ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၵႃလိ ဢွၼ်ႁူဝ်ၼမ်းၼႃႈ ၼုမ်ႇႁၢႆးၸၢႆးယိင်း ထုင်ႉၵုၼ်ပၢင်ၵုၼ်ၶူင်း ထုင်ႉၵႃလိ - ၵုၼ်ႁဵင် ၸတ်းႁဵတ်းပၢင်တိူင်ႇၵၢဝ်ႇ ႁႂ်ႈၵူၼ်းမိူင်းတႆးပူၼ်ႉၽေးသိုၵ်း ။

ဝၼ်းတီႈ 26/11/2015 ဝၼ်းလိူၼ်မူၼ်း ၶၢဝ်းယၢမ်း 18:00 မူင်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၵႃလိ ဢွၼ်ႁူဝ်ၼမ်းၼႃႈ ၼုမ်ႇႁၢႆးၸၢႆးယိင်း ထုင်ႉၵုၼ်ပၢင်ၵုၼ်ၶူင်း ၵႃလိ - ၵုၼ်ႁဵင် ႁူမ်ႈၵၼ်ၸတ်းႁဵတ်းပၢင်တိူင်ႇၵၢဝ်ႇဝႆႈဝၢၼ်း တီႈဝတ်ႉၼႃးသေႇ ဝဵင်းၵုၼ်ႁဵင် တုၵ်းယွၼ်းလူင်ပွင်ၸိုင်ႈမၢၼ်ႈ ၵိုတ်းပၢင်တိုၵ်းၼႂ်းမိူင်းပတ်ႉပိုၼ်ႉဝႆးဝႆး ႁႂ်ႈၵူၼ်းမိူင်းတႆး လႆႈယူႇလီၵတ်းယဵၼ် ပူၼ်ႉၽေးၶဵၼ် ။


ၸၢႆးႁၢၼ်ၶိူဝ်း ၽူႈတိတ်းတေႃႇၵၢပ်းသိုပ်ႇ ၵူၼ်းၼုမ်ႇၵေႃလိၵ်ႈလၢႆးလႄႈၾိင်ႈငႄႈတႆး ၵႃလိ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ ယိူင်းဢၢၼ်းလွင်ႈဢၼ်ႁဝ်းၶႃႈတူင်ႉၼိုင် ၼႂ်းဝၼ်းလိူၼ်သိပ်းသွင်မူၼ်းၼႆႉ ႁဝ်းဢွၼ်ၵၼ်တႆႈတဵၼ်း  ႁဵတ်းၵွၵ်းသွမ်းတေႃႇ 108 ၵွၵ်းသေ ၸူဝ်းၵၼ်ၵႂႃႇပွႆႇလွင်ႈတီႈၼမ်ႉပၢင် ဢွၼ်ၵၼ်ယွၼ်းၽပွလ်းပၼ် ၵူၼ်းထူပ်းၽေးသိုၵ်းၼႂ်းမိူင်းႁဝ်းလႄႈ တုၵ်းယွၼ်းထိုင်လူင်ပွင်ၸိုင်ႈၵိုတ်းပၢင်တိုၵ်းဝႆးဝႆး  ဝႃႈၼႆ ။


ၽူႈၵွၼ်းဝတ်ႉၼႃးသေႇ ဝဵင်းၵုၼ်ႁဵင် လၢတ်ႈတီႈၸုမ်းၶၢဝ်ႇၽူႇတွႆႇႁွၵ်ႈဝႃႈ ႁဝ်းသင်ၶၸဝ်ႈၵေႃႈ ဢွၼ်ႁူဝ်ၼုမ်ႇႁၢႆးၸၢႆးယိင်းသေ လွတ်ႈၵႂၢမ်းတၢင်ႇသွမ်းၸဝ်ႈဢုပတ်ႉၵုတ်ႉ ပိုၼ်ၽေၵုသူလ် ၊ ၼွၵ်ႈလိူဝ်သေၼႆ ႁဝ်းၸဝ်ႈလႄႈ ၼုမ်ႇႁၢႆးၸၢႆးယိင်းတင်းသဵင်ႈ ႁူမ်ႈၵၼ်ဢတိတ်ႉထၢၼ် သူင်ႇမႅတ်ႉတႃႇပၼ် ပေႃႈမႄႈပီႈၼွင်ႉၸိူဝ်းလႆႈထူပ်းၽေးသိုၵ်းၼႂ်းမိူင်းတႆးတင်းသဵင်ႈ ဝႃႈၼႆ ။


ၼုမ်ႇႁၢႆးၸၢႆးယိင်း ထုင်ႉၵုၼ်ပၢင်ၵုၼ်ၶူင်း ႁူမ်ႈႁႅင်းၵၼ်တင်းမူတ်း 100 ပၢႆသေ ၵူႈၵေႃႉၽွမ်ႉၵၼ်ဢၢၼ်ႇလွတ်ႈၸွမ်း ၶေႃႈဢတိတ်ႉထၢၼ်ႇ (ဝွၵ်း) -


ၸိူဝ်းႁဝ်းၶႃႈ ၵူႈယိင်းၸၢႆး         တိုတ်ႉတၢႆးႁူၺ်း ႁူမ်ႈၸုင်ၸၼ်
ၽွမ်ႉၵၼ် ပဵၼ်ၶေႃႈသဵင်လဵဝ် ထုင်ႉၶဵဝ် ၵုၼ်ပၢင်ၵုၼ်ၶူင်း
ၽိုင်ႈႁူင်း ႁဝ်းၶွၼ်ႈပဵၼ်ၼိုင်ႈ မိူင်းၸိုင်ႈတႆး ထုင်ႉပွတ်းၸၢၼ်း
လူႇတၢၼ်း လွင်ႈၵွၵ်းသွမ်းတေႃႇ ၸဵမ်ဢေႃႇၸႃႇဢႁႃႇရ
တႃႇၼၼႆႉ ယိူင်းသူင်ႇပၼ် ၸိူဝ်းဢၼ် လႆႈထူပ်းၽေးသိုၵ်း
ပၢင်တို်ၵ်း ႁႂ်ႈဝၢႆးမွတ်ႇယဵၼ် ပိူင်ပဵၼ် ဢၼ်တိုၵ်ႉမီးဝႆႉ
ၾၢႆႇၼႆႉသဵင်ၵွင် ၾင်ႇပုၼ်ႉသဵင်ၵွင်ႈ ႁၢမ်ႈလွင်ႈတြႃးၽဵင်ႇပဵင်းလႄႈ
ၼႂ်းၵႄႈ သၢႆလိူၼ်လႅင်းၵိုၼ်း ၶမ်ႈၶိုၼ်း လိူၼ်သိပ်းသွင်မူၼ်း
တိုၵ်းသူၼ်းသုၼ်ႇလႆႈသုၼ်ႇပဵၼ် ၽေးၶဵၼ်ႁႂ်ႈပၢႆႈၵႆယၢၼ်
ၸၢတ်ႈပၢၼ်ၵတ်းယဵၼ်သိူဝ်းသႃႇ ႁႂ်ႈပဵၼ်တႃႇပီႈၼွင်ႉႁဝ်းတင်းသဵင်ႈသေၵမ်းႉႉႉႉႉႉ။