ပၢင်လိူၵ်ႈတင်ႈ ပတ်းပိုၼ်ႉတူဝ်ႈမိူင်း ဢၼ်ၸတ်းႁဵတ်းၵႂႃႇမိူဝ်ႈ လိူၼ်ၼူဝ်ႊဝႅမ်ႊပိူဝ်ႊ  2015 ၼၼ်ႉ  ပႃႊတီႊၼူၵ်ႉယုင်း (NLD) လႆႈၶႅပ်းၵၢင်ၸႂ်ၼမ်သုတ်း ပေႉပၢင်လိူၵ်ႈတင်ႈ ။


ပၢင်ၵုမ် သၽႃးႁူမ်ႈတုမ် လႄႈ သၽႃးၸႄႈမိူင်း / တိူင်း တွၼ်ႈတႃႇၸုပ်ႈၽူႈတႅၼ်းသၽႃးမႂ်ႇၵေႃႈ တႄႇၸတ်းၼႂ်းႁူဝ်လိူၼ် ၾႅပ်ႊၿိဝ်ႊရီႊၼႆႉလီငၢမ်းသေ လႆႈလိူၵ်ႈတင်ႈ ၽူႈၼင်ႈၸိုင်ႈ ၊ ႁူဝ်ပဝ်ႈလႄႈၵႅမ်ႁူဝ်ပဝ်ႈသၽႃး ။ ၼၼ်ႉၵေႃႈပဵၼ်ၵူၼ်းၼႂ်းၸုမ်း ပႃႊတီႊၼူၵ်ႉယုင်းလႄႈ ပႃႊတီႊသၢင်ႇသီႈ ဢၼ်ပေႉပၢင်လိူၵ်ႈတင်ႈၼၼ်ႉလွၼ်ႉလွၼ်ႉ ။ ဢၼ်လုၵ်ႉတီႈ ပႃႊတီႊၸၢဝ်းၶိူဝ်း ၸႄႈမိူင်းၽႂ်မၼ်း ၶိုၼ်ႈဢမ်ႇမီး ။ ၸုမ်းလူင်ပွင်ၸိုင်ႈမႂ်ႇ ၊ ၸွမ်ၸိုင်ႈလႄႈ ၵႅမ်ၸွမ်ၸိုင်ႈမႂ်ႇၼႆႉ ၸွင်ႇတေမႅၼ်ႈၼင်ႇၸႂ် ၵူၼ်းမိူင်းလႄႈၸၢဝ်းၶိူဝ်းၼႆ ပဵၼ်ဢၼ်ပၵ်းတႃဝႆႉယူႇ ။


လုၵ်ႉတီႈပၢင်ၵုမ်သၽႃးႁူမ်ႈတုမ် ဢၼ်တႄႇၸတ်းႁဵတ်းၼႂ်းဝၼ်းတီႈ 8 ၼၼ်ႉသေ ႁူဝ်ပဝ်ႈသၽႃးၸိူဝ်ႉၸၢတ်ႈ မၢၼ်းဝိၼ်းၶႅင်ႇ ပိုၼ်ႈၽၢဝ်ႇလၢတ်ႈဝႃႈ - ပၢင်ၵဵပ်းသဵၼ်ႈၸိုဝ်ႈ တႃႇလိူၵ်ႈၸွမ်ၸိုင်ႈလႄႈ ၵႅမ်ၸွမ်ၸိုင်ႈ တေပဵၼ်ၼႂ်းဝၼ်းထိ 17 လိူၼ်မၢတ်ႉၶျ် - ဝႃႈၼႆ ။


ၵဵဝ်ႇၵပ်းလွင်ပွင်ၸိုင်ႈမႂ်ႇၼႆႉသေ ၸွမ်သိုၵ်းယွတ်ႈသိုၵ်း ႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး (RCSS/SSA) လၢတ်ႈဝႃႈ -“ လူင်ပွင်ၸိုင်ႈမႂ်ႇၼႆႉ ၵူၼ်းမိူင်းလိူၵ်ႈတင်ႈၶိုၼ်ႈမႃး ၊ ၵူၼ်းမိူင်းၵေႃႈတင်ႈၵႂၢမ်းဝႆႉဝၢင်းၸႂ် တီႈၶဝ်တင်းၼမ် ၊ ႁဝ်းၵေႃႈတင်ႈၵႂၢမ်းဝင်ဝႆႉယူႇဝႃႈ မၼ်းတေလီ ။ ၵွပ်ႈပိူဝ်ႈဝႃႈ မၼ်းဢမ်ႇၸႂ်ႈသိုၵ်းယိပ်းၵမ်လူး ၊ ၵူၺ်းၵႃႈ ႁဝ်းတေလႆႈပႂ်ႉတူၺ်းဝႃႈ ၶဝ်တေႁဵတ်းၵၢၼ်လႆႈ မွၵ်ႈၵႃႈႁိုဝ် ၊ ဢၼ်ၵူၼ်းမိူင်း ၸၢဝ်းၶိူဝ်းတင်းလၢႆၶႂ်ႈလႆႈၼၼ်ႉ ႁဝ်းလီပႂ်ႉတူၺ်း ”- ဝႃႈၼႆ ။

ၽူႈတေၶိုၼ်ႈပဵၼ်ၸွမ်ၸိုင်ႈမႂ်ႇၼႆႉ တေႃႇထိုင်ယၢမ်းလဵဝ် ၽႂ်ၵေႃႈပႆႇၸၢင်ႈလၢမ်းၶၢတ်ႈဝႃႈတေပဵၼ်ၽႂ် ၊ လုၵ်ႉပႃႊတီႊလႂ်မႃး ။ ၵူၺ်းၵႃႈပႃႊတီႊမၢၼ်ႈတၢင်းၼမ်တႄႉဝႃႈ ပေႃးဢမ်ႇမီးမၢႆမီႈ 59 (ၸ)  ႁတ်ႉႁႅတ်ႉၸိုင် ႁူဝ်ပဝ်ႈပႃႊတီႊ  NLD ၼၢင်းဢွင်ႇသၢၼ်းၸုၵျီႇ တၵ်းတေၶိုၼ်ႈပဵၼ်ၸွမ်ၸိုင်ႈ ဢမ်ႁၢင်ႉ ဝႃႈၼႆဝႆႉ ။


ၾၢႆႇပၵ်းတႃၵၢၼ်မိူင်းၵမ်ႈၽွင်ႈၵေႃႈလၢမ်းၶၢတ်ႈဝႃႈ - ဢၼ်ၶၢႆႉၶၢဝ်းယၢမ်းလိူၵ်ႈၸွမ်ၸိုင်ႈမႂ်ႇၼႆႉ လႅပ်ႈတေပဵၼ်ၶၢဝ်းယၢမ်းတႃႇ ၼၢင်းဢွင်ႇသၢၼ်းၸုၵျီႇ ႁူပ်ႉထူပ်း ငူပ်ႉငီႉတင်းၾၢႆႇတပ်ႉသိုၵ်းယူႇၵေႃႈပဵၼ်လႆႈ - ၼႆၵေႃႈဝႃႈ ။


ၵူၺ်းၵႃႈ ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းႁွင်ႈၵၢၼ် မိူင်းႁူမ်ႈတုမ် (PI) လၢတ်ႈဝႃႈ - ၽႂ်မႃးပဵၼ်လူင်ပွင်ၸိုင်ႈ ၊ ၽႂ်ပဵၼ်ၸွမ်ၸိုင်ႈၵေႃႈလီ ၊ တႃႇၵူၼ်းတႆးတေလႆႈသူၼ်ႇလႆႈ ၼၼ်ႉ တႄႉ တူဝ်ၵူၼ်းၶိူဝ်းလႂ်ၶိူဝ်းၼၼ်ႉ တၵ်းလႆႈ လုၵ်ႉႁဵတ်းဢဝ်ႁၢင်းၵူၺ်း - ဝႃႈၼႆ ။  


“ ယုမ်ႇယမ်ဝႃႈ ဢွင်ႇသၢၼ်းၸုၵျီႇ တိုၼ်းတေႁဵတ်းၸွမ်းၵႂၢမ်းမၼ်ႈ ဢၼ်ပၼ်ဝႆႉ ဝႃႈ တေတႄႇတင်ႈပူၵ်းပွင် မိူင်းၾႅတ်ႊၻရႄႊလ် ဢၼ်ၸႂ်ႉတိုဝ်းလွၵ်းပိူင်ၻီႊမူဝ်ႊၶရေႊသီႊၼၼ်ႉယူႇ ။ ၵွပ်ႈပိူဝ်ႈၼၼ်လႄႈ ႁဵတ်းႁိုဝ်ၵေႃႈ မၼ်းၼၢင်းတၵ်းလႆႈဢုပ်ႇဢူဝ်း  ၸွမ်သိုၵ်းလူင် မိၼ်းဢင်ႇလၢႆႇ ယူႇ ။ ၵူၺ်းၵႃႈ မိၼ်းဢွင်ႇလၢႆႇ တင်းမၼ်းၼၢင်းၼႆႉ တေၸၢင်ႈတူၵ်းလင်းလႆႈမွၵ်ႈ ႁူဝ်ပၢၵ်ႇ 50,75 ၼႄႇၼႆတႄႉဢမ်ႇၸၢင်ႈဝႃႈ ။ ဢၼ်တေၸၢင်ႈမီးၽွၼ်းလီၽွၼ်းၸႃႉ ၶိူဝ်းၵူၼ်းတင်းၼမ်ၵေႃႈ တေပဵၼ်ၸိူင်ႉၼႆၵူၺ်း ။ ဢၼ်ႁဝ်းၶႂ်ႈဝႃႈၼႆႉ ၽွၼ်းလီၸိုင်ႈမိူင်းတႃႇၶိူဝ်းၵူၼ်းၸႄႈမိူင်းတင်းၼမ်ၼၼ်ႉ ႁဝ်းယႃႇပေပႂ်ႉ ပိူၼ်ႈႁဵတ်းပၼ် ။ တူဝ်ႁဝ်းတေလႆႈ ႁဵတ်းဢဝ် ။ ယွၼ်ႉပိူဝ်ႈႁဝ်းပႂ်ႉပိူၼ်ႈႁဵတ်းပၼ်လႄႈ ႁဝ်းလႆႈၸႂ်ယႂ်ႇ ၸွမ်သိုၵ်းဢွင်ႇသၢၼ်း မၼ်းသမ်ႉလႆႈတူၵ်းသုမ်းၵႂႃႇလႄႈ ဢၼ်ႁဝ်းၸႂ်ယႂ်ႇပိူၼ်ႈၼႆႉ မၼ်းလႆႈလူႉသုမ်းၵႂႃႇ ။ ယွၼ်ႉ ၼၼ် ယႃႇပေႁႂ်ႈမၼ်းပဵၼ်ပွၵ်ႈၵမ်း 2 ”- ဝႃႈၼႆ ။


ပၢင်လိူၵ်ႈတင်ႈ ၵမ်းသွင် ၼႂ်းႁွပ်ႈ 60 ပီ ဢၼ်ၸတ်းႁဵတ်းယဝ်ႉတူဝ်ႈၵႂႃႇ မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ 2015 ၼၼ်ႉ ပႃႊတီႊဢၼ်ၶဝ်ႈလိူၵ်ႈတင်ႈပတ်းပိုၼ်ႉၸိုင်ႈမိူင်း မီး 60 ပၢႆ ။ ၼႂ်းၼၼ်ႉ ပႃႊတီႊ NLD ဢၼ်ၼၢင်းဢွင်ႇသၢၼ်းၸုၵျီႇဢွၼ်ႁူဝ် ပေႉပၢင်လိူၵ်ႈတင်ႈ ။ ပႃႊတီႊသၢင်ႇသီႈ USDP ပေႉတီႈသွင် ၊ ပႃႊတီႊရၶႅင်ႇလႄႈပႃႊတီႊႁူဝ်သိူဝ် ပေႉတီႈသၢမ် ။