ၵေႃၵမ်ၵၢၼ် လႅၼ်လိၼ်ထႆး - မၢၼ်ႈ ၸတ်းႁဵတ်း ပၢင်ဢုပ်ႇၵုမ် လႅၵ်ႈလၢႆႈ ၶေႃႈမုလ်းလႄႈ ၵႄႈလိတ်ႈ ပၼ်ႁႃၸွမ်း လႅၼ်လိၼ် ႁူမ်ႈပႃးလွင်ႈ ပၢင်သဝ်း တပ်ႉသိုၵ်းဝႃႉ ဢၼ်ပၵ်းယူႇၸွမ်း လႅၼ်လိၼ် ၸိူဝ်းၼၼ်ႉ ။

မိူဝ်ႈ ဝၼ်းတီႈ 27/08/2015 (မိူဝ်ႈဝႃး) ASTV ပိုၼ်ၽၢဝ်ႇ ဝႃႈ ၵေႃၵမ်ၵၢၼ် လႅၼ်လိၼ်ထႆး - မၢၼ်ႈ ႁူပ်ႉထူပ်း ဢုပ်ႇၵုမ်ၵၼ် ပွၵ်ႈၵမ်း 84 တီႈ ႁူင်းလိုဝ်ႈသဝ်း မႄႈၶူင်ၻဵၼ်ႊတႃႊ ၸႄႈဝဵင်း မႄႈသၢႆ ၸႄႈတွၼ်ႈ ၵဵင်းႁၢႆး ။


ပၢင်ၵုမ် ပွၵ်ႈၵမ်းၼႆႉ ၾၢႆႇထႆး တၢင်ႇလၢတ်ႈ လွင်ႈဢၼ် တပ်ႉပၢင်သဝ်း သိုၵ်းဝႃႉ 7 ဢၼ်ၸိူဝ်းပၵ်း သဝ်းယူႇၸွမ်း လႅၼ်လိၼ်ၼၼ်ႉ ႁႂ်ႈၶၢႆႉဢွၵ်ႇပၼ် 20 - 50 မဵတ်ႉ ဢမ်ႇၼၼ် ၶၢႆႉဢွၵ်ႇၵႂႃႇ ၵမ်းသိုဝ်ႈ ႁူမ်ႈထိုင် ဢုပ်ႇၵုမ်ၵၼ် လွင်ႈတႃႇတေ ပိုတ်ႇလၢၼ်ႇ တီႈၵိဝ်ႇၽႃဝွၵ်ႉ (လၢၼ်ႇၼွင်ဢုၵ်း) ၸႄႈဝဵင်း ၵဵင်းလၢဝ် ၸႄႈတွၼ်ႈ ၵဵင်းမႆႇ ။


ၼႂ်းပၢင်ၵုမ်ၼၼ်ႉ ယင်းဢုပ်ႇပႃး လွင်ႈၶဝ်ႈဢွၵ်ႇ လုၵ်ႈႁဵၼ်း မိူင်းမၢၼ်ႈ ဢၼ်ၶဝ်ႈမႃး ႁဵၼ်းလိၵ်ႈတီႈ ၼႂ်းမိူင်းထႆး ဝႃႈၼႆ ။


“ယၢမ်းလဵဝ် မီးလုၵ်ႈႁဵၼ်း တၢင်းမိူင်းမၢၼ်ႈ ၶဝ်ႈမႃး ႁဵၼ်းလိၵ်ႈတီႈ ၼႂ်းမိူင်းထႆး တင်းၼမ် မၢင်ၵေႃႉ ၶဝ်ႈဢွၵ်ႇ လႅၼ်လိၼ် ဢမ်ႇမီးဝႂ် ၽၢၼ်ႇလၢၼ်ႇ (ၵဵၵ်ႉ) ယွၼ်ႉၼၼ် ၵူဝ်တူၵ်း ပဵၼ်ယိူဝ်ႇၵူၼ်း ၵႃႉၶၢႆ ၵူၼ်းမိူၼ်ၼင်ႇ - လုၵ်ႇဢွၼ်ႇ ၸိူဝ်းမီး ဢႃယု 12 ပီ လူင်းတႂ်ႈ ၵွပ်ႈၼၼ် ႁႂ်ႈပေႃႈမႄႈ တူၺ်ႈလွမ် သႂ်ႇၸႂ်လီလီ ႁဵတ်းပၼ် ဝႂ်ၽၢၼ်ႇလၢၼ်ႇ သႂ်ႇၸိုဝ်ႈ ၶေႃႈမုလ်းပၼ် ႁႂ်ႈတဵမ်ထူၼ်ႈ ၼႆယဝ်ႉ - ၵေႃၵမ်ၵၢၼ် လႅၼ်လိၼ်ထႆး လၢတ်ႈ ။


လိူဝ်ၼၼ်ႉ ၾၢႆႇထႆး ယင်းယွၼ်း ႁႂ်ႈမိူင်းမၢၼ်ႈ ႁူမ်ႈမိုဝ်းၵၼ် ၵဵဝ်ႇလူၺ်ႈလွင်ႈ ႁႄႉၵင်ႈ ၾႆးမႆႈပႃႇ လႄႈ ဢၢႆၵွင်ႉ ဢၢႆးၵႂၼ်း ၼႂ်းၶၢဝ်း လိူၼ်တီႊသဵမ်ႊၿိူဝ်ႊ တေႃႇထိုင် လိူၼ်ဢေႊၿိူဝ်ႊ ဝႃႈၼႆ ။


ယူႇတီႇ ၾၢႆႇမိူင်းမၢၼ်ႈသမ်ႉ လႆႈတၢင်ႇလၢတ်ႈ ပၼ်ႁႃယႃႈမဝ်း ။ ၶဝ် လၢတ်ႈဝႃႈ - မိူဝ်ႈဢမ်ႇႁိုဝ်မႃးၼႆႉ ၸဝ်ႈၼႃႈတီႈ မၢၼ်ႈ တီႉၺွပ်းလႆႈ ယႃႈမဝ်းၵမ် 26.7 လၢၼ်ႉမဵတ်ႉ ဢၼ် တၢင်ႇမႃး ၸွမ်းရူတ်ႉ 6 လေႃႉ တီႈမိူင်း မိင်ႇၵလႃႇၻူင်ႇ လႄႈ မိူဝ်ႈ ဝၼ်းတီႈ 30 ပူၼ်ႉမႃး ၼၼ်ႉ ၵေႃႈၺွပ်းလႆႈ ယႃႈမႃႉ 1.5 လၢၼ်ႇမဵတ်ႉ ။ ၵူၼ်းၵႃႉယႃႈ 4 ၵေႃႉ ၸဝ်ႈၼႃႈတီႈၶဝ် လၢမ်းဝႃႈၵူၼ်း ၸိူဝ်းၼႆႉ လႅပ်ႈတေပၢႆႈ ၶဝ်ႈမိူင်းထႆး ၼႆေသၶႂ်ႈယွၼ်း တၢင်းႁူမ်ႈမိုဝ်း ၾၢႆႇထႆးတီႉ ၺွပ်းၶဝ်သူင်ႇ ပၼ်ၶိုၼ်းမိူင်းမၢၼ်ႈ ဝႃႈၼႆ ။