႅင်ႇ (AA) ၊ တပ်ႉသိုၵ်း ဢူၺ်းလီ ၻီႊမူဝ်ႊ ၶရႅတ်ႊတိၵ်ႊ ၵူႈၸၢဝ်းၶိူဝ်း မိူင်းမၢၼ်ႈ (MNDAA) ႁိုဝ် ၸုမ်းၵူဝ်းၵၢင်ႉ ၸိူဝ်းၼႆႉ ။ ၶဝ် 3 ၸုမ်းၼႆႉ ယွၼ်ႉတုမ်ႉတိူဝ်ႉ မုၼ်ငဝ်း ၾၢင်ႁၢင်ႈ (သရေႇ) ၼႃႈတႃၸိုင်ႈ မိူင်းလႄႈ ပေႃးၶႂ်ႈမႃး ဢုပ်ႇဢူဝ်း ၵၢၼ်မိူင်း မီးလၢႆးလဵဝ် ၊ တၵ်းတေလႆႈ ဝၢင်းၶိူင်ႈၵူၺ်း - ၽူႈၵွၼ်းသိုၵ်း သုင်သုတ်း ၸွမ်သိုၵ်းလူင် မိၼ်းဢွင်ႇလၢႆႇ လၢတ်ႈတီႈ ၶွင်ႊသီႊ ၾၢႆႇလိၵ်ႈလၢႆး မၢၼ်ႈ ၸူဝ်ႈၶၢဝ်း ၼင်ႇၼႆ ။