ၸဝ်ႈသြႃႇ ၽတ်ႉတၼ်တ ဢိၼ်တႃၸႃရ (ႁိုဝ်) ၸဝ်ႈသြႃႇပီး ဢႃယု 61 ပီ ၊ ဝႃႇသႃ 41 ဝႃႇ ။ ၸဝ်ႈၽူႈၵွၼ်းဝတ်ႉ / ၼင်ႈၵျွင်း ဝိႁၢရ်မိူင်းယေႃ - တူင်ႇဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ လူႉလွၼ်ႇသဵင်ႈမုၼ် မိူဝ်ႈဝၼ်းထိ 07/02/2016 ၊ ပီတႆး 2110 ၼီႈ ၊ လိူၼ်ၵမ်လွင်ႈ 14 ၶမ်ႈ ဝၼ်းဢႃးတိတ်ႉ၊ လူၺ်ႈတၢင်းပဵၼ် ယဵဝ်ႈဝၢၼ် ၊ တပ်းၵႂ်ႈ ။

တၵႃႇသတ်ႉထႃး တေသၢင်းၵဵဝ်ႇ ၽဝ်ၶၢပ်ႈတူဝ်ၸဝ်ႈသြႃႇ ဝၼ်းထိ 15 လိူၼ် ၾႅပ်ႊၿိဝ်ႊရီႊ 2016 ၊ ပီတႆး 2110 ၼီႈ လိူၼ်သၢမ်မႂ်ႇ 7 ၶမ်ႈ ဝၼ်းၸၼ် ။


ၸဝ်ႈသြႃႇပီး ပဵၼ်ၸဝ်ႈၵွၼ်းဝတ်ႉ / ၼင်ႈၵျႂင်း ဝိႁၢရ်မိူင်းယေႃ ၊ ၵတ်ႉၶႅၼ်ႇလူင်ႉလႅၼ်ႇ ၾၢႆႇတႆႈတဵၼ်းတႆႈဢၢင်း မေးၵဵဝ်ႇမေးၵိင်း။ ပဵၼ်ၸဝ်ႈၽူႈ ဢၼ်တၵ်ႉၵႃႇသတ်ႉထႃး ၼႂ်းထုင်ႉမိူင်းယေႃ ၼပ်ႉထိုဝ် ၵိူဝ်းယမ် ပိုင်ႈဢိင် လူႇတၢၼ်း ။


မၼ်းၸဝ်ႈပဵၼ် လုၵ်ႈၸၢႆး ၵေႃႉထိ 3  လုင်းၸၢင်းၶမ်းလႅင်သၢမ် - ပႃႈၸၢင်းမွၼ်း။ ၵိူတ်ႇဝၢၼ်ႈတပ်ႉ ၊ မိူင်းယေႃ တူင်ႇဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။


ထုင်ႉမိူင်းယေႃ မီးၸဵင်ႇႁွင်ႇဝၼ်းဢွၵ်ႇဝဵင်းလႃႈသဵဝ်ႈ 32 လၵ်း ။


မၼ်းၸဝ်ႈၼုင်ႈၽႃႈလိူင်ၸဵမ်လဵၵ်ႉ  ယူႇတီႈဝတ်ႉၵျွင်းဝိႁၢရ်မိူင်းယေႃ ။ တင်ႈတႄႇၸဝ်ႈသြႃႇသေႃးၼ ၸဝ်ႈၼင်ႈဝတ်ႉ / ၵျွင်းဝိႁၢရ်မိူင်းယေႃ လူႉလွၼ်ႇယဝ်ႉ ၸဝ်ႈသြႃႇပီး လႆႈၶိုၼ်ႈပဵၼ်ၸဝ်ႈၼင်ႈဝတ်ႉ ၵျွင်းဝိႁၢရ်မိူင်းယေႃမႃးႁၢၼ်ႉတေႃႇထိုင် လူႉလွၼ်ႇသုတ်းမုၼ် ဢမ်ႇယွမ်း 20 ပီ ။


ၸဝ်ႈသြႃႇပီးမိူင်းယေႃ မီးပီႈၼွင်ႉႁူမ်ႈတွင်ႉ 5 ၵေႃႉ ။ ပီႈဢၢႆႈလူင် ပဵၼ်လုင်းသၢင်ႇပၢင်ႇ ၊ ၵေႃႉထီႉသွင်ပဵၼ် လုင်းၵျၢၼ်ႇလူႇ ၊ ၵေႃႉထီႉသၢမ် ပဵၼ်ၸဝ်ႈသြႃႇပီး၊ ၵေႃႉထီႉသီႇပဵၼ် လုင်းဢၢႆႈတၢၼ်း ၊ ၵေႃႉထီႉႁႃႈပဵၼ် လုင်းဢၢႆႈၶမ်း ။