ၸုမ်းတူင်ႇဝူင်းၵူၼ်းတႆး ၼပ်ႉႁူဝ်သိပ်းၸုမ်း ယိုၼ်ႈလိၵ်ႈတီႈလုမ်းၽွင်းတၢင်မၢၼ်ႈ မိူင်းၵွၵ်ႇ ၸိုင်ႈထႆး ။ တုၵ်းယွၼ်း ႁႂ်ႈၵိုတ်းပၼ်ပၢင်တိုၵ်းလႄႈ ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸိုင်ႈတႆး ။

ဝၼ်းတီႈ 27/11/2015 (မိူဝ်ႈၼႆႉ) ၸုမ်းတူင်ႉၼိုင် တူင်ႇဝူင်းၵူၼ်းတႆး 34 ၸုမ်း လႆႈဢွၼ်ၵၼ်ၵႂႃႇယိုၼ်ႈလိၵ်ႈ တီႈလုမ်းၽွင်းတၢင် (ၽွင်းၶဵဝ်) ၸိုင်ႈမိူင်းႁူမ်ႈတုမ်မၢၼ်ႈ  တီႈဝဵင်းမိူင်းၵွၵ်ႇ ၸိုင်ႈထႆး ။ တုၵ်းယွၼ်း ႁႂ်ႈၵိုတ်းပၼ်ပၢင်တိုၵ်း လႄႈ ၸွႆႈထႅမ်ပၼ်ၵူၼ်းထူပ်းၽေးသိုၵ်း ၼႂ်းၸိုင်ႈတႆး ။


ၽူႈၶဝ်ႈၸုမ်းတူင်ႇဝူင်းၵူၼ်းတႆး ဢၼ်ၶဝ်ႈႁူမ်ႈၵၢၼ်တူင်ႉၼိုင် ၸၢႆးၼုမ်ႇႁၵ်ႉတႆး ၸဵတ်းၸွမ်ၸၢႆး လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - မိူဝ်ႈၼႆႉပွတ်းၼႂ် ၸုမ်းတႆး 34 ၸုမ်း ဢွၼ်ၵၼ်ၵႂႃႇယိုၼ်ႈလိၵ်ႈ တီႈလုမ်းၽွင်းတၢင်မိူင်းမၢၼ်ႈ  တီႈဝဵင်းမိူင်းၵွၵ်ႇ ။ ၼႂ်းၽိုၼ်လိၵ်ႈၼၼ်ႉ လႆႈလၢတ်ႈၼႄလွင်ႈဢၼ် မီးၵၢၼ်တဵၵ်းတဵင် ပူၼ်ႉပႅၼ်ၵူႈလွင်ႈလွင်ႈ ၵႃႈပူၼ်ႉမႃး။ ၶေႃႈတုၵ်းယွၼ်း တင်းမူတ်းမီး 10 ၶေႃႈ - ၼႂ်းၼၼ်ႉ ပႃးလွင်ႈႁႂ်ႈၵိုတ်းယိုတ်း လွင်ႈပၢင်တိုၵ်း ။ တပ်ႉသိုၵ်းတႆး ႁႂ်ႈလႆႈယူႇလႆႈၵူႈတီႈ ၼႂ်းၸိုင်ႈတႆး ။ ဝၢႆးသေၵိုတ်းယိုဝ်းယဝ်ႉ ဢၼ်လူင်ပွင်ၸိုင်ႈမၢၼ်ႈ တင်းလူင်ပွင်ၸိုင်ႈၵဝ်ႇ / မႂ်ႇ တေလႆႈသိုပ်ႇႁဵတ်းၵႂႃႇၼႆႉ ပဵၼ်ၶိုၼ်းမႃးယူတ်းယႃလုမ်းလႃး သၢႆႈတႅၼ်းပၼ်ၵူၼ်းဝၢၼ်ႈၵူၼ်းမိူင်းႁဝ်း ဢၼ်လႆႈလူႉသုမ်းၵႂႃႇ ဢမ်ႇဝႃႈလွင်ႈၶူဝ်းၶွင် သၢႆၸႂ် ။


သိုပ်ႇလၢတ်ႈဝႃႈ - လွင်ႈၵူၼ်းဝၢၼ်ႈၵူၼ်းမိူင်း လႆႈပၢႆႈၽေးသိုၵ်းသေ လူႉသုမ်းၶူဝ်းၶွင်ၵႂႃႇလႄႈသင် ။ ဢၼ်သိုၵ်းမၢၼ်ႈၶဝ်လႃႈလီႈယိုဝ်းၵွင်ႈလူင် / ပွႆႇမၢၵ်ႇလူင်ၵႂႃႇ ၵူႈၾၢႆႇၵူႈတၢင်းသေ တိူဝ်ႉႁိူၼ်းယေး ၊ ဝတ်ႉဝႃး ၊ ၶူဝ်းၶွင်ၵူၼ်းဝၢၼ်ႈၵူၼ်းမိူင်း လူႉလႅဝ်ၵႂႃႇၸိူဝ်းၼႆႉ ႁႂ်ႈသၢႆႈတႅၼ်းပၼ်ၶိုၼ်း၊ ႁဵတ်းပၼ်ၶိုၼ်း ၸိူဝ်းၼႆႉ - ဝႃႈၼႆ ။


ဝၼ်းတီႈ 26/11/2015  (မိူဝ်ႈဝႃး) ၽွင်းပွတ်းၼႂ်ၵေႃႈ ၸုမ်းတူင်ႉၼိုင်တူင်ႇဝူင်းၵူၼ်းတႆး 34 ၸုမ်းၼႆႉႁူမ်ႈၵၼ် ၸတ်းႁဵတ်းပၢင်သပ်းၸႅင်ႈၶၢဝ်ႇ တီႈဢွင်ႈလုမ်း ၽူႈသိုဝ်ႇၶၢဝ်ႇၼွၵ်ႈမိူင်း (The Foreign Correspondents’  Club of Thailand- FCCT) တီႈမိူင်းၵွၵ်ႇ ၸိုင်ႈထႆး ။ မီးၸုမ်းတူင်ႇဝူင်းၵူၼ်း တီႈၵဵင်းမႆႇ ၊ ၸုမ်းၶၢဝ်ႇ RFA လႄႈတၢင်ႇၸုမ်း ၊ ၸုမ်းတႆးၼႂ်းမိူင်းၵွၵ်ႇ ၊ ၸဝ်ႈၼႃႈတီႈထႆးၸိူဝ်းၼႆႉ ၶဝ်ႈႁူမ်ႈမွၵ်ႈ 50 ပၢႆ ။


တီႈပၢင်သပ်းၸႅင်ႈၶၢဝ်ႇၼႆႉ ၽူႈၵၢဝ်ႇလၢတ်ႈၶေႃႈၵႂၢမ်း သပ်းလႅင်းၼႄငဝ်းလၢႆး ၼႂ်းၸိုင်ႈတႆး မီးၸၢႆးၶိူဝ်းသႅင် ၊ ၼၢင်းၸၢမ်တွင်း ။ ၸဝ်ႈၼႃႈတီႈ ၾၢႆႇၵဝ်ႉငဝ်ႈသုၼ်ႇလႆႈၵူၼ်းၸိုင်ႈထႆး ။


ၼၢင်းၸၢမ်းတွင်း သပ်းၸႅင်ႈၼႄ လွင်ႈၶၢဝ်းယၢမ်းပဵၼ်ပၢင်တိုၵ်းလႄႈ တုမ်ႉတိူဝ်ႉသုၼ်ႇလႆႈၵူၼ်း ။ မိူၼ်ၼင်ႇ တုမ်ႉတိူဝ်ႉသုၼ်ႇလႆႈသုၼ်ႇပဵၼ် ၼၢင်းယိင်း ။ ယွၼ်ႉပဵၼ်ပၢင်တိုၵ်းလႄႈ ၼၢင်းယိင်းထုၵ်ႇၵၼ်ႉၸၼ်လူလၢႆ ။ လွင်ႈၵူၼ်းဝၢၼ်ႈၵူၼ်းမိူင်း လႆႈပၢႆႈၽေးမီးမိုၼ်ႇပၢႆ ၊ လွင်ႈသိုၵ်းမၢၼ်ႈပူၼ်ႉပႅၼ်သုၼ်ႇလႆႈၵူၼ်းၸိူင်ႉႁိုဝ် - ၸိူဝ်းၼႆႉ ။


ၸၢႆးၶိူဝ်းသႅင် သပ်းၸႅင်ႈၼႄ လွင်ႈတပ်ႉသိုၵ်းမၢၼ်ႈၶဝ် ပူၼ်ႉပႅၼ်ၶဝ်ႈပိုၼ်ႉတီႈၼႃႈလိၼ် ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ။ ငဝ်းလၢႆးလွင်ႈပၢင်တိုၵ်း ဝူင်ႈၵၢင်တပ်ႉသိုၵ်းမၢၼ်ႈလႄႈ တပ်ႉသိုၵ်းၸိုင်ႈတႆး ။ လွင်ႈပဵၼ်ပၢင်တိုၵ်းသေ မီးၵူၼ်းပၢႆႈၽေးၼမ် ၸုမ်းၼွၵ်ႈမိူင်းၶဝ် တဵတ်ႇယဵၼ်ယူႇသီႇသီႇ ၊ တုၵ်းယွၼ်း ယႃႇႁႂ်ႈမၼ်းပဵၼ်သိုၵ်းထႅင်ႈ ။ ၵွပ်ႈဝႃႈပၢင်တိုၵ်း တုမ်ႉတိူဝ်ႉသူၼ် တိူၵ်ႇႁႆႈလွၵ်းၼႃး ၊  ဝတ်ႉဝႃး ၊ ႁူင်းသွၼ်လိၵ်ႈ ၊ ၵူၼ်းမိူင်းတႆးၸိူဝ်းၼႆႉ ။ တုၵ်းယွၼ်းႁႂ်ႈတူင်ႇဝူင်းၵူၼ်းတႆး လႄႈ တူင်ႇဝူင်းၵူၼ်းၼွၵ်ႈမိူင်း ႁူႉထိုင်သေ ၶဝ်ႈၵႂႃႇၸွႆႈထႅမ်ၵူၼ်းပၢႆႈၽေး - ၸိူဝ်းၼႆႉ ။