ပီႈၼွင်ႉတႆး ၼႂ်းမိူင်းယၢင်းၽိူၵ်ႇ ၸတ်းဝၼ်းၸိူဝ်ႉၸၢတ်ႈ ၸိုင်ႈတႆး 69 ပီ



ပီႈၼွင်ႉတႆးတီႈ ဝၢၼ်ႈတႆးမဵင်းမလႃႉၵျူၼ်း ၸႄႈဝဵင်းၽႃဢၢၼ်ႇ မိူင်းယၢင်းၽိူၵ်ႇ  ၸတ်းႁဵတ်းဝၼ်းၸိူဝ်ႉၸၢတ်ႈ ၸိုင်ႈတႆး ၶွပ်ႈၶူပ်ႇ 69 ပီ ။ မီးပီႈၼွင်ႉ မႃးၶဝ်ႈႁူမ်ႈ ပၼ်ႁႅင်း တင်းၼမ်လၢႆ ။


ဝၼ်းတီႈ 06/02/2016 ယၢမ်းႁူဝ်ၶမ်ႈ ပီႈၼွင်ႉတႆး ၼႂ်းဝၢၼ်ႈတႆး မဵင်းမလႃႉၵျူၼ်း ၸတ်းႁဵတ်း ပၢင်ပွႆးၶုၵ်း ထူပ်း ဝၼ်းၸိူဝ်ႉၸၢတ်ႈၸိုင်ႈတႆး တီႈႁူင်းႁဵၼ်းၼႂ်းဝၢၼ်ႈမဵင်းမလႃႉၵျူၼ်း ၸႄႈဝဵင်းၽႃဢၢၼ်ႇ ၸႄႈမိူင်း ယၢင်းၽိူၵ်ႇ ။ ယိူင်းဢၢၼ်းၵူဝ်ၵူၼ်းၼုမ်ႇလုၵ်ႈလၢၼ် လိုမ်းဝၼ်းၵိုၵ်းပိုၼ်း ဝၼ်းၸိူဝ်ႉၸၢတ်ႈလႄႈ  ၸင်ႇလႆႈ ၸတ်းႁဵတ်း ဝႃႈၼႆ ။


ၸဝ်ႈၶူး ဝိၸိင်ႇတ ၽူႈၶပ်ႉၶိုင်ပွင်ပဵၼ်ပၢင်ပွႆး လၢတ်ႈဝႃႈ  “ ယွၼ်ႉပဵၼ်ဝၢၼ်ႈတႆး ဢၼ်ယူႇၼႂ်းၵႄႈ ပီႈၼွင်ႉၵူၼ်းၶိူဝ်း ယၢင်းၽိူၵ်ႇ ၊ ပဢူဝ်း ၊ မွၼ်းလႄႈ မၢၼ်ႈ ၵူဝ်လုၵ်ႈဢွၼ်ႇၼႂ်းတႆး ယဵၼ်းပဵၼ်ပိူၼ်ႈၵႂႃႇ ။ ၵူဝ်ၶဝ်ဢမ်ႇႁူႉၸၵ်းတႆး ။ ၵူဝ်ၶဝ်လိုမ်းဝၼ်းၸိူဝ်ႉၸၢတ်ႈတႆး။  ၽူႈယႂ်ႇၵူၼ်းလူင် ၸင်ႇဢွၼ်ၵၼ် ၸတ်းပွႆး ” ဝႃႈၼႆ ။


ၼႂ်းဝၼ်းတီႈ 6 ႁူဝ်ၶမ်ႈ ၸဝ်ႈၶူးဝိၸိင်ႇတ လႆႈဢုပ်ႇၶႆႈသပ်းလႅင်း လွင်ႈပိုၼ်းတႆး ။ တႆးလုၵ်ႉလႂ်မႃး ယၢမ်ႈႁဵတ်း သင်မႃး ၸဵမ်ၸိူဝ်းၼႆႉ ။ မေႃသွၼ်တီႈႁူင်းႁဵၼ်း ၼႂ်းဝၢၼ်ႈသမ်ႉ သပ်းလႅင်းလၢတ်ႈၼႄ ဝၼ်းၸိူဝ်ႉၸၢတ်ႈ ၸိုင်ႈတႆး ႁဵတ်းႁိုဝ်ပဵၼ်မႃး (ပိုၼ်းပဵၼ်မႃး) ၸဵမ်ၸိူဝ်းၼႆႉ ။ ယွၼ်ႉပိူဝ်ႈၵူၼ်းၼႂ်းဝၢၼ်ႈ ဢၼ်မေႃလၢတ်ႈၵႂၢမ်းတႆး ဢေႇလူင်းတိၵ်းတိၵ်းယဝ်ႉလႄႈ လႆႈၸႂ်ႉတိုဝ်း တင်းၵႂၢမ်းမၢၼ်ႈ ဝႃႈၼႆ ။


ဝၼ်းတီႈ 7 ႁူဝ်ၶမ်ႈၵေႃႈ လုၵ်ႈႁဵၼ်းၸၼ်ႉဢွၼ်ႇ ၸၼ်ႉၵၢင် ႁူင်းႁဵၼ်းလူင်ပွင်ၸိုင်ႈ လႆႈဢဝ်တၢင်းၵႃႈ ၾိင်ႈငႄႈႁိတ်ႈႁွႆးတႆး မူၼ်ႈၸႂ်ပၼ်ပီႈၼွင်ႉမႃးပွႆး ။ ၼႂ်းဝၼ်းၼၼ်ႉၵူၺ်း ပီႈၼွင်ႉမႃးပွႆးပၼ်ႁႅင်း တွၼ်ႈငိုၼ်း လုၵ်ႈႁဵၼ်း 1,270,000 ပျႃး ၊ ၽူႈမႃးၶဝ်ႈႁူမ်ႈပၢင်ပွႆး ဝၼ်းၸိူဝ်ႉၸၢတ်ႈၸိုင်ႈတႆး ပႃးၸဵမ်ပီႈၼွင်ႉၸၢဝ်းၶိူဝ်း ပဢူဝ်း ၊ ယၢင်းၽိူၵ်ႇ ၊ မွၼ်း ၊ မၢၼ်ႈ ၸဵမ်ၸိူဝ်းၼႆႉ ။


ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး တီႈဝၢၼ်ႈမဵင်းမလႃႉၵျူၼ်း ယၢမ်ႈၸတ်းမႃးၵူႈပီ ။ ၵူၺ်းၵႃႈ မီးၸၢတ်ႈသႅင်း မၢၼ်ႈ ၊ ပဵၼ်ၾၢင်ႁၢင်ႈမၢၼ်ႈၵူၺ်း ။ ပီၼႆႉ ၸင်ႇပဵၼ်ပွႆးဝၼ်းၸိူဝ်ႉၸၢတ်ႈ - ဢၼ်ပဵၼ်ၾၢင်ႁၢင်ႈတႆး ဝႃႈၼႆ ။




 
© 2012 All Rights Reserved | Asean Celebrity | Fonts @ AtFonts | Free Templates