ၸဝ်ႈပၢႆးမွၼ်းလႄႈၵူၼ်းၼုမ်ႇတႆး ဢွၼ်ၵၼ်ႁႃငိုၼ်း ၸွႆႈထႅမ်ၵူၼ်းပၢႆႈၽေး



ၸုမ်းပၢႆးမွၼ်းတႆးလႄႈ ၵူၼ်းၼုမ်ႇၼႂ်းမိူင်းတႆး လၢႆလၢႆၸုမ်းလၢႆလၢႆတီႈ လႆႈဢွၼ်ၵၼ်ဢွၵ်ႇမႃးတူင်ႉၼိုင် တူၵ်းသူး ႁႃငိုၼ်းၵွင်ၵၢင် လၢႆလၢႆတီႈလၢႆလၢႆဝဵင်း ၼႂ်းၸိုင်ႈတႆး ၊ လႆႈငိုၼ်းႁိမ်း 20 လၢၼ်ႉၵျၢတ်ႈသေ ဢဝ်ၵႂႃႇၸွႆႈထႅမ် ၵူၼ်းပၢႆႈၽေး တီႈဝၢၼ်ႈဝႃႉ ။


တႄႇဝၼ်းတီႈ 17-24/11/2015 ၼၼ်ႉ ၸုမ်းပၢႆးမွၼ်းတႆး ( ၸၢႆးဢွင်ႇထီးၶမ်း ၊ ၸၢႆးပလႅၵ်ႊႁူဝ်ႊလ် ၊ ပိုၼ်း ၊ လၢဝ်မိူင်းယၢဝ်း ၊ ၸၢႆးၼွင်ႉ ၊ ၸၢႆးတၢၼ်ႉႁဵင်း ) လႄႈၵူၼ်းၼုမ်ႇၼႂ်းမိူင်းတႆး လၢႆလၢႆၸုမ်းလၢႆလၢႆဝဵင်း  ဢွၼ်ၵၼ်ဢွၵ်ႇမႃးတူင်ႉၼိုင် တူၵ်းသူး / ႁွင်ႉၽဵင်းၵႂၢမ်း ႁႃငိုၼ်းၵွင်ၵၢင် လၢႆလၢႆတီႈ လၢႆလၢႆဝဵင်း ၼႂ်းၸိုင်ႈတႆး ၊ လႆႈငိုၼ်းႁူဝ်ပၢၵ်ႇသႅၼ်သေ ဢဝ်ၵႂႃႇၸွႆႈထႅမ် ၵူၼ်းပၢႆႈၽေး တီႈဝၢၼ်ႈဝႃႉ ဢိူင်ႇဝၢၼ်ႈဝႃႉ ၸႄႈဝဵင်းၵေးသီး - ၵူၼ်းၼုမ်ႇ ၽူႈၶဝ်ႈႁူမ်ႈတူင်ႉၼိုင် ၼႂ်းၶၢဝ်းတၢင်းၸွႆႈထႅမ်ၵူၼ်းထူပ်းၽေးသိုၵ်း ၸၢႆးၵွၼ်း လၢတ်ႈ ။


သိုပ်ႇလၢတ်ႈဝႃႈ - ဝၼ်းတီႈ 17-18 လႆႈႁဵတ်းပၢင်တူၵ်းသူး တီႈတူၼ်ႈတီး ။ ဝၼ်းတီႈ 19 တီႈမိူင်းပွၼ် ၊ ဝၼ်းတီႈ 20 တီႈပၢင်လူင် / လွႆလႅမ် ၊ 21 ၼမ်ႉၸၢင် ။ ဝၼ်းတီႈ 22 လႄႈ 23 ၼႆႉ ယိူင်းဢၢၼ်းဝႆႉတီႈလၢႆးၶႃႈ ၊ မိူင်းၵိုင်လႄႈၵေးသီး ။ ၵူၺ်းၵႃႈ ၽိူဝ်ႇႁဝ်းၶႃႈၵႂႃႇၽႅဝ်တီႈလၢႆးၶႃႈ ဝၼ်းတီႈ 23 ၼၼ်ႉ ၶိုၼ်းလႅၵ်ႈလၢႆႈ ၶၢဝ်းတၢင်း ။ တီႈလၢႆးၶႃႈၼၼ်ႉ ၵႂႃႇလဝ်ႇမူၼ်ႈတူၼ်ႈၸႂ်ပၼ်သေ ၵႂႃႇပၼ်ႁႅင်းပီႈၼွင်ႉၸိူဝ်းထူပ်းၽေး ၸိူဝ်းဢၼ်ပၢႆႈမႃးမီးတီႈဝတ်ႉ (ၵျွင်း) လၢႆးၶႃႈၼၼ်ႉ ၊ တီႈၼၼ်ႈ ဢမ်ႇသိုပ်ႇတူၵ်းသူးယဝ်ႉ ။ တူၼ်ႈတီး မိူင်းပွၼ် လွႆလႅမ် ပၢင်လူင် ၼမ်ႉၸၢင်ၸိူဝ်းၼႆႉ လႆႈငိုၼ်း 190 သႅၼ် ။


ၶၢဝ်းတၢင်းၼႆႉ လႆႈႁူပ်ႉၵူၼ်းပၢႆႈၽေး တီႈလၢႆးၶႃႈ ဢၼ်လုၵ်ႉတၢင်းမိူင်းၼွင်မႃး ။ လႆႈပၼ်လွင်ႈဢုၼ်ႇၸႂ် ႁႅင်းၸႂ်သေ လႆႈပူၼ်ႉၵႂႃႇတီႈဝၢၼ်ႈဝႃႉ ။ ငိုၼ်းဢၼ်ႁပ်ႉတၢင်းၸွႆႈ လႆႈမႃးတင်းမူတ်းၼၼ်ႉၵေႃႈ လႆႈၵႂႃႇမွပ်ႈဢၢပ်ႈပၼ်တီႈဝၢၼ်ႈဝႃႉ တင်းမူတ်း ။ ၵွပ်ႈဝႃႈ တီႈလၢႆးၶႃႈၼႆႉ ၶဝ်ၵုမ်ႇထူၼ်ႈဝႆႉ တႃႇၶၢဝ်းတၢင်းမွၵ်ႈ 1 လိူၼ်ယဝ်ႉ ။ တီႈဝၢၼ်ႈဝႃႉၼႆႉၸဝ်ႈပၢႆးမွၼ်းၶဝ်လၢႆၵေႃႉလႄႈ ၵူၼ်းၼုမ်ႇၶဝ် လႆႈၵႂႃႇပၼ်ႁႅင်းၸႂ် ၵူၼ်းပၢႆႈၽေး၊ လူၺ်ႈဢဝ်ၽဵင်းၵႂၢမ်း “တႆး” လဝ်ႇမူၼ်ႈတူၼ်ႈၸႂ်ပၼ် ၊  ႁႂ်ႈၵူၼ်းပၢႆႈၽေးၶဝ်လိုမ်းပႅတ်ႈ တၢင်းတုၵ်ႉၶၸူဝ်ႈၵႅပ်ႉသေ ဢုပ်ႇဢူဝ်းၵၼ် ။ မိူဝ်ႈၽွင်းႁွင်ႉၽဵင်းၵႂၢမ်းၼၼ်ႉ မၢင်ၵေႃႉဢမ်ႇယိူၼ်ႉလႆႈသေ ၼမ်ႉတႃယိုင်ႈႁူၺ်ႇ ၊ မၢင်ၵေႃႉပေႃး ႁႆႈသိုတ်ႉသိုတ်ႉၸိူဝ်းၼႆႉၵေႃႈမီးယူႇ - ၸၢႆးၵွၼ်းလၢတ်ႈ ။


မိူဝ်ႈၽႅဝ်တီႈဝၢၼ်ႈဝႃႉၼၼ်ႉ မႅၼ်ႈၽွင်းမိူဝ်ႈ သင်ၶၸဝ်ႈၶဝ်တၢင်းၼမ်ႉလၼ်ႈ မႃးယဵမ်ႈၵူၼ်းထူပ်းၽေး ၊ ၶူဝ်းၶွင်ၸိူဝ်းလႆႈမႃးၼၼ်ႉ  ၶႃႈႁဝ်းၶဝ်ၵေႃႈ လႆႈဢဝ်လူႇတၢၼ်း ယၢတ်ႇၼမ်ႉၶႂမ်ႈတဝ်းၵႂႃႇ ။ တီႈဝၢၼ်ႈဝႃႉၼႆႉ ဢၼ်လီမႆႈၸႂ် ပဵၼ်လွင်ႈပၢႆးယူႇလီ ၊ လုၵ်ႈဢွၼ်ႇၶဝ်ၼႆႉ ၼိုင်ႈဝၼ်း ဢၼ်ၸပ်းတၢင်းပဵၼ်တွင်ႉမီးယူႇမွၵ်ႈ 10 ၵေႃႉ ။ တႃႇၶၢဝ်းယၢဝ်းတႄႉ လီမႆႈၸႂ်ယူႇ ။


ၶၢဝ်းတၢင်းပွၵ်ႈၼႆႉ ပီႈၼွင်ႉၵူၼ်းမိူင်းတႆးၵေႃႈ ႁူမ်ၸူမ်းႁပ်ႉတွၼ်ႈသေ ၶဝ်ႈၸွႆႈၶိုင်ပွင်ၸွမ်း ။ ၵူၼ်းၼုမ်ႇၶဝ်လၢႆတီႈလၢႆဝဵင်း ဢွၼ်ၵၼ်ဢဝ်ဢဵၼ်ဢဝ်ႁႅင်းသေ ၶဝ်ႈမႃးၸွႆႈၵေႃႈမီး ။ ၶၢဝ်းတၢင်းၵေႃႈ ဢမ်ႇထူပ်းတၢင်းယၢပ်ႇၽိုတ်ႇသင် ။ ၵူၺ်းၵႃႈ မိူဝ်ႈၵႂႃႇၽႅဝ်တီႈဝၢၼ်ႈဝႃႉၼၼ်ႉ တိုၵ်းယိၼ်းသဵင်ၵွင်ႈသဵင်မၢၵ်ႇယူႇ ။ ယွၼ်ႉဢမ်ႇပဵၼ်ပၢင်တိုၵ်းယဝ်ႉသေ ၵူၼ်းပၢႆႈၽေးသိုၵ်းၶဝ် ပွၵ်ႈမိူဝ်းႁဵတ်းၵၢၼ်ပၢတ်ႇၶဝ်ႈၸိူဝ်းၼႆႉ တိူဝ်ႉဝၢတ်ႇမႃး 2 ၵေႃႉ ။ တႃႇၸုမ်းၸဝ်ႈပၢႆးမွၼ်းၶဝ်ၼႆႉ မိူဝ်းၼႃႈမႃး ထုၵ်ႇလီၸွႆႈထႅင်ႈၸိူင်ႉႁိုဝ်ၵေႃႈ ႁၢင်ႈႁႅၼ်းတူဝ်ႈတၼ်းဝႆႉယူႇ - ဝႃႈၼႆ ။


ၶႂ်ႈႁႂ်ႈပီႈၼွင်ႉတႆးႁဝ်း ဢွၼ်ၵၼ်တူင်ႉတိုၼ်ႇ ၶဝ်ႈၸႂ်ပၼ်လွင်ႈပီႈၼွင်ႉၵူၼ်းထူပ်းၽေး ဢၼ်တူၵ်းၵိၼ်းယူႇၼႆႉသေ ဢွၼ်ၵၼ်တုၵ်းယွၼ်း ႁႂ်ႈဢဝ်လၢႆးၵၢၼ်မိူင်းသေၵႄႈလိတ်ႈပၼ် ၊ ႁႂ်ႈၵိုတ်းယိုဝ်းပၼ် ။ မိူင်းႁဝ်းၼႆႉ မၼ်းတိုၵ်ႉပဵၼ်ၶၢဝ်းႁဵတ်းၵၢၼ် ၊ ၶၢဝ်းဢဝ်ၶဝ်ႈဢဝ်ၼမ်ႉ ၊ ၵွပ်ႈၼၼ် ႁႂ်ႈဢွၼ်ၵၼ်တုၵ်းယွၼ်းပၼ် ႁႂ်ႈၵိုတ်းပၼ်ပၢင်တိုၵ်း - ၸၢႆးၵွၼ်း တိုၵ်းသူၼ်းပႃးၼင်ႇၼႆ ။    




 
© 2012 All Rights Reserved | Asean Celebrity | Fonts @ AtFonts | Free Templates