ၸုမ်းၶႅၵ်ႇလီ ပၢင်ၸႃႉ ၼမ်ႉၶူင်း တူၼ်ႈတီး ၸတ်းႁဵတ်းပၢင်ၵုမ် ၶိုၵ်ႉၶၵ်ႉ ဢုပ်ႇၵုမ်တူၵ်းလူင်း တႃႇၵမ်ႉၸွႆႈထႅမ် ၵူၼ်းၺႃးၽေးသိုၵ်း ၼပ်ႉႁူဝ်ပၢၵ်ႇ ။

ဝၼ်းတီႈ 12/02/2016 ၶၢဝ်းယၢမ်း ၵၢင်ၼႂ် လုင်းထုၼ်းမျႃႉ ႁူဝ်ပဝ်ႈ ၸုမ်းၶႅၵ်ႇလီပၢင်ၸႃႉ ၼမ်ႉၶူင်း တူၼ်ႈတီး  တေဢွၼ်ဢဝ် လုၵ်ႈၸုမ်း ၼမ်ႉၶူင်း ၵႂႃႇၸွႆႈထႅမ် ၶူဝ်းၶွင်လႄႈ ၶဝ်ႈၼမ်ႉတၢင်းၵိၼ် ပၼ်ၵူၼ်းပၢႆႈၽေးသိုၵ်း ဢၼ်မႃးမီးတီႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၼႆယဝ်ႉ ။


ၸၢႆးသႅင်မိူင်း ၽူးၼမ်းၼႂ်း ၸုမ်းၶႅၵ်ႇလီပၢင်ၸႃႉ ၼမ်ႉၶူင်း လၢတ်ႈဝႃႈ “ မိူဝ်ႈၽုၵ်ႈ ၸဵမ်ၸဝ်ႈ တေဢၢၼ်းဢွၵ်ႇတူၼ်ႈတီးၵႂႃႇ ၵျွၵ်းမႄးၵမ်းလဵဝ် ယူႇတီႈၸုမ်းႁဝ်းၶႃႈ ႁၢင်ႈႁႅၼ်းဢဝ် ၶူဝ်းၶွင်လႄႈ ၶွင်ၵိၼ်ယႅမ်ႉ မိူၼ်ၼင်ႇ ၶဝ်ႈသၢၼ် 300 ထူင် ၊ ၽႃဝႆ 1000 ၽိုၼ် ၊ ၶဝ်ႈသွႆး 500 တိူၵ်ႈ ၊ ၶူဝ်းၼုင်ႈတၢင်းဝႆ10 ထူင်ပၢႆ ၊ တင်းမူတ်း မႅၼ်ႈငိုၼ်း 15,350,000 ပျႃး တေၶတ်းၸႂ် ႁႂ်ႈၵႂႃႇထိုင် တီႈၵျွၵ်ႉမႄး ၽႂ်းၽႂ်း ယွၼ်ႉၵူၼ်းပၢႆႈၽေးသိုၵ်း ဢမ်ႇလႆႈဢဝ်ၶူဝ်းၶွင်ၸပ်းတူဝ် သင်မႃးသေဢိတ်း ”  ဝႃႈၼႆ ။


ၽွင်းတႅၼ်းပႃႊတီႊႁူဝ်သိူဝ် ၸႄႈဝဵင်းၵျွၵ်ႉမႄး ၸၢႆးတၢၼ်းမွင်ႇ လၢတ်ႈဝႃႈ -  “ ပိူင်လူင်မၼ်းတႄႉ ဢမ်ႇၶႂ်ႈႁႂ်ႈပဵၼ်သိုၵ်း ။ မိူဝ်ႈလဵဝ်တႄႉ ၵူၼ်းထူပ်းၽေးသိုၵ်းၶဝ် ပႃးၶူဝ်းၸပ်းတူဝ်သေ မႃးၵူၺ်း ။ တူၺ်းၽႂ်ၵေႃႈ ဢမ်ႇလႆႈဢဝ်သင်မႃး ။ မိူဝ်ႈလဵဝ် ပႆႇမီးၸုမ်းလႂ်မႃးၸွႆႈထႅမ် ၊ မီးၸုမ်းႁဝ်းၶႃႈ ၸုမ်းလုမ်းလႃးၵူၼ်းထဝ်ႈ ၵျွၵ်ႉမႄး လႄႈ ပေႃႈမႄႈၵူၼ်းမိူင်း ၵျွၵ်ႉမႄး ဢွၼ်ၵၼ်ပၼ်ၽႃႈၽႅၼ်ႇသေ လဵင်ႉၶဝ်ႈဝႆႉ ။ မိူဝ်ႈဝႃး လဵင်ႉၶဝ်ႈဝၼ်း ၶဝ်ႈၶမ်ႈ ၼႂ်ၼႆႉၵေႃႈ သိုပ်ႇလဵင်ႉၶဝ်ႈၼႂ် ”  - ဝႃႈၼႆ ။


ယွၼ်ႉပိူဝ်ႈပၢင်တိုၵ်းၼႂ်းၵႄႈတပ်ႉသိုၵ်းတဢၢင်း TNLA လႄႈ တပ်ႉသိုၵ်းၸိုင်ႈတႆး RCSS/SSA ႁၢဝ်းႁႅင်း ။ တပ်ႉသိုၵ်းတဢၢင်း ၶဝ်ႈယူႇၼႂ်းဝၢၼ်ႈ ၸွမ်းၵူႈဝၢၼ်ႈလႄႈ မိူဝ်ႈဝၼ်းတီႈ 10 ၶၢဝ်းယၢမ်း 15:00 မူင်း ပီႈၼွင်ႉၵူၼ်းမိူင်း ပွတ်ႈဝၢၼ်ႈတေႃႉသၢင်ႇ ၼပ်ႉႁူဝ်ပၢၵ်ႇ ပၢႆႈၶဝ်ႈဝဵင်းၵျွၵ်ႉမႄး မီးမွၵ်ႈ 300 ။ မိူဝ်ႈၼႆႉသမ်ႉ ၵူၼ်းဝၢၼ်ႈယင်းတိုၵ်ႉၶမ်ဝႆႉ တီႈဝၢၼ်ႈ မွၵ်ႈ 3000 လႄႈ ၾၢႆႇလူလွမ်ၵူၼ်းၺႃးၽေးသိုၵ်း ၵျွၵ်ႉမႄး သူင်ႇရူတ်ႉၵႃး ၵႂႃႇႁပ်ႉၵူၼ်းဝၢၼ်ႈ မႃးၽွင်ႈယဝ်ႉ ။


ၶွင်ႇသီႇဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး RCSS/SSA တင်း တပ်ႉသိုၵ်းပူတ်းပွႆႇၸၢဝ်းၸၢတ်ႈ ဢတၢင်း (ပလွင်ႈ) TNLA လႆႈပဵၼ်ပၢင်တိုၵ်းၵၼ်မႃး မိူဝ်ႈႁၢင်ပီ 2015 လိူၼ်ၼူဝ်ႊဝိၼ်ႊပိူဝ်ႊ ထိုင်မႃး ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႈ 69 ပီ ဝၼ်းတီႈ 7 ၼၼ်ႉ လႆႈပဵၼ်ပၢင်တိုၵ်း ၵၼ်ႁၢဝ်ႉႁႅင်း လၢႆလၢႆပွၵ်ႈ ပီႈၼွင်ႉၵူၼ်းမိူင်း ၼပ်ႉႁူဝ်ပၢၵ်ႈ လႆႈဢွၵ်ႇပၢႆႈ မႃးတၢင်းၸႄႈဝဵင်းၵျွၵ်ႉမႄး ဝႃႈၼႆ ။