ဢိင်ၼိူဝ် တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (PSLF/TNLA) ပဵၼ်ပၢင်တိုၵ်းၵၼ်တင်း တပ်ႉသိုၵ်းၸိုင်ႈတႆး (RCSS/SSA) သေ သိုၵ်းတဢၢင်း ပူၼ်ႉပႅၼ်သုၼ်ႇလႆႈၵူၼ်းႁၢဝ်ႈႁႅင်း ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈတွင်ႈထၢမ်သေ ၽွင်းတႅၼ်းပႃႊတီႊႁူဝ်သိူဝ် တွပ်ႇလၢတ်ႈၼင်ႇၼႆ ။

ထၢမ် - မိူဝ်ႈလဵဝ်ၼႆႉ ၵူၼ်းပၢႆႈၽေးတီႈဝဵင်းၵျွၵ်ႉမႄး မီးၵႃႈႁိုဝ်ၶႃႈ ?။


တွပ်ႇ - မိူဝ်ႈဝႃး (10/02/2016) သၢမ်တီႈ မီးၵူၼ်း 800 ပၢႆယဝ်ႉ ။ မိူဝ်ႈၼႆႉ တေမႃးထႅင်ႈမွၵ်ႈ 1,500 ၶႃႈ ။


ထၢမ် - သၢမ်တီႈၼႆႉ ပဵၼ်တီႈလႂ်လၢႆလၢႆၶႃႈ ?။


တွပ်ႇ - တီႈႁဝ်းၶႃႈ ဢွၼ်ၵၼ်ၸွႆႈၵၼ်ႁဵတ်းဝႆႉ လုမ်းလႃးၵူၼ်းထဝ်ႈ ပေႃႈထဝ်ႈမႄႈၵႄႇ (ပူဝ်းပႂႃးယဵၵ်ႉတႃႇ) ၼၼ်ႉ မီးဝႆႉ 300 ပၢႆ ။ တီႈဝတ်ႉမုၼ်ၸဝ်ႈ / ၵျွင်းသီႇႁူဝ်ႇ မီး 300 ပၢႆ ။ တီႈၵျွင်းၸဝ်ႈသြႃႇဢွင်ႇသုပၢၼ်ႇ ၵေႃႈမီးဝႆႉၽွင်ႈ ။ ၵျွင်းၼမ်ႉၸဵတ်းလိၼ်း မီးဝႆႉၽွင်ႈ ။ ၵျွင်းႁူဝ်ၼမ်ႉၵေႃႈ မီးဝႆႉၽွင်ႈၶႃႈ ။


ထၢမ် - ၵူၼ်းပၢႆႈၽေးသိုၵ်းၸိူဝ်းၼႆႉ သမ်ႉပဵၼ်ၸၢဝ်းၶိူဝ်းသင် လၢႆလၢႆၶႃႈ ?။


တွပ်ႇ - မိူဝ်ႈလဵဝ်တႄႉ ၸၢဝ်းၶိူဝ်းတႆးတင်း ၸၢဝ်းၶိူဝ်းပလွင်ႈ ၶဝ်ႈၶိုင်ႈၵၼ် ။


ထၢမ် - ၵူၼ်းပၢႆႈၽေးသိုၵ်းၸိူဝ်းၼႆႉ မီးၸုမ်းလႂ်လၢႆလၢႆမႃးၵမ်ႉၸွႆႈထႅမ်ဝႆႉ၊ ၸွႆႈထႅမ်ပၼ်သင်ၶႃႈ ?။


တွပ်ႇ - မိူဝ်ႈလဵဝ် ပႆႇမီးၸုမ်းလႂ်ၶႃႈ ။ မီးၸုမ်းႁဝ်းၶႃႈ ၸုမ်းလုမ်းလႃးၵူၼ်းထဝ်ႈ ၵျွၵ်ႉမႄး လႄႈပေႃႈမႄႈၵူၼ်းမိူင်း ၵျွၵ်ႉမႄး ဢွၼ်ၵၼ်ပၼ်ၽႃႈၽႅၼ်ႇသေ လဵင်ႉၶဝ်ႈဝႆႉ ။ မိူဝ်ႈဝႃး လဵင်ႉၶဝ်ႈဝၼ်း ၶဝ်ႈၶမ်ႈ ။ ၼႂ်ၼႆႉၵေႃႈလဵင်ႉၶဝ်ႈၼႂ်ဝႆႉသေ မိူဝ်ႈလဵဝ်ၼႆႉ ၵႃး 8 လမ်း တိုၵ်ႉၵႂႃႇႁပ်ႉၵူၼ်းပၢႆႈၽေးသိုၵ်းမႃး ထႅင်ႈယူႇၶႃႈ ။ တီႈတေႃႉသၢင်ႇ ၊ တီႈပၢင်ၸၢမ် ၊ တီႈတၢင်ႉၶၢင်ၸိူဝ်းၼႆႉ မီးဝႆႉၵူၼ်းႁဵင်ပၢႆ (1,000+) ၊ ၶဝ်ဝႃႈမီးမွၵ်ႈၵူၼ်း ႁဵင်ႁႃႈပၢၵ်ႇ ။ ၵႃး 8 လမ်း တိုၵ်ႉၵႂႃႇႁပ်ႉမႃးယူႇၶႃႈ ။


ထၢမ် - ၵူၼ်းပၢႆႈၽေးသိုၵ်းၶဝ်ၼႆႉ ၵမ်ႈၼမ်ၶႂ်ႈလႆႈ (လူဝ်ႇ) တၢင်းၸွႆႈထႅမ်သင်ၶႃႈ ?။


တွပ်ႇ - ပိူင်လူင်မၼ်းတႄႉ ဢမ်ႇၶႂ်ႈႁႂ်ႈပဵၼ်သိုၵ်း။ မိူဝ်ႈလဵဝ်တႄႉ ပႃးတူဝ်လၢႆ ၊ ပႃးၶူဝ်းၸပ်းတူဝ်သေမႃးၵူၺ်း။ တူၺ်းၽႂ်ၵေႃႈ ဢမ်ႇလႆႈဢဝ်သင်မႃး ။ တီႈႁိူၼ်းၵေႃႈ ပေႃးဝႃႈပိၵ်ႉဢိုတ်းၽၵ်းတူႁိူၼ်းသေမႃး သိုၵ်းလွႆၶဝ်တေဢဝ်ၾႆးၸုတ်ႇႁိူၼ်း ၊ ၶဝ်ၶႂ်ႈလႆႈသင်ၵေႃႈ ၶဝ်တေၶဝ်ႈတဝ်ဢဝ်မူတ်းမူတ်း ၊ မၢင်ႁိူၼ်းၼႆႉ သိုဝ်ႉဝႆႉၶဝ်ႈသၢၼ်ပဵၼ်ပၢၵ်ႇထူင် သိုၵ်းလွႆၶဝ်ၽဵဝ်ႈၵႂႃႇဝၼ်းလဵဝ်ၵူၺ်း ၊ ၶၢႆႉတီႈမၼ်းပႅတ်ႈၵမ်းလဵဝ်။ ပေႃးပဵၼ်ၼႂ်းႁၢၼ်ႉ (သႅင်ႇ) ၼမ်ႉမီႇၼမ်ႉမၼ်းၼႂ်းသႅင်ႇၸိူဝ်းၼႆႉ ဢဝ်ၵႂႃႇပႅတ်ႈမူတ်းမူတ်း ၊ ၼၢင်းယိင်းတႆးၵေႃႈ လူလၢႆၼႂ်းၵၢင်ဝၢၼ်ႈၵမ်းလဵဝ် ။ မိူဝ်ႈလဵဝ်ၼႆႉ ၵူၼ်းတႆးသွင်ႁဵင်ပၢႆတီႈတေႃႉသၢင်ႇၼႆႉ ယူႇဝႆႉၼႂ်းၵျွင်းၶႄႇ ။


ထၢမ် - ၵူၼ်းပၢႆႈၽေးသိုၵ်းၸိူဝ်းၼႆႉ လုၵ်ႉတီႈဝၢၼ်ႈလႂ်လၢႆလၢႆမႃးၶႃႈ ?။


တွပ်ႇ - မိူဝ်ႈလဵဝ်ၼႆႉ ဢၼ်မႃးၼမ် ပဵၼ်ဢိူင်ႇပၢင်ၸၢမ် ၊ ဢိူင်ႇပၢင်ၵွၼ် တင်းဢိူင်ႇတၢင်ႉၵၢင် 3 ဢိူင်ႇၼႆႉ ။ ဢိူင်ႇတေႃႉသၢင်ႇ ၊ ဝၢၼ်ႈလူင် ပႆႇလႆႈဢွၵ်ႇမႃး ၊ ၸင်ႇႁႃဢွၵ်ႇမႃးၼႂ်ၼႆႉၵူၺ်း ။ ဢိူင်ႇမင်းၵုင်းၼႆႉ ပႆႇလႆႈဢွၵ်ႇဝၢၼ်ႈသေဢိတ်း ။ မင်းၵုင်းၼႆႉ ထုၵ်ႇဝႅတ်ႉဝႆႉတင်းဢိူင်ႇ ။


ထၢမ် - ဢိင်ၼိူဝ်ငဝ်းလၢႆးၸိူဝ်းၼႆႉသေ ယူႇတီႈၽွင်းတႅၼ်းပႃႊတီႊႁူဝ်သိူဝ် ဝဵင်းၵျွၵ်ႉမႄး သမ်ႉၶႂ်ႈလၢတ်ႈၸိူင်ႉႁိုဝ်ၶႃႈ ?။


တွပ်ႇ - မိူဝ်ႈလဵဝ် ၽူႈၼမ်းတႆးႁဝ်း ထုၵ်ႇလီၵႄႈလိတ်ႈၸိူင်ႉႁိုဝ် ၊ ထုၵ်ႇလီႁဵတ်းၸိူင်ႉႁိုဝ်ၵေႃႈ ႁႂ်ႈၶိုင်ပွင်ၸတ်းၵၢၼ်ၵႂႃႇ ၊ ယႃႇပေပႂ်ႉႁႂ်ႈတႆးႁဝ်းမူၺ်ႉမူတ်း၊ ယႃႇပေပႂ်ႉၶေႃႈတူၵ်းလူင်း NCA ၊ ဢမ်ႇထုၵ်ႇလီပႂ်ႉၶေႃႈၵိၼ်ၵႅၼ်ႇၸုမ်းဢူၺ်းလီ ၶႂ်ႈတိုၵ်းသူၼ်းၼင်ႇၼႆ ။