ပီႈၼွင်ႉတႆး ႁႅင်းၵၢၼ်ယၢၼ်မိူင်း ၼႂ်းၵဵင်းမႆႇ ၵိူတ်ႇၽေးဢုပၢတ်ႈ တၢင်းရူတ်ႉၵႃး ၊ ဝၢတ်ႇၸဵပ်း 8 ၵေႃႉ ။ ၼႂ်းၼၼ်ႉ ပႃးလုၵ်ႈဢွၼ်ႇလႅင် 6 လိူၼ်ၵေႃႉၼိုင်ႈ ၊ ဝၢႆးၵႂႃႇႁဵတ်းတၢင်းလီ ၼႃးမုၼ် ဝၼ်းလိူၼ် 12 မူၼ်း တီႈဝတ်ႉမႄႈတႅင် ပွၵ်ႈၶိုၼ်း ။

မိူဝ်ႈဝၼ်းတီႈ 25/11/2015 (ဝၼ်းလိူၼ် 12 မူၼ်း ၊ မိူင်းထႆး) ယၢမ်းၵၢင်ဝၼ်းတဵင်ႈၼၼ်ႉ မီးရူတ်ႉၵႃး ပီႈၼွင်ႉတႆး ႁႅင်းၵၢၼ်ယၢၼ်မိူင်း ၼႂ်းၵဵင်းမႆႇ ၊ လႆႈၵိူတ်ႇၽေးဢုပၢတ်ႈ  တီႈၼႃႈထဵတ်ႉသၿၢလ်း ၼွင်ႁၢၼ် ဢိူင်ႇၼွင်ႁၢၼ် ၸႄႈဝဵင်းသၼ်သၢႆး ၸႄႈတွၼ်ႈၵဵင်းမႆႇ ။ မီးပီႈၼွင်ႉတႆး လႆႈတိူဝ်ႉဝၢတ်ႇၸဵပ်းၵႂႃႇ တင်းမူတ်း 8 ၵေႃႉ ။


ပီႈၼွင်ႉတႆး ဢၼ်ၵိူတ်ႇၽေးဢုပၢတ်ႈပွၵ်ႈၼႆႉ ယူႇသဝ်းဝႆႉတီႈ သၼ်ၼမဵင်း ၸႄႈဝဵင်းသၼ်သၢႆး ။ လႆႈႁူမ်ႈၵၼ်ၵႂႃႇႁဵတ်းတၢင်းလီ ၼႃးမုၼ် တီႈဝတ်ႉတီယသထၢၼ် ၸႄႈဝဵင်းမႄႈတႅင် ၸႄႈတွၼ်ႈၵဵင်းမႆႇသေ ပွၵ်ႈၶိုၼ်းမႃး ။ ၵူၼ်းၶီႇၵႃး 7 ၵေႃႉ ႁူမ်ႈတင်းၵူၼ်းႁေႃႈၵႃး 8 ၵေႃႉ ။ ၵိူတ်ႇၽေးဢုပၢတ်ႈသေ ဝၢတ်ႇၸဵပ်းလိူဝ်ၸႂ် 4 ၵေႃႉ ၊ ဝၢတ်ႇၸဵပ်းဢိတ်းဢွတ်း 4 ၵေႃႉ ။ ၼႂ်းဢၼ်ဝၢတ်ႇၸဵပ်းလိူဝ်ၸႂ်ၼၼ်ႉ ၶႃႁၵ်းမိုဝ်းႁၵ်း 3 ၵေႃႉ ။ ပႃးလုၵ်ႈဢွၼ်ႇလႅင်း ဢႃယု 6 ၶူပ်ႇၵေႃႈၼိုင်ႈ ၊ လုၵ်ႈဢွၼ်ႇၼႆႉ တီႈႁူဝ်လွၵ်ႈၵႂႃႇသေ မေႃယႃၶဝ်သႂ်ႇယႃႈယႃသေ ဢဝ်ၽႅၼ်ႇပူၵ်ႉဝႆႉ - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၵူၼ်းႁေႃႈရူတ်ႉၵႃး ၸၢႆးသႅင်မိူင်း လၢတ်ႈဝႃႈ - မိူဝ်ႈၵၢင်ၶမ်ႈၼၼ်ႉ ႁူမ်ႈၵၼ်ႁႅၼ်းတၢင်းလူႇတၢင်းတၢၼ်း ။ ၵၢင်ၼႂ်မႃး ႁႅၼ်းၶဝ်ႈၽၵ်းသေယဝ်ႉ ၵႂႃႇလဵင်ႉတီႈဝတ်ႉမႄႈတႅင် ။ ယွၼ်ႉဢမ်ႇလႆႈလပ်းလႆႈၼွၼ်းလႄႈလပ်းၼႂ်း ။ ၵႃးလမ်းၼႆႉ ၵႂႃႇၶႂမ်ႈပိၼ်ႈတီႈ ၼႃႈႁၢၼ်ႉၶၢႆၼမ်ႉၶႅင် ၼႃႈထဵတ်ႉသၿၢလ်း ၼွင်ႁၢၼ် ၊ လေႃႇၺႃးသဝ်ၾႆးၾႃႉ ။ မိူဝ်ႈလဵဝ် ရူတ်ႉၵႃးၵေႃႈမီးဝႆႉယူႇတီႈ ႁူင်းပလိၵ်ႈသၼ်သၢႆး - ဝႃႈၼႆ ။


မိူဝ်ႈလဵဝ် ၸိူဝ်းဝၢတ်ႇၸဵပ်းႁႅင်း 4 ၵေႃႉၼၼ်ႉ ၶဝ်ႈယူတ်းယႃတူဝ်ဝႆႉတီႈ ႁူင်းယႃၼၶွၼ်းၽိင်း (ပႃႇငႄႉ) ၊ တႃႇ 4 ၵေႃႉ လူင်းႁူင်းယႃယဝ်ႉ ။ ပီႈၼွင်ႉတႆး ဢၼ်ထူပ်းၽေးဢုပၢတ်ႈပွၵ်ႈၼႆႉ မၢင်ၵေႃႉၵေႃႈၵိၼ်းၸႂ် လွင်ႈငိုၼ်းတွင်းဝႆႉ ။