ၸုမ်းတူင်ႇဝူင်းၵူၼ်းတႆး ၼပ်ႉႁူဝ်သိပ်းၸုမ်း  ႁူမ်ႈၸတ်းႁဵတ်းပၢင်သပ်းၸႅင်ႈၶၢဝ်ႇ လွင်ႈငဝ်းလၢႆးပၢင်တိုၵ်း လႄႈၵူၼ်းပၢႆႈၽေးသိုၵ်း ၼႂ်းၸိုင်ႈတႆး တီႈမိူင်းၵွၵ်ႇ။ မီးၵူၼ်းၶဝ်ႈႁူမ်ႈ တင်းၼမ် ။

ဝၼ်းတီႈ 26/11/2015 (မိူဝ်ႈၼႆႉ) တင်ႈတႄႇပွတ်းၼႂ် ယၢမ်း 10 မူင်းပၢႆတေႃႇထိုင်တဵင်ႈ ယၢမ်း 12 မူင်း ၊ ၸုမ်းတူင်ႉၼိုင်တူင်ႇဝူင်းၵူၼ်းတႆး 30 ၸုမ်းပၢႆ ၊ ႁူမ်ႈၵၼ် ၸတ်းႁဵတ်းပၢင်သပ်းၸႅင်ႈၶၢဝ်ႇ တီႈဢွင်ႈလုမ်း ၽူႈသိုဝ်ႇၶၢဝ်ႇၼွၵ်ႈမိူင်း (The Foreign Correspondents’ Club of Thailand- FCCT) တီႈမိူင်းၵွၵ်ႇ ၸိုင်ႈထႆး ။ မီးၸုမ်းတူင်ႇဝူင်းၵူၼ်း တီႈၵဵင်းမႆႇ ၊ ၸုမ်းၶၢဝ်ႇ RFA လႄႈတၢင်ႇၸုမ်း ၊ ၸုမ်းတႆးၼႂ်းမိူင်းၵွၵ်ႇ ၊ ၸဝ်ႈၼႃႈတီႈထႆးၸိူဝ်းၼႆႉ ၶဝ်ႈႁူမ်ႈမွၵ်ႈ 50 ပၢႆ - ၼႆယဝ်ႉ ။


တီႈပၢင်သပ်းၸႅင်ႈၶၢဝ်ႇၼႆႉ ၽူႈမွၵ်ႇလၢတ်ႈၶေႃႈၵႂၢမ်း သပ်းလႅင်းၼႄငဝ်းလၢႆး ၼႂ်းၸိုင်ႈတႆး မီးၸၢႆးၶိူဝ်းသႅင် ၊ ၼၢင်းၸၢမ်တွင်း ။ ၸဝ်ႈၼႃႈတီႈ ၾၢႆႇၵဝ်ႉငဝ်ႈသုၼ်ႇလႆႈၵူၼ်းၸိုင်ႈထႆးၵေႃႈ သပ်းၸႅင်ႈၼႄ လွင်ႈသုၼ်ႇလႆႈၵူၼ်း - ၼႆယဝ်ႉ ။


ၼၢင်းၸၢမ်းတွင်း သပ်းၸႅင်ႈၼႄ လွင်ႈၶၢဝ်းယၢမ်းပဵၼ်ပၢင်တိုၵ်းလႄႈ တုမ်ႉတိူဝ်ႉသုၼ်ႇလႆႈၵူၼ်း ။ မိူၼ်ၼင်ႇ တုမ်ႉတိူဝ်ႉသုၼ်ႇလႆႈသုၼ်ႇပဵၼ် ၼၢင်းယိင်း ။ ယွၼ်ႉပဵၼ်ပၢင်တိုၵ်းသေ ၼၢင်းယိင်းထုၵ်ႇၵၼ်ႉၸၼ်လူလၢႆ ။ လွင်ႈၵူၼ်းဝၢၼ်ႈၵူၼ်းမိူင်း လႆႈပၢႆႈၽေးမီးမိုၼ်ႇပၢႆ ၊ လွင်ႈသိုၵ်းမၢၼ်ႈပူၼ်ႉပႅၼ်သုၼ်ႇလႆႈၵူၼ်းၸိူင်ႉႁိုဝ် - ၸိူဝ်းၼႆႉ ။


ၸၢႆးၶိူဝ်းသႅင် သပ်းၸႅင်ႈၼႄ လွင်ႈတပ်ႉသိုၵ်းမၢၼ်ႈၶဝ် ပူၼ်ႉပႅၼ်ၶဝ်ႈပိုၼ်ႉတီႈၼႃႈလိၼ် ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ။ ငဝ်းလၢႆးလွင်ႈပၢင်တိုၵ်း ဝူင်ႈၵၢင်တပ်ႉသိုၵ်းမၢၼ်ႈလႄႈ တပ်ႉသိုၵ်းၸိုင်ႈတႆး ။ လွင်ႈပဵၼ်ပၢင်တိုၵ်းသေ မီးၵူၼ်းပၢႆႈၽေးၼမ် ၊ ၵူၺ်းၵႃႈ ၵွပ်ႈသင်လႄႈ ၸုမ်းၼွၵ်ႈမိူင်းၶဝ် တဵတ်ႇယဵၼ်ယူႇသီႇသီႇ ၊ ဢမ်ႇတၵ်းသဵင်သင်ၸွမ်း။ ဝႆႉမိူင်းတႆးမိူၼ်ၼင်ႇ ဢမ်ႇယူႇၼႂ်းၸိုင်ႈမိူင်းႁူမ်ႈတုမ် ။ တုၵ်းယွၼ်း ယႃႇႁႂ်ႈမၼ်းပဵၼ်သိုၵ်းထႅင်ႈ - ၸိူဝ်းၼႆႉ ။


လိူဝ်သေၼၼ်ႉ သပ်းၸႅင်ႈၼႄပႃး လွင်ႈပၢင်တိုၵ်း လႆႈတုမ်ႉတိူဝ်ႉၸဵမ်ၼမ်ႉလိၼ်ႁိၼ်ၽႃ ၊ တုမ်ႉတိူဝ်ႉသူၼ် တိူၵ်ႇႁႆႈလွၵ်းၼႃး ၊ ၵူၼ်း ၊ ဝတ်ႉဝႃး ၊ ႁူင်းသွၼ်လိၵ်ႈၸိူဝ်းၼႆႉ ။ တုမ်ႉတိူဝ်ႉၸၢဝ်းၶိူဝ်းတႆးၵူၺ်းပႆႇပေႃး တုမ်ႉတိူဝ်ႉပႃးၸၢဝ်းၶိူဝ်းၼႂ်းမိူင်းတႆး ပႃးၸဵမ်ၸၢဝ်းတဢၢင်း ၊ လီႉသေႃး ၸိူဝ်းယူႇသဝ်းႁိမ်းႁွမ်းပၢင်တိုၵ်း ။ လွင်ႈၼႆႉ လူင်ပွင်ၸိုင်ႈတိုၼ်းတေလႆႈဢဝ်ပုၼ်ႈၽွၼ်းသေ ၸွႆႈထႅမ်ၵူၼ်းမိူင်းၵႂႃႇ ။ လွင်ႈၸိူဝ်းၼႆႉ ၶႂ်ႈႁႂ်ႈတူင်ႇဝူင်းၵူၼ်းတႆး လႄႈ တူင်ႇဝူင်းၵူၼ်းၼွၵ်ႈမိူင်း ႁူႉထိုင်သေ ၶဝ်ႈၵႂႃႇၸွႆႈထႅမ် တီႈၵူၼ်းပၢႆႈၽေးႁႂ်ႈလႆႈၵူႈၶၢဝ်းယၢမ်း ။


ပေႃးဝႃႈမီးၵၢၼ်ဢုပ်ႇဢူဝ်းၵိူဝ်းၵုမ်ၵၼ်ၸိုင် ႁႂ်ႈလႆႈမီးဢၼ်သွင်ပႃႈသွင်ၾၢႆႇ ၶႂ်ႈလႆႈၼင်ႇၵၼ်။ ပေႃးဢမ်ႇပဵၼ်ၼၼ် တေပဵၼ်ၵၢၼ်ဢုပ်ႇဢူဝ်း ဢၼ်လွၵ်ႇၵၼ် ။ မီးပၼ်ႁႃသင်ဢမ်ႇဝႃႈ ၶႂ်ႈႁႂ်ႈမီးလွင်ႈဢုပ်ႇဢူဝ်းၵၼ် ၊ ဢဝ်ၶိူင်ႈၵွင်ႈၵၢင်ႇယိုဝ်းၵၼ်သေ တုမ်ႉတိူဝ်ႉၵူၼ်းမိူင်းၸိူဝ်းၼႆႉ မၼ်းဢမ်ႇထုၵ်ႇလီပဵၼ်ယဝ်ႉ ။ ႁဵတ်းသင်ၵေႃႈ ႁႂ်ႈတူၺ်းထိုင်ၵူၼ်းမိူင်း ။


ယိူင်းဢၢၼ်း ဢၼ်လႆႈၸတ်းႁဵတ်း ပၢင်သပ်းၸႅင်ႈၶၢဝ်ႇတီႈမိူင်းၵွၵ်ႇၼၼ်ႉ ၸၢႆးၶိူဝ်းသႅင် လၢတ်ႈၼႄပႃးဝႃႈ - ၵွပ်ႈဝႃႈတီႈမိူင်းၵွၵ်ႇၼႆႉ ပဵၼ်တီႈၽူႈသိုဝ်ႇၶၢဝ်ႇထႆး ၊ ၽူႈသိုဝ်ႇၶၢဝ်ႇၼွၵ်ႈမိူင်းၶဝ် ၊ ၽူႈသိုဝ်ႇၶၢဝ်ႇၵူႈတီႈတီႈ မႃးႁူမ်ႈၵၼ် ။ တီႈမိူင်းၵွၵ်ႇၼႆႉ မၼ်းမီးတိုဝ်ႉတၢင်းတႃႇတေ မွၵ်ႇၽူႈသိုဝ်ႇၶၢဝ်ႇၵူႈတီႈတီႈ မႃးၶဝ်ႈႁူမ်ႈ ။ ႁဝ်းၶႃႈၵေႃႈ ၶႂ်ႈႁႂ်ႈတင်းလုမ်ႈၾႃႉ / လူၵ်ႈ ႁူႉၸွမ်းဝႃႈ လွင်ႈတွတ်ႈၶႅပ်းၵၢင်ၸႂ်ၼႆႉ ပိူၼ်ႈႁၼ်ပဵၼ်ဢၼ်ႁၢင်ႈလီယူႇ ။ လွင်ႈလူင်းလၢႆးမိုဝ်းၵိုတ်းသိုၵ်းၵၼ်ၵေႃႈ ႁၢင်ႈလီယူႇ ၊ ၵူၺ်းၵႃႈ ပၢင်တိုၵ်းယႂ်ႇယႂ်ႇလူင်လူင်ၼႆႉ  ပိူၼ်ႈဢမ်ႇႁၼ်မႅၼ်ႈ။ ၵွပ်ႈပိူၼ်ႈၼၼ်လႄႈ ၶႂ်ႈႁႂ်ႈၼႂ်းလုမ်ႈၾႃႉ / လူၵ်ႈၼႆႉ လႆႈႁူႉၵႂႃႇ ၸင်ႇလႆႈမႃးၸတ်းႁဵတ်းတီႈမိူင်းၵွၵ်ႇ - ဝႃႈၼႆ ။