ပႃႊတီႊ ႁူဝ်သိူဝ် (SNLD) ၸဝ်ႈၶုၼ်ထုၼ်းဢူး ၼမ်းၼႃႈ လူင်းႁူပ်ႉထူပ်း ၵူၼ်းဝၢၼ်ႈ ၵူၼ်းမိူင်း တီႈၼမ်ႉမႃႉ ၸႄႈဝဵင်း သီႇပေႃႉ ။ လၢတ်ႈတိုၵ်းသူၼ်း လွင်ႈပႃႊတီႊ လႄႈ ပေႃႇလသီႇ ပႃႊတီႊ ၊ ဢမ်ႇဢဝ် ၵၢၼ်မိူင်း ႁဵတ်းၼႃႈ တိူဝ်ႈသေ ႁဵတ်းၵၢၼ် မၢၵ်ႈမီး ။

ဝၼ်းတီႈ 27/08/2015 ႁူဝ်ပဝ်ႈ ငဝ်ႈငုၼ်း ၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊ ႁူဝ်သိူဝ် (SNLD) ၸဝ်ႈၶုၼ်ထုၼ်းဢူး ဢွၼ်ႁူဝ် ၼမ်းၼႃႈၸုမ်းၸိူဝ်း တင်းၽူႈတႅၼ်း ၵူၼ်း 40 ပၢႆ ၊ ၵႂႃႇႁူပ်ႉထူပ်း ၵူၼ်းမိူင်း တီႈၼမ်ႉမႃႉ ၸႄႈဝဵင်း သီႇပေႃႉ ၸႄႈတွၼ်ႈ ၵျွၵ်ႉမႄး ၸိုင်ႈတႆး ပွတ်းႁွင်ႇ ။ မီးၵူၼ်းဝၢၼ်ႈ ၵူၼ်းမိူင်း မႃးႁူပ်ႉထူပ်း မွၵ်ႈ 350 ပၢႆ - ၼႆယဝ်ႉ ။


ၸဝ်ႈၶုၼ်ထုၼ်းဢူး လၢတ်ႈဝႃႈ - ပႃႊတီႊ ႁဝ်းၶႃႈၼႆႉ ဢမ်ႇဢဝ် ၵၢၼ်မိူင်း ႁဵတ်းၼႃႈ တိူဝ်ႈသေ ႁဵတ်းၵၢၼ် ပၢႆးမၢၵ်ႈမီး ။ ၶႃႈႁဝ်းၼႆႉ ပဵၼ်လၢၼ် ၸဝ်ႈၾႃႉ သီႇပေႃႉ ၊ ယွၼ်ႉႁဵတ်း ၵၢၼ်မိူင်းလႄႈ လႆႈတူၵ်းၶွၵ်ႈ ပီယၢဝ်း ၶၢဝ်းႁိုင် ၊ လႆႈၵႂႃႇယူႇ ၼႂ်းၶွၵ်ႈ 7 ပီ ၊ ၵူၺ်းၵႃႈ ဢွၵ်ႇမႃး ယဝ်ႉၵေႃႈ ၵၢၼ်မိူင်းၼႆႉ သိုပ်ႇႁဵတ်းၵႂႃႇ ထႅင်ႈယူႇ ။ ပႃႊတီႊႁဝ်း ယွမ်းႁပ်ႉလွၵ်းပိူင် 8 ၸႄႈမိူင်းၵူၺ်း ၊ ယွၼ်ႉဝႃႈ လွၵ်းပိူင် 8 ၸႄႈမိူင်းၼႆႉ မၼ်းႁဵတ်းႁႂ်ႈ မီးသုၼ်ႇလႆႈ ၽဵင်ႇပဵင်းၵၼ် - ဝႃႈၼႆ ။


ယူႇတီႈ ၵူၼ်းမိူင်း လၢတ်ႈဝႃႈ တီႈၼႂ်းဢိူင်ႇ ၼမ်ႉမႃႉ ႁဝ်းၼႆႉ ပႆႇမီး ပႃႊတီႊလႂ် ၶဝ်ႈမႃးသေပွၵ်ႈ ၊ မိူဝ်ႈလဵဝ် ၸဝ်ႈၶုၼ် ထုၼ်းဢူး တင်းၸုမ်း ၸိူဝ်းမႃးသေ မႃးပၼ် တၢင်းႁူႉ တၢင်းႁၼ် ၸိူဝ်းၼႆႉ ယိၼ်းၸူမ်း ၶွပ်ႈၸႂ်ယႂ်ႇၼမ် တႄႉတႄႉ ။ ႁဝ်းၶႃႈ ၼမ်ႉတႃ ပေႃးၸိုမ်း ယိုင်ႈႁူၺ်ႇ ၊ ဢၼ်ၵူၼ်း ၼမ်ႉမႃႉ လႆႈထူပ်း ပႃႊတီႊၼႆႉ ပွၵ်ႈၼႆႉ ပဵၼ်ပွၵ်ႈ ဢွၼ်တၢင်း သုတ်းယဝ်ႉ ။


ႁဝ်းၶႃႈ ၵူၼ်းမိူင်းၼႆႉတႄႉ တေလိူၵ်ႈ ပႃႊတီႊ ဢၼ်တေႁဵတ်း ပၼ်ႁဝ်းၶႃႈ ႁႂ်ႈပေႃးလႆႈ သုၼ်ႇလႆႈ ၽဵင်ႇပဵင်း ၼၼ်ႉၵူၺ်း ။ တေလိူၵ်ႈပႃႊတီႊ ဢၼ်မီးၼမ်ႉၸႂ်ၽိူၵ်ႇၸိုၼ်ႈ ၶၢဝ်သႂ် ၼိူဝ်ၵူၼ်းမိူင်း တႄႉတႄႉၼၼ်ႉ ။ ထႅင်ႈပိူင်ၼိုင်ႈ ပေႃးဝႃႈ ၽူႈဢွၼ်ႁူဝ် မီးၼမ်ႉၸႂ် ၽိူၵ်ႇၸိုၼ်ႈၶၢဝ်သႂ် တေႃႇၵူၼ်းမိူင်း တႄႉတႄႉသေ ဢွၼ်ႁူဝ် ၼမ်းၼႃႈၵႂႃႇၼႆ ၵူၼ်းမိူင်း ႁဝ်းၶႃႈၵေႃႈ တေၸွမ်းၵႂႃႇ ၾၢႆႇပႃႈလင်ယူႇ ၊ ပဵၼ်လႆႈ ၵႃႈႁိုဝ်ၵေႃႈ တေၸွႆႈထႅမ်ၵႂႃႇ ၊ တႃႇတေ ၸွႆႈထႅမ်ၵေႃႈ ႁဝ်းၶႃႈ ဢမ်ႇၼၵ်းၸႂ်သင် - ၵူၼ်းမိူင်း လၢတ်ႈၼင်ႇၼႆ ။


ၼေႃႇၽူႈတႅၼ်း ၸိူဝ်းတေၶဝ်ႈ ၶႅင်ႇၼႂ်းၸႄႈဝဵင်း သီႇပေႃႉၼႆႉ သၽႃးၸိူဝ်ႉၸၢတ်ႈ ၸၢႆးဢူင်းၵျေႃႇ ၵျွၵ်ႉမႄး ။ သၽႃး ၵူၼ်းမိူင်း ၸၢႆးၸိုၼ်ႈသႂ် ၵျွၵ်ႉမႄး ။ သၽႃးၸႄႈမိူင်း ၶဵတ်ႇလိူၵ်ႈ တင်ႈမၢႆ 1  ၼၢင်းၸၢၼ်းၸၢၼ်းဢေး ႁွင်ႉ ၼၢင်းၸၢမ်ဢိၼ်း ၵူၼ်းသီႇပေႃႉ ။ သၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸၢႆးၶမ်းဢွင်ႇ ၵူၼ်းၼမ်ႉလၼ်ႈ ။