ႁူဝ်ပဝ်ႈပႃႊတီႊသိူဝ်ၽိူၵ်ႇ (SNDP) လုင်းၸၢႆးဢၢႆႈပဝ်း လၢတ်ႈဝႃႈ ၸိုင်ႈမိူင်းႁူမ်ႈတုမ်ၼႆႉ ထုၵ်ႇလႆႈပဵၼ် ဝၢၼ်ႈမိူင်းႁူမ်ႈတုမ်ၾႅတ်ႊၻရႄႊလ်ၸိုၼ်ႈၸၢင်ႇ ၊ ဝၢၼ်ႈမိူင်းၸင်ႇၵတ်းယဵၼ် ၶိုၼ်ႈယႂ်ႇ ။ ဝၢၼ်ႈမိူင်းတႆး တႆးထုၵ်ႇလႆႈၽွင်းငမ်း ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ ။

ထၢမ် - ပေႃးလဵပ်ႈႁဵၼ်းတူၺ်း ပိူင်ၼႂ်းလူၵ်ႈၼႆႉ ပေႃးၶွမ်ႊမတီႊငဝ်ႈငုၼ်း ၵေႃႉလႂ်ၶဝ်ႈလိူၵ်ႈတင်ႈဢမ်ႇပေႉၼႆ ထွၼ်တူဝ်ဢွၵ်ႇပႃႊတီႊ ။ ၵွပ်ႈၼၼ် ပႃႊတီႊသိူဝ်ၽိူၵ်ႇ ၸွင်ႇတေထွၼ်တူဝ်ဢွၵ်ႇၶႃႈႁႃႉ ?။


တွပ်ႇ - ၸုမ်း CEC (ၶွမ်ႊမတီႊငဝ်ႈငုၼ်း) ႁဝ်းတင်းသဵင်ႈ ၊ ပေႃးလူင်ပွင်ၸိုင်ႈမႂ်ႇၶိုၼ်ႈမႃး ႁဝ်းတေၸတ်းပၢင်ၵုမ်လူင်သေ ထွၼ်တူဝ်ဢွၵ်ႇတင်းမူတ်း ။ ႁဝ်းတေၸတ်းပၢင်ၵုမ်လူင် ဢၼ်ႁွင်ႉ CEC ၵူႈဝဵင်းဝဵင်း ႁႂ်ႈမႃးၶိုၼ်ႈ ။ ၽူႈပွင်ၵၢၼ်ငဝ်ႈငုၼ်း ပႃးၸဵမ်ႁူဝ်ပဝ်ႈ CEC တင်းသဵင်ႈ တေလႆႈထွၼ်တူဝ်ဢွၵ်ႇမူတ်းမူတ်း ။ ထွၼ်တူဝ်ဢွၵ်ႇမူတ်းမူတ်းသေ ဢဝ်လၢႆးၻီႊမူဝ်ႊၶရေႊၸီႊ ၊ ၶႅပ်းၵၢင်ၸႂ်လပ်ႉသေ တွတ်ႈၶႅပ်းလိူၵ်ႈႁူဝ်ပဝ်ႈမႂ်ႇ ။


ထၢမ် - ပေႃးၸိူင်ႉၼၼ် မိူဝ်းၼႃႈမႃးၶႃႈလူး ၊ ၸွင်ႇတေသိုပ်ႇႁဵတ်းၵၢၼ်မိူင်းၵႂႃႇ ထႅင်ႈၶႃႈ ?။


တွပ်ႇ - ႁဝ်းပဵၼ်ၵူၼ်း ၵိူတ်ႇမႃးပဵၼ်တႆးၵေႃႉၼိုင်ႈယဝ်ႉၼႆႉ ၵၢၼ်တႆးတႄႉ တိုၼ်းတေႁဵတ်းတေႃႇထိုင်ပေႃးတၢႆ ။ ႁဝ်းပဵၼ်ၵူၼ်းမႃးၵေႃႉၼိုင်ႈၼႆႉ ၽႂ်ၵေႃႈလီ ၊ ပီႈၼွင်ႉဢိင်းၵလဵတ်ႈၶဝ်ၵေႃႈ လူဝ်ႇႁဵတ်းၵၢၼ်ဢိင်းၵလဵတ်ႈၶဝ် ၊ ပီႈၼွင်ႉတႆးၵေႃႈ တေလႆႈႁဵတ်းၵၢၼ်တႆးႁဝ်း ။ ၼႆႉပဵၼ်ပုၼ်ႈၽွၼ်းၵူၼ်းၵေႃႉၼိုင်ႈ ။ ပေႃးဝႃႈၵူၼ်းမီးၸၼ်ႉတႄႉ မၼ်းတေလႆႈႁဵတ်းယဝ်ႉ ။ ႁဝ်းႁဵတ်းၵၢၼ်ပၢႆးမိူင်းၼႆႉ ႁဝ်းၶႂ်ႈႁႂ်ႈပေႃႈမႄႈၵူၼ်းမိူင်းႁဝ်း ၊ ၸၢဝ်းၶိူဝ်းတႆးႁဝ်း ၊ ၵူၼ်းမိူင်းတႆးႁဝ်းၶိုၼ်ႈယႂ်ႇမႂ်ႇသုင်ၵူၺ်း ။ ၵွပ်ႈပိူဝ်ႈဝႃႈ ႁဝ်းလႆႈလွတ်ႈလႅဝ်းသဝ်းၶေႃမႃး ပီမၼ်းမီး 60 ပီပၢႆၼႆႉ မိူင်းတႆးႁဝ်းၼႆႉ လွင်ႈၵတ်းယဵၼ် လွင်ႈၶိုၼ်ႈယႂ်ႇမႂ်ႇသုင် ဢမ်ႇၶိုတ်းပိူၼ်ႈ ။


ၼႂ်းၸိုင်ႈမိူင်းႁူမ်ႈတုမ်ၼႆႉ ႁဝ်းႁွတ်ႈၽႅဝ်ၵႂႃႇ ၼႂ်းမိူင်းတႆးႁဝ်းၵူႈဝဵင်းဝဵင်းၼႆႉ မိူၼ်ၼင်ႇၼႂ်းပိုၼ်ႉတီႈ တႆးႁဝ်းယူႇၼမ် ၸႄႈတွၼ်ႈလွႆလႅမ် ၊ ၸႄႈတွၼ်ႈလၢင်းၶိူဝ်းၸိူဝ်းၼႆႉ ပေႃးတႅၵ်ႈၵၼ်တင်း ၸႄႈတွၼ်ႈတူၼ်ႈတီး မၼ်းတိုၵ်ႉတူၵ်းတႅမ်ႇယူႇ ။ ဢၼ်တူၵ်းတႅမ်ႇၼႆႉ တၢင်းၵႂႃႇတၢင်းပႆယၢပ်ႇယဵၼ်း ၊ ဢမ်ႇလႆႈၵတ်းယဵၼ်လီလီ ၊ ၵူၼ်းမိူင်းၵေႃႈလႆႈၵူဝ်ႁႄ ၊ တၢင်းၸွႆႈထႅမ်ၼွၵ်ႈမိူင်းၶဝ် မႃးမိူဝ်ႈလႂ်ၵေႃႈ မႃးတီႈၸႄႈတွၼ်ႈတူၼ်ႈတီးတိၵ်းတိၵ်းၵူၺ်း ။ တၢင်းၸွႆႈထႅမ်တီႈ ၵျိူဝ်ႊမၼ်ႊၼီႊၵေႃႈလီ ၊ တီႈၵျပၼ်ႊၵေႃႈလီ မႃးတီႈတူၼ်ႈတီးသဵင်ႈသဵင်ႈ ။ လွင်ႈၼႆႉ ႁဝ်းၵႂႃႇတၢင်ႇတၢင်းၽိတ်းၶဝ်ၵေႃႈဢမ်ႇလႆႈ ၊ ၵွပ်ႈမၼ်းဢမ်ႇလႆႈၵတ်းယဵၼ် ၊ ၶဝ်ၵေႃႈၵူဝ်သေ ဢမ်ႇႁတ်းၵႂႃႇ ။ ၵွပ်ႈပိူဝ်ႈၼႆ ႁဝ်းၸင်ႇဝႃႈ မိူင်းႁဝ်းၼႆႉလူဝ်ႇႁႂ်ႈလႆႈၵတ်းယဵၼ် ၊ ပေႃးလႆႈၵတ်းယဵၼ်ယဝ်ႉ သုၼ်ႇလႆႈၵေႃႈတေလႆႈၽဵင်ႇပဵင်းၵၼ် ။


မိူင်းႁဝ်းၼႆႉ မၼ်းထုၵ်ႇလႆႈပဵၼ် ၸိုင်ႈမိူင်းႁူမ်ႈတုမ်ၾႅတ်ႊၻရႄႊလ်ၸိုၼ်ႈၸၢင်ႇ ။ ပေႃးဢမ်ႇလႆႈ ဝၢၼ်ႈမိူင်းဢမ်ႇၶိုၼ်ႈယႂ်ႇမႂ်ႇသုင်လႆႈ ။ မိူဝ်ႈလႂ်မိူဝ်ႈလႂ်ၵေႃႈ ပေႃးပဵၼ်ၸိၵ်းၸွမ်ငဝ်ႈငုၼ်း ၵုမ်းၵမ် (ဢမ်းၼၢၸ်ႈ) ယူႇတိၵ်းတိၵ်း မၼ်းဢမ်ႇၽဵင်ႇပဵင်းၵၼ်လႆႈ ၊ မၼ်းဢမ်ႇၶိုၼ်ႈယႂ်ႇမႂ်ႇသုင် ။ ပေႃးဝႃႈမိူင်းႁဝ်းလႆႈၾႅတ်ႊၻရႄႊလ်ၼႆ မိူင်းတႆး တႆးႁဝ်းလႆႈၽွင်းငမ်းဝၢၼ်ႈမိူင်းႁဝ်း ၊ ဢမ်ႇလႆႈၵူဝ်လႆႈႁႄ ၊ ဢၼ်တဵၵ်းတဵင်ၵေႃႈဢမ်ႇမီး ၊ ဢၼ်ဢမ်ႇသိုဝ်ႈသႂ်ၵေႃႈဢမ်ႇမီး ၊ ဢၼ်ဝႃႈ ၶႅပ်းၵၢင်ၸႂ်လူင်ႈၼႃႈၵေႃႈ တေဢမ်ႇမီး ။ ပေႃးဝႃႈဢမ်ႇမီးၶႅပ်းၵၢင်ၸႂ်လူင်ႈၼႃႈၸိုင် ႁူဝ်ပဝ်ႈႁၼ်ဝႃႈ ပႃႊတီႊတႆးတေပေႉ ဢမ်ႇႁၢင်ႉယဝ်ႉ ။ ပေႃးပႃႊတီႊတႆးပေႉၼမ်ၼႆႉ လူင်ပွင်ၸိုင်ႈမိူင်းတႆးၵေႃႈ တေပဵၼ်တႆးၵူၺ်းယဝ်ႉ ။


ပေႃးဝႃႈလူင်ပွင်ၸိုင်ႈမိူင်းတႆး ပဵၼ်တႆးၼႆ တႆးႁဝ်းၵေႃႈ တေလႆႈႁၼ်ဝႃႈ ၼႂ်းမိူင်းတႆးၼႆႉ ၵူၼ်းတၢင်ႇၸၢဝ်းၶိူဝ်းမီးၼမ် ။ ဢၼ်ၶဝ်ဢဝ်သဵၼ်ႈမၢႆႁူဝ်ၵူၼ်း မိူဝ်ႈလိူၼ်မၢတ်ႊၶျ် ပီ 2014 ၼႆႉ ၼႂ်းၵႃႈၵူၼ်းႁူဝ်ပၢၵ်ႇ (100) ၼႆႉ တႆးႁဝ်းဢမ်ႇမီးၶိုင်ႈၼိုင်ႈ ။ ၼႂ်းၵႃႈႁူဝ်ပၢၵ်ႇၼႆႉ တႆးႁဝ်းၼႂ်းမိူင်းတႆး ဢၼ်မၢၼ်ႈဢွၵ်ႇသဵၼ်ႈမၢႆမႃးၼႆႉ တႆးၸိုၼ်ႈတႆးၸၢင်ႇမီး 2 လၢၼ်ႉ (2,000,000) ပၢႆၵူၺ်း ။ ၼႂ်းမိူင်းတႆးၼႆႉ ႁူဝ်ၵူၼ်းသမ်ႉမီး 5 လၢၼ်ႉပၢႆ 8 သႅၼ် (5,800,000) ၊ (ႁူဝ်ၵူၼ်းၼႂ်းမိူင်းတႆး 58 သႅၼ်) ။ တႆးၸၢင်ႇတႆးၸိုၼ်ႈသမ်ႉမီး 22 သႅၼ် ။


ပိူင်တႅၵ်ႈမၼ်း ႁဝ်းတေၶႆႈၼႄ ၊ ဝၼ်းဢွၵ်ႇၶူင်းၼႆႉ ၵဵင်းတုင် ၊ ဝၼ်းဢွၵ်ႇၶူင်း 9 ဝဵင်းၼႆႉ တႆးႁဝ်းဢမ်ႇမီး 4 သႅၼ် ၊ ပဵၼ်ဢႃးၶႃႇ ၊ လႃးႁူႇ ၊ ဝႃႉ ၊ မၢၼ်ႈၼမ်သေႁဝ်း ။ မိူၼ်ၼင်ႇၼၼ် တီႈတူၼ်ႈတီးၼႆႉ (တွင်ႇၵျီး) ပႃးၸဵမ်ၼႃႈလိၼ်ၽွင်းငမ်းတူဝ်ၵဝ်ႇ ပဢူဝ်း / ထၼု ၸိူဝ်းၼႆႉတင်းမူတ်းမီး 10 ဝဵင်း ၊ ႁူဝ်ၵူၼ်းမီး 16 သႅၼ်ၼႆႉ တႆးဢမ်ႇမီး 3 သႅၼ် ။ ႁဵတ်းႁိုဝ် တႆးသမ်ႉဢေႇ ႁၢႆၵႂႃႇ ပၢႆႈၵႂႃႇလႂ်မူတ်း ။ တႆးႁဝ်းပၢႆႈၵႂႃႇယူႇမိူင်းထႆး မီး 1 လၢၼ်ႉပၢႆ ၶႂ်ႈမီး ၸမ်ၸမ် 2 လၢၼ်ႉ ။ လွင်ႈၼႆႉ ၽႅဝ်ၵႂႃႇတီႈပၢင်ၵုမ် 4 ၾၢႆႇဢုပ်ႇၵၼ်ၵေႃႈ ႁူဝ်ပဝ်ႈလၢတ်ႈ ။


လွင်ႈၼႆႉ မိူဝ်ႈပီ 1996-97 ၵွပ်ႈပိူဝ်ႈပဵၼ်သိုၵ်းပဵၼ်သိူဝ်သေ ပီႈၼွင်ႉတႆးႁဝ်းလႆႈပၢႆႈၵႂႃႇမိူင်းထႆးၼႆႉ ၼမ်ၼႅၼ်ႇ ။ မိူၼ်ၼင်ႇတီႈမိူင်းပၼ်ႇၼႆႉ ဝၢၼ်ႈမၢင်ဝၢၼ်ႈႁၢႆလၢႆၵႂႃႇတင်းဝၢၼ်ႈ ၊ ဝၢၼ်ႈႁၢမ်းၵႂႃႇၼမ်ဝႃႈၼမ် ။ ၵွပ်ႈၼႆ တႆးႁဝ်းၵႂႃႇမီးတီႈမိူင်းထႆးတင်းၼမ် ။ တႆးဢၼ်ၵႂႃႇယူႇမိူင်းထႆးၼႆႉ ၶဝ်သမ်ႉတေၶႂ်ႈပွၵ်ႈမႃးၶိုၼ်းယူႇႁႃႉ ဢၼ်ၼႆႉၵေႃႈ မၼ်းပဵၼ်ၵၢင်ၸႂ်ၶဝ် ၊ ၵွပ်ႈပိူဝ်ႈဝႃႈ ယူႇမိူင်းထႆးၼႆႉ မၼ်းၵတ်းယဵၼ်လီ ၊ လွတ်ႈလႅဝ်းလီ ၊ ၵၢၼ်ငၢၼ်းၵေႃႈမီး ။ ဢၼ်ၼႆႉ ပေႃးဝႃႈ ၶဝ်ႁၵ်ႉဝၢၼ်ႈႁၵ်ႉမိူင်းတႆးႁဝ်းသေ ၶဝ်ၶႂ်ႈၶိုၼ်းမိူဝ်းမႃးသေတႃႉၵေႃႈ ၵၢၼ်ငၢၼ်းၵေႃႈႁဝ်းသမ်ႉ ပႆႇပႃႈႁဵတ်းပၼ်လႆႈ ၊ ပိူဝ်ႈတႃႇၶဝ်တေၵိၼ်ၵႂႃႇၵူႈမိုဝ်ႉၵူႈဝၼ်း ။ မိူင်းႁဝ်း တင်းမိူင်းထႆးၼႆႉ ပေႃးမႃးတႅၵ်ႈၼိူင်းၵၼ် မိူင်းထႆးမၼ်းလွတ်ႈလႅဝ်းလီ ၊ ၵတ်းယဵၼ်လီ ၊ လုၵ်ႈလၢင်းၶဝ်ၵေႃႈ လႆႈၶိုၼ်ႈႁူင်းႁဵၼ်းလီလီ ။ ပိူဝ်ႈတႃႇမိူဝ်းၼႃႈလုၵ်ႈလၢင်းၶဝ်ၵေႃႈ လႆႈလီ ၊ မိူင်းထႆးၼႆႉ ယႃႈမဝ်းၵမ်ၵေႃႈ ဢမ်ႇပေႃးလႆႈၵူဝ် ။ ၵူၼ်းမိူင်းတႆးၵမ်ႈၽွင်ႈ ပေႃးလုၵ်ႈလၢင်းၶဝ်ယႂ်ႇမႃး ၵူဝ်ပဵၼ်ၶီႈယႃႈၸိူဝ်းၼႆႉသေ ၵႂႃႇယူႇပႅတ်ႈမိူင်းထႆး ၵေႃႈမီးၼမ်ၼႅၼ်ႇ ၊ ဢၼ်ၼၼ်ႉၵေႃႈပဵၼ်ပၼ်ႁႃလူင် ။


ဢွၼ်တၢင်းၼႆႉ တီႈမိူင်းတႆးၼႆႉ ႁဝ်းဝႃႈတႆးမီးၼမ် ။ တႆးႁဝ်းႁူဝ်ၵူၼ်းၼမ်သေတႃႉ ၵွပ်ႈပိူဝ်ႈလွင်ႈတၢင်းၵူႈၸိူဝ်ႉၵူႈပိူင်သေ ပီႈၼွင်ႉတႆးႁဝ်း ပၢႆႈၵႂႃႇယူႇမိူင်းထႆး ၼမ်ၼႅၼ်ႇ ၊ တႆးႁဝ်းမၼ်းဢေႇမၢင်ၵႂႃႇတႄႉတႄႉ ။ ၵွပ်ႈၼႆ ယူႇတီႈႁဝ်းတႄႉ ႁဝ်းၶႂ်ႈလႆႈၵတ်းယဵၼ် ၊ ပေႃးဢမ်ႇလႆႈၵတ်းယဵၼ်ၼႆ ဝၢၼ်ႈမိူင်းၼႆႉ မၼ်းဢမ်ႇၶိုၼ်ႈယႂ်ႇမႂ်ႇသုင် ၊ ႁဝ်းလၢတ်ႈယူႇတႃႇသေႇ ။


မိူၼ်ၼင်ႇ ၶႂ်ႈလႆႈလွင်ႈၵတ်းယဵၼ်ၼႆႉ မိူဝ်ႈပူၼ်ႉမႃး လိူၼ်ၼူဝ်ႊဝႅမ်ႊၿိူဝ်ႊ 15 ဝၼ်းၼႆႉ ဢူးတဵင်းၸဵင်ႇ ႁွင်ႉၽူႈၼမ်းပႃႊတီႊ 86 ပႃႊတီႊသေ ၵႂႃႇႁဵတ်းပၢင်ၵုမ်တီႈ လုမ်းလူင်ပွင်ၸိုင်ႈ တႃႈၵုင်ႈ ။ မိူဝ်ႈၼၼ်ႉ ႁူဝ်ပဝ်ႈၵေႃႈ တုၵ်းယွၼ်းဝႃႈ - ႁႂ်ႈၵိုတ်းသိုၵ်းပၼ်တီႈဝၢၼ်ႈႁႆး ။ ၵွပ်ႈပိူဝ်ႈဝႃႈ ပဵၼ်သိုၵ်းပဵၼ်သိူဝ်တီႈဝၢၼ်ႈႁႆးသေ ပေႃႈမႄႈၵူၼ်းမိူင်းၼႆႉ ၸိူဝ်းလႆႈတၢႆၵေႃႈတၢႆ ၊ ၸိူဝ်းလႆႈဝၢတ်ႇၵေႃႈဝၢတ်ႇ ။ ၵမ်ႈၽွင်ႈၵေႃႈပၢႆႈၽေး ပၢႆႈမႃးတီႈမိူင်းသူႈ ၵေးသီး လၢႆးၶႃႈ တူၼ်ႈတီး ၊ ၵမ်ႈၽွင်ႈၵေႃႈၽႅဝ်ၵႂႃႇတီႈလႃႈသဵဝ်ႈ ၊ မၼ်းၸွတ်ႇၵႂႃႇမူတ်းယဝ်ႉ ။ ဢၼ်ၼႆႉ ၸွမ်ၸိုင်ႈလူင် ၶႅၼ်းတေႃႈႁႂ်ႈၵိုတ်းသိုၵ်းပၼ်သေၵမ်းၼႆ ။ လွင်ႈၼႆႉ မိူဝ်ႈလိူၼ်ၼႆႉ (ၼူဝ်ႊဝႅမ်ႊၿိူဝ်ႊ) 15 ဝၼ်း ႁူဝ်ပဝ်ႈတုၵ်းယွၼ်း တီႈၸွမ်ၸိုင်ႈ ၊ ထိုင်မႃးလိူၼ်ၼႆႉ 19 ဝၼ်းၵေႃႈၵိုတ်းၵႂႃႇယဝ်ႉ ။


ႁူဝ်ပဝ်ႈၶိုၼ်းဝႃႈထႅင်ႈ ၵိုတ်းသိုၵ်းသေတႃႉၵေႃႈယႃႇ ဢၼ်ပေႃႈမႄႈၵူၼ်းမိူင်းတုၵ်ႉၶယူႇ ၊ ၵူၼ်းၸိူဝ်းၼႆႉၵေႃႈ လူင်ပွင်ၸိုင်ႈ ထုၵ်ႇလႆႈဢဝ်ပုၼ်ႈၽွၼ်းသေ ပိူဝ်ႈတႃႇၶဝ်တေလႆႈယူႇလႆႈၵိၼ်ၼၼ်ႉၵေႃႈ လူဝ်ႇၸွႆႈထႅမ်ပၼ် ။ ယူႇတီႈလူင်ပွင်ၸိုင်ႈမိူင်းတႆးၵေႃႈ ၸွႆႈပၼ်တၢင်းၵိၼ်တၢင်းယႅမ်ႉယဝ်ႉ ။ လိူဝ်သေၼၼ်ႉ ဢူးတဵင်းၸဵင်ႇၵေႃႈ မိူဝ်ႈဝၼ်းၵိုတ်းသိုၵ်းၼၼ်ႉ သိုပ်ႇၾူၼ်ႊမႃးတီႈ ၽွင်းလူင် (ပူဝ်ႇမူးၵျီး) ၸူဝ်းမူဝ်းဢွင်ႇသေ သူင်ႇၶဝ်ႈမႃးၵႃးလမ်းၼိုင်ႈယဝ်ႉ ။ ႁူဝ်ပဝ်ႈၵေႃႈလၢတ်ႈတီႈ ၽူႈၵွၼ်းၸႄႈတွၼ်ႈ ႁႂ်ႈမၼ်းလႆႈၽႅဝ်ၼႂ်းမိုဝ်း ၵူၼ်းပၢႆႈၽေး ၊ ႁႂ်ႈလႆႈမႅင်ႇၵၼ် ၽဵင်ႇပဵင်းၵၼ် ။ ဢၼ်ၼႆႉ ၶဝ်ပွင်ႇၶၢဝ်ႇမႃးဝႃႈ ၶဝ်သၢၼ်ၵေႃႈတေမႃးထႅင်ႈယူႇ ၼႆ ။


ယူႇတီႈပႃႊတီႊသိူဝ်ၽိူၵ်ႇႁဝ်းၵေႃႈ ငိုၼ်းၵွင်ၵၢင်ႁဝ်းဢေႇသေတႃႉၵေႃႈ ႁဝ်းသိုဝ်ႉၶဝ်ႈ ၵႂႃႇလူႇတၢၼ်းပၼ် တီႈပေႃႈမႄႈၵူၼ်းမိူင်း တီႈမိူင်းသူႈ တႃႇငိုၼ်း 5 သႅၼ် ၊ ၵေးသီး 5 သႅၼ် ၊ တီႈလၢႆးၶႃႈၵေႃႈ ဢဝ်ငိုၼ်းသူင်ႇၵႂႃႇ 5 သႅၼ်သေ သိုဝ်ႉၶဝ်ႈလူႇတၢၼ်းပၼ်ၵူၼ်းပၢႆႈၽေး ။ တီႈတူၼ်ႈတီးၵေႃႈ ႁဝ်းတေသိုဝ်ႉၶဝ်ႈ 5 သႅၼ်သေ ၵႂႃႇလူႇတၢၼ်းတီႈ ဝတ်ႉ / ၵျွင်းဝေလုဝၼ်။ ႁဝ်းမီးဢဵၼ်းဢဵၼ်း ။


ႁဝ်းယူႇတႃႈၵုင်ႈၼႆႉမီး 5 ပီမိူင်းယဝ်ႉ ။ တီႈတႃႈၵုင်ႈၼႆႉ မၼ်းဢမ်ႇမီးၽေးသိုၵ်းသင် ၊ မၼ်းၵတ်းယဵၼ် ။ ႁဝ်းမႃးၽႅဝ်တီႈမိူင်းၸႃႇတိႁဝ်း မိူင်းတီႈၾင်ႁူၵ်ႉၾင်ႁႄႇႁဝ်းၼႆႉ ဝၢၼ်ႈမိူင်းပႆႇပႃႈၵတ်းယဵၼ် ။ ၵွပ်ႈဝၢၼ်ႈမိူင်းပႆႇပႃႈၵတ်းယဵၼ်လႄႈ ၵူၼ်းမိူင်းႁဝ်းဢမ်ႇၸၢင်ႈႁဵတ်းၵၢၼ် ၊ ႁဵၼ်းသွၼ်ပၺ်ၺႃၵေႃႈ ဢမ်ႇလႆႈႁဵၼ်းလီလီ ၊ ပၢႆးယူႇလီၵေႃႈ ဢမ်ႇလႆႈႁဵတ်းၶႅမ်ႉလႅပ်ႈ ၊ သဵၼ်ႈတႃႈသၢႆတၢင်းၵေႃႈဢမ်ႇၶႅမ်ႉ ၊ ၾႆးၾႃႉၼႆၵေႃႈ ဢမ်ႇလႆႈၵုမ်ႇထူၼ်ႈ ၊ မိူင်းတႆးႁဝ်းၼႆႉ မၼ်းတူၵ်းတႅမ်ႇတႄႉတႄႉ ၊ ႁဝ်းၵေႃႈၶႂ်ႈႁႂ်ႈၶိုၼ်ႈယႂ်ႇမႂ်ႇသုင် ။


(ပႂ်ႉသိုပ်ႇဢၢၼ်ႇတွၼ်ႈ 4)